Luka 6

1A Pɛ̃nfʋ Bɩbir ɩ̃sʋɔ daar, Yesu nɩ a wʋ poturbo kpɛ̃n tala a puo sãlsɔɔ, ka a wʋ poturbo piel fɔrɔ a bʋ̃bie na ba ŋmɩɛnɛ nɩ a nuur ɔɔrɔ. 2Ka a Farasee bamɩne sʋʋr ba, "Bo lɛ yɩ ɩrɛ a lɛ na ba tara sɔr a Pɛ̃nfʋ Bɩbir Daar ɛ?" 3Ka a Yesu 'yɛr kʋ ba, "Yaa kar a Nãaŋmɩn gãn pɔ nyɛ a lɛ a David na dɔ̃ɔ ɩ nɩ a wʋ nɩbɛ a kɔ̃ na kpɛ ba ɛ? 4Wʋ kpɛ̃n a Nãaŋmɩn yir tɩ de a paanʋ̃ɔ ala ban bin kʋ Nãaŋmɩn na wʋ 'wɔb an ba tara sɔr ɛ, ka a Nãaŋmɩn bɔɔrlorbo tɛɛ ba lɛ ɛ. Tɩ de amɩne mɩ kʋ a wʋ nɩbɛ." 5Ka a Yesu pãa 'yɛr kʋ ba, "Maa Nɩsaal Bie lɛ ɩ a Pɛ̃nfʋ Bɩbir Soro." 6A Pɛ̃nfʋ Bɩbir Daar ɩ̃sʋɔ, wʋ ben a ba lɔ̃ɔfʋ yir na wʋ wile, ka a daba ɩ̃sʋɔ be be a nũsʋ̃ɔ na kpi. 7A Faraseemɩne nɩ a nɛɛ wiwiilbe bʋɔrɔ sɔr na gar 'yɔ̃ɔ a Yesu, lɛ lɛ ba tɔɔ gbʋr kaara wʋ ɩka ba kaa ala ɩ wʋn sãan a baal a Pɛ̃nfʋ Bɩbir ɔ. 8Tɩchɛ Yesu bɔ̃ɔn a lɛ ban tɩɛrɛ na wʋ 'yɛr kʋ a daba 'lɔ nũu na kpi, "Ir ara ka nɩrɛ jaa nyɛ fʋ." Ka a daba ir ara. 9Ka a Yesu pãa 'yɛr kʋ ba, "N sʋʋr yɩ kaa, bo lɛ sɛɛ ɩka a maal a Pɛ̃nfʋ Bɩbir Daar, fʋ maal vɩla bɩɩ fʋ maal dɛɛr? Fʋ kʋ nɩrɛ bɩɩ fʋ faa nɩrɛ, bɩɩ fʋ sɔ̃ɔ bar?" 10Wʋ kãan ba jaa gʋɔr tɩ 'yɛr a daba, "Tur a fʋ nũu." A wʋ tur ka a nũu wʋ jaa sa. 11Tɩchɛ ka a suur kpɛ ba ka ba guoro taa a lɛ ban na ɩ a Yesu. 12A ber ala ɩ̃sʋɔ pɔ, Yesu don a tɔ̃ɔ ju Nãaŋmɩn sʋɔrfʋ jie, wʋ sʋɔr Nãaŋmɩn a tɩ̃sɔɔ 'lɔ wʋ jaa. 13A wɛr na wa chaar a bibio, wʋ bʋɔl naa a poturbo ka ba wa a wʋ sɛ̃, ka wʋ ir a ba pɔ pie nɩ ayi bʋɔlɔ ba nɩtʋ̃nsɩ. 14A bala wʋn ir lɛ, Simon wʋn lɛ kʋ yopaalaa Pita, nɩ a wʋ yɛbɛ Andiru, Jemesɩ, Jɔɔn, Filip, Batolomi, 15Matiu, Tomasɩ, Jemesɩ na ɩ Alfayasɩ bidaba, Simon na mʋ̃ɔ nɩbir nɩ a wʋ wɛr yele, 16Jemesɩ bidaba Judas, nɩ a Judas Isɩkariyot 'lɔ lɛ wa ɩ a gagaraa. 17Yesu tara ban suun ka ba tɩ ara a jie 'lɔ na jɩ̃taa, kaa poturbo yɔɔ be be, ka a nɩyɔɔ mɩ yi Judiya, Jerusalɛm, ka bamɩne mɩ yi a Tire tẽe nɩ a Sidon tẽe na be a man koor. 18Ba wa naa ɩka ba wa chɛl a wʋ 'yɛr tɩ wʋ sãa a ba baalsɩ. Wʋ sãan a bala ba jaa na tara a sɩdɛbɛ. 19Ka a nɩyɔɔ bala dɔ̃ɔnɔ̃ taa bʋɔrɔ a Yesu sɩɩrfʋ bojũu kpɛ̃ɔ yire naa a wʋ pɔ sãana a ba jaa baalsɩ. 20Yesu kaara naa a wʋ poturbo tɩ 'yɛr, "Pʋpɛl lɛ kʋ a yɩn banyãna na ɩ a nɔ̃n dẽme. Yɩn lɛ so a Nãaŋmɩn nãalʋ̃ʋ. 21Pʋpɛl lɛ kʋ a yɩn a kɔ̃ na kpɛ pʋ̃pãanyã yɩn lɛ na wa tɩɩ. Pʋpɛl lɛ kʋ a yɩn na kõnõ a pʋ̃pãanyã, yɩn wa laara naa. 22Pʋpɛl lɛ kʋ yɩ a nɩbɛ na wa 'laar yɩ, na ba oo yɩ bar, tɩ tʋrɔ yɩ na ba sɔ̃ɔnɔ̃ a yɩ yuor fɩka bʋ̃dɛɛr a maa Nɩsaal Bie jũu. 23A bɩbir nyã wa vɩɛ yɩ chɩlɛ nɩ pʋpɛl, bojũu a yɩ sãyar waa naa na be a saaju. Lɛ lɛ a ba sãakpãmɩne dɔ̃ɔ maal a Nãaŋmɩn 'yɛ'yɛrbɛ. 24Nɛbier pɔɔn a yɩn na ɩ a tara dẽme, yɩn 'lɔ nyɛn a yɩ 'maalfʋ. 25Nɛbier kpɛ̃n a yɩn na tɩɩ a pʋ̃pãanyã kɔ̃ na kpɛ yɩ naa. Nɛbier kpɛ̃n a yɩn na laara a pʋ̃pãanyã, yɩn lɛ nɩbaal na wa kpɛ a yɩ kõnõ. 26Nɛbier kpɛ̃n a yɩn nɩbɛ jaa na bʋɔlɔ yɩ yo sʋ̃, lɛ lɛ a ba sãakpãmɩne mɩ dɔ̃ɔ bʋɔlɔ a jir 'yɛ'yɛrbɛ a yosʋ̃n. 27"Tɩchɛ n 'yɛrɛ na kʋrɔ a yɩn na chɛlɛ a n 'yɛr, yɩ nʋ̃ a yɩ dɔ̃dɔ̃mɔ̃sɩ na yɩ maal vɩla kʋ a bala na 'laar yɩ. 28Yɩ 'yɛr nɛvɩla 'yɔ̃ɔ a bala na pɔ 'yɔ̃ɔ yɩ, na yɩ sʋɔrɔ Nãaŋmɩn kʋrɔ a bala na gere yɩ. 29Nɩrɛ wa 'ma fʋ tʋkpal pɔ, lɛ lɩɛb a bʋ̃'yen ka wʋ lɛ 'ma, nɩrɛ wa de a fʋ fuu kpɛ̃ɛ ta mɔ̃ɔ wʋ a fuu bile ɛ. 30Nɩrɛ jaa wa sʋɔr fʋ bon de kʋ wʋ, nɩrɛ wa de a fʋ bon taa lɛ wa sʋrɔ wʋ go ɛ. 31A lɛ yɩn bʋɔrɔ ɩka a nɩbɛ ba maal kʋ yɩ, yɩ mɩ maal a lɛ kʋ ba. 32"Ala ɩ yɩ nʋ̃ naa a bala na nʋ̃ yɩ, yobuor lɛ yɩ nyɛ? A yelbetʋ̃nbɔ gba mɩ nʋ̃n a bala na nʋ̃ ba. 33Ala ɩ yɩ maala na vɩla kʋrɔ a bala na maal yɩ a vɩla, yobuor lɛ yɩn nyɛ? A yelbetʋ̃nbɔ gba mɩ ɩrɛ naa a lɛ. 34Ka ala ɩ fʋ pɛ̃ɛn a bala fʋn tɩɛr ɩka ban wa yab fʋ naa, yobuor lɛ yɩn wa nyɛ? A yelbetʋ̃nbɔ ma pɛ̃ɛn a ba taaba tɩɛrɛ ɩka ban wa yab a jaa. 35Tɩchɛ yɩ nʋ̃ a yɩ dɔ̃dɔ̃mɔ̃sɩ na yɩ maal vɩla kʋ ba, yɩ pɛ̃ɛ ba na yɩ taa chɛlɛ ɩka ba lɛ wa yab yɩ ɛ. Ala lɛ a yɩ sãyar na waa, ka yɩ na ɩ a saaju Nãaŋmɩn bibiir, bojũu 'lɔ lɛ maala vɩla kʋrɔ a nɩhayasɩ nɩ putudẽme. 