Luka 19

1Yesu kpɛ̃n a Jeriko tẽe pɔ tala. 2Ka a daba kɔ̃ɔ be be ban bʋɔlɔ Jakiyas, 'lɔ lɛ ɩ a lõpodierbe nɩkpɛ̃ɛ na wʋ ɩ tara sʋɔ. 3Wʋ bʋɔrɔ naa ɩka wʋ nyɛ Yesu nɩ nɩbir, tɩchɛ ka a nɩbɛ waa, a wʋ kʋ̃ tʋ̃ɔ nyɛ wʋ ɛ, bojũu nɩŋmaa lɛ wʋ ɩ. 4Be lɛ wʋ de nie jo chen tɩ do kɔ̃kɔ̃ɔ tɩɛ ju ɩka wʋ nyɛ a Yesu an ɩ a be lɛ wʋ tu tala. 5Yesu na wa ta a tɩɛ pĩlem, wʋ dʋɔn bʋɔl wʋ, "Jakiyas wa suu fɔɔ, a fʋ yir lɛ ɩn gã dɩna." 6Ka a Jakiyas suu fɔɔ jaa na wʋ tuor de a Yesu nɩ pʋpɛl. 7A nɩbɛ ba jaa nyɛn a lɛ na ba piel hũhũnõ 'yɛrɛ, "Wʋ ben na tɩ kpɛ a yelbe-ɩrɛ nyãna sãan." 8Tɩchɛ ka a Jakiyas ir ara tɩ 'yɛr kʋ a Yesu, "Nyɛ n Soro, ɩn põ naa a n bʋ̃tarsɩ ŋmaa, naa kʋ a nɔ̃n dẽme, ala ɩ n mɩ fɔl nɩrɛ jaa bon, ɩn yab a lɛ dɔɔl gbɛɛ anaar." 9A Yesu 'yɛr kʋ wʋ, "Dɩna faafʋ wan a yir nyã pɔ, bojũu a daba nyã mɩ ɩn a Abraham bie. 10Bojũu a maa Nɩsaal Bie wa naa ɩka n wa bɔ na n faa a bala na bɔr." 11Ban chɛlɛ a anyãna ka wʋ lɔb sʋkpa kʋ ba, bojũu ba gbʋrɔ naa a Jerusalɛm ka nɩbɛ tɩɛr ɩka a Nãaŋmɩn nãalʋ̃ʋ na tɔɔn daa yi ajienaa. 12Wʋ 'yɛr kʋ ba, "Nãbie ɩ̃sʋɔ lɛ ir na chen a tẽtɛɛr ɩ̃sʋɔ ka ba tɩ su wʋ nãa, ka wʋ lɩɛb wa. 13Na wʋ bʋɔl a wʋ gbãgbaar pie na wʋ de a sɛlbie pie na wʋ kʋ ba tɩ 'yɛr, 'Yɩ de a libie anyãna tʋ̃nɔ̃ nɩ, wa tãn a sɔ̃ɔ 'lɔ ɩn na lɩɛb wa.' 14Tɩchɛ ka a wʋ tẽe dẽme 'laar wʋ, ir nɩbɛ tʋ̃ wʋn chen baar ka ba tɩ 'yɛr ɩka, 'Baa bʋɔrɔ a daba nyã ɩka wʋ wa ɩ a ba nãa ɛ.' 15"Wʋ din a nãa na wʋ lɩɛb wa a wʋ tẽe, wʋ wa tʋ̃n bʋɔl a wʋ gbãgbaar bala wʋn kʋ a libie ka ba wa a wʋ sʋʋr kaa a lɛ ban tʋ̃n a libie. 16A 'lɔ na de nie wa 'yɛr naa, 'Nɩkpɛ̃ɛ, a fʋ libir dɔɔn pie dɔɔl.' 17Ka a nɩkpɛ̃ɛ 'yɛr, 'Fʋ maal vɩla fʋn ben tara yelmɩ̃ɛ nɩ a bʋ̃bile nyã, ɩn vɛ̃ naa ka fʋ kaara tẽn pie.' 18A ayi sʋɔ wa 'yɛr, 'Nɩkpɛ̃ɛ, a fʋ libir mɩ dɔɔn anũu dɔɔl.' 19Ka a wʋ nɩkpɛ̃ɛ 'yɛr, 'Mɩ kaara tẽn anũu.' 20"Ka ata sʋɔ mɩ wa 'yɛr, 'Nɩkpɛ̃ɛ nyɛ a fʋ libir ɩn lũ 'yɔ̃ɔ fɔbaa pɔ bin. 21N joro fʋn dãbɩ̃ɛ, bojũu a fʋ yele kpɛ̃mɛ naa. Fʋ ma den a jie 'lɔ fʋn ba bin ɛ, na fʋ ŋma a jie 'lɔ fʋn ba bʋr ɛ.' 22Ka a wʋ nɩkpɛ̃ɛ 'yɛr, 'A fʋ nɛɛ 'yɛrbie lɛ ɩn de tɔɔr a fʋ 'yɛr, gbãgbadɛɛr lɛ fʋ ɩ. Fʋ̃ʋ mɩ̃ɛ bɔ̃ɔn naa ɩka a n yele kpɛ̃mɛ naa, ma de a be ɩn ba bin ɛ, na n ma ŋmara a jie 'lɔ ɩn ba bʋr ɛ. 23Bo lɛ so ka faa de a n libir tɩ 'yɔ̃ɔ a be a libie binfʋ jie ɛ, ɩn ben ta wa, n kʋ̃ naa de ka bon dɔɔl ɛ?' 24Tɩ pãa 'yɛr kʋ a bala na ara a be, 'Yɩ faa a libir 'lɔ a wʋ sɛ̃, na yɩ kʋ a 'lɔ na tara a libie pie.' 25Ka ba 'yɛr, 'Nɩkpɛ̃ɛ, pie lɛ wʋ tara.' 26Wʋ 'yɛr naa, 'N 'yɛrɛ yɩ naa ɩka nɩrɛ 'lɔ na tara wʋn lɛ nyɛn dɔɔl, tɩchɛ nɩrɛ 'lɔ na ba tara ɛ, tɩ tara bɩ̃lãa ban den a bɩ̃lãa ala. 27Tɩchɛ a n dɔ̃dẽme bala na ba bʋɔrɔ ma ɩka n ɩ a ba nãa ɛ, yɩ nyɔɔr ba waan wa kʋ a ka a n niem.' " 28Yesu na 'yɛr a anyãna baar wʋ de ban nie ka ba duoro a Jerusalɛm. 29A lɛ wʋn wa gbʋrɔ a Betefagɩ nɩ a Betanɩ, tɔ̃ɔ ben be ka ba bʋɔlɔ Olive Tɩɩr Tɔ̃ɔ, wʋ tʋ̃ naa a wʋ poturbo ayi tɩ 'yɛr kʋ ba. 30"Yɩ chen a tẽbile 'lɔ a yɩ niem, yɩn wa kpɩɛrɛ a tẽe pɔ yɩn nyɛn bʋ̃pɔlbile ban lũ, baa do wʋ jaa sɛrɛ ɛ, yɩ for wʋ waan. 31Ala ɩ nɩrɛ wa sʋʋr yɩ naa, 'Ŋmɩnɛ a yɩ foro a bʋ̃pɔlbile?' Yɩ 'yɛr wʋ, 'A sɩ Soro lɛ bʋɔrɔ wʋ.' " 32A bala wʋn tʋ̃ chen tɩ nyɛ a lɛ nɛ wʋn 'yɛr ba. 33Ban wa foro a bʋ̃pɔlbile, a bʋ̃pɔlbile dẽme sʋʋr ba naa, "Ŋmɩnɛ a yɩ foro a bʋ̃pɔlbile?" 34A ba 'yɛr, "A sɩ Soro lɛ bʋɔrɔ wʋ." 35Ba waan naa a bʋ̃pɔlbile wa kʋ a Yesu, na ba 'yɩɛr a ba fɔɔr dɔɔl a bʋ̃pɔlbile ju, tɩ nyɔɔ a Yesu ka wʋ do jɩ̃nɛ. 36A lɛ wʋn chiine, lɛ mɩ lɛ a nɩbɛ 'yɩɛrɛ a fɔɔr den a sɔr. 37Wʋn chen wa gbʋrɔ a jie a sɔr na suu a Olive Tɩɩr Tɔ̃ɔ ju, a nɩyɔɔ bala na turo wʋ piel chɩlɛ nɩ nɛkpɛ̃ɛ na ba pɛɛrɛ Nãaŋmɩn a nɛ'maa tʋ̃mɔ̃ ala a jaa ban nyɛ jũu. 38"Nãaŋmɩn wʋ sʋ̃ʋ a nãa 'lɔ wʋn tʋ̃! Nyã'maar ben a saaju, ka a tɩɩr be a saaju jaa saaju." 39Ka a Faraseemɩne na be a nɩyɔɔ bala pɔ, 'yɛr kʋ a Yesu, "Wiwile tãn a fʋ poturbo a ba bar a gɔ̃n." 40A Yesu 'yɛr kʋ ba, "Ala ɩ ba bar a gɔ̃n, kʋsɩbɛ na pɔɔrɔ naa gɔ̃mɔ̃." 41Yesu na wa tara a Jerusalɛm na wʋ nyɛ a tẽe wʋ kõn kʋ wʋ, 42tɩ 'yɛr, "Ala ɩ a fʋ̃ʋ, fʋ̃ʋ gba ta bɔ̃ɔ a bon 'lɔ a dɩna bɩbir nɩ taa waan nyã'maar, tɩchɛ a sɔɔl naa a fʋ sɛ̃. 43A bɩbir na wa vɩɛ yɩ naa, ka a yɩ dɔ̃dẽme wa jilʋ̃ yɩ gʋɔr gʋɔr a jie wʋ jaa. 44Ban nɛb yɩn ŋmɛr nɩ a yɩ bibiir nɩ a yɩ tẽe ba kʋ̃ wa bar kʋsɩr ka wʋ dɔɔl wʋ tɔ ju ɛ, bojũu yaa tɩɛr tɔ a sɔ̃ɔ a Nãaŋmɩn na waara a yɩ sɛ̃ ɛ." 45Wʋ pãa tɩ kpɛ naa a Nãaŋmɩn puorfʋ yir bɛchaar pɔ na wʋ piel dire a bala na daara bara. 46Na wʋ 'yɛr kʋ ba, "A sɛb a Nãaŋmɩn gãn pɔ ɩka, 'A n yir na ɩ naa a puorfʋ jie,' tɩchɛ ka a yɩn maal wʋ a 'nãnyisɩ sɔɔlfʋ jie.' " 47Bɩbir jaa lɛ wʋ wile ba be a Nãaŋmɩn puorfʋ yir, tɩchɛ ka a Juu nɩbɛ bɔɔrlo nɩbɛrɛ nɩ a Mosesɩ Nɛɛ wiwiilbe nɩ a nɩbɛrɛ bʋɔrɔ a wʋ kʋfʋ. 48Tɩchɛ baa bɔ̃ɔ lɛ ban na ɩ ɛ, bojũu nɩbɛ ba jaa 'yɔ̃ɔn toor chɛlɛ a wʋ 'yɛr.

will be added

X\