36Yɩ ɩ nɩbibaal dẽme nɩtãa lɛ a yɩ Sãa na ɩ a nɩbibaal sʋɔ. 37"Yɩ ta tɔɔr nɩrɛ 'yɛr ɛ, ka Nãaŋmɩn mɩ wa tɔɔr a yɩ 'yɛr ɛ. Yɩ ta 'yɔ̃ɔ nɩrɛ 'yɛr ɛ, ka Nãaŋmɩn mɩ ta 'yɔ̃ɔ yɩ 'yɛr ɛ. Yɩ vɛ̃ kʋ nɩrɛ ka Nãaŋmɩn mɩ vɛ̃ kʋ yɩ. 38Yɩ de tɩr, Nãaŋmɩn mɩn kʋ yɩ naa, man vɩla tɩ dib 'yɔ̃ɔ tɩ yɛ yɛɛ ka a yaara, an kpaar dɔɔl a yɩ gbɛɛ ju. A bon 'lɔ yɩn man tɩr, 'lɔ mɩ lɛ a Nãaŋmɩn na man kʋ yɩ." 39Sʋkpa nyã lɛ a Yesu lɛ lɔb kʋ ba, "Jɔ̃ɔ na tʋ̃ɔn jɔ̃ɔ tɔɔ? Ba jaa ayi kʋ̃ lo bɔɔ pɔ ɛ? 40Nɩrɛ na jãna wʋ kʋ̃ tʋ̃ɔ gar a wʋ wiwile ɛ, tɩ 'lɔ wa jãn baar wʋn tʋ̃ɔ kaara a wʋ wiwile kaar. 41"Ŋmɩnɛ a fʋ kaara a dabile na be a fʋ yɛbɛ nɩbir pɔ, tɩ ba chɛlɛ a dakpɛ̃ɛ na be a fʋ̃ʋ nɩbir pɔ ɛ? 42Bɩɩ Ŋmɩnɛ a ɩ ka fʋ 'yɛr kʋ a fʋ yɛbɛ, n yɛbɛ vɛ̃ ka n ir a a dabile bar a fʋ nɩbir pɔ, tɩ ba ire a dakpɛ̃ɛ na be a fʋ̃ʋ nɩbir pɔ ɛ? Fʋ̃ʋ nɩbɛlɛ nyã, de nie ir a dakpɛ̃ɛ a fʋ nɩbir pɔ bar na fʋ pãa nyɛrɛ tʋ̃ɔ ir a dabile a fʋ yɛbɛ nɩbir pɔ bar. 43"Tɩsʋ̃ ba wɔ̃nɔ̃ bidɛbɛ ɛ, bɩɩ tɩdɛɛr mɩ ba wɔ̃nɔ̃ bisʋ̃n ɛ. 44Tɩɛ jaa a wʋ wɔ̃mɔ̃ lɛ ba ma de bɔ̃ɔn wʋ. Ba maa pɔr kɔ̃kɔ̃ɔ gʋtɩɛ ju ɛ, bɩɩ pɔr 'wɔ̃rɔ tamiir tɩɛ ju ɛ. 45Nɩsʋ̃ a yelsʋ̃ ala na be a wʋ pʋɔm lɛ wʋ ma 'yɛrɛ, ka a nɩdɛɛr mɩ ma 'yɛrɛ a yeldɛbɛ ala na be a wʋ pʋɔm. Ala na sɛɛ a pʋɔ lɛ a nɛɛ ma 'yɛrɛ. 46"Ŋmɩnɛ a yɩ bʋɔlɔ ma ɩka Soro, tɩ na yaa turo a lɛ ɩn 'yɛr ɛ? 47Nɩrɛ jaa na wa a n sɛ̃ na wʋ wõ a n 'yɛr tɩ maala, ɩn wiil yɩ naa a lɛ wʋn be. 48Wʋ kaara fɩka nɩrɛ na mɩɛrɛ yir na wʋ tuu a dachin par kparaa bɔɔ tɩ pɔɔn kʋsɩr na mɛ a dachin dɔɔl. Kʋ̃ɔ wa yaar yi jilʋ̃ a yir, ka a kɔ̃sɛbɛ ŋmiere a yir tɩ waa dam ɛ, bojũu ba mɛ wʋn sʋ̃. 49Tɩchɛ nɩrɛ 'lɔ na wõ a n 'yɛr tɩ na waa maala ɛ, wʋ kaara fɩka nɩrɛ na mɛ yir dɔɔl a tãn mʋɔr ju, waa tuu tɩ mɛ ɛ. A kɔ̃sɛbɛ wa yin ŋme a dachin, ka a dachin wʋ jaa lo ŋmɛr."

will be added

X\