Luka 14

1A Pɛ̃nfʋ Bɩbir ɩ̃sʋɔ daar, Yesu chen a Faraseemɩne nɩdiere ɩ̃sʋɔ yir difʋ jie ka ba jʋrɔ wʋ. 2Be lɛ ka daba kɔ̃ɔ na tara a baal vʋ̃ naa ara a wʋ niem. 3Ka a Yesu sʋʋr a Faraseemɩne nɩ a Mosesɩ nɛɛ bɔ̃ɔnbɔ, "A tara na sɔr ka fʋn sãa nɩrɛ na bɩɛrɛ a Pɛ̃nfʋ Bɩbir bɩɩ a ba tara sɔr ɛ?" 4Tɩchɛ ka ba ɩ jaa gbulo, ka Yesu de a nũu dɔɔl a daba sãa a wʋ baal tɩ bar wʋ sɔr. 5Tɩ na wʋ pãa sʋʋr ba, "Ala ɩ a yɩ ɩ̃sʋɔ bie bɩɩ a wʋ nadar lon bulo pɔ a Pɛ̃nfʋ Bɩbir, wʋ kʋ̃ chen tɩ ir wʋ fɔfɔɔ jaa bɩɩ?" 6Baa lɛ tara 'yɛr na 'yɛr ɛ. 7Yesu nyɛn a nɩbɛ bala ban bʋɔl ɩka ba wa di, ka ba tuur a nɩbɛrɛ jaa jiir jɩ̃nɛ, ka wʋ lɔb a sʋkpa nyã kʋ ba, 8"Nɩrɛ wa bʋɔl fʋ pɔɔ kulfʋ jie, fʋ̃ʋ wa chen ta tɩ jɩ̃nɛ a nɩbɛrɛ jaa jie ɛ, amɩne wʋ bʋɔl nɩrɛ na gar fʋ ka wʋn wa. 9Ala wa ɩ a lɛ, wʋn wa 'yɛr fʋ naa, 'Ir, ka a daba nyã jɩ̃nɛ a fʋ jaa jie.' Vĩ lɛ fʋn ir tɩ jɩ̃nɛ nɩ a puor. 10Tɩchɛ bala wa bʋɔl fʋ, tɩ jɩ̃nɛ a puor, ka a 'lɔ na bʋɔl fʋ wa 'yɛr, 'N badaba wa jɩ̃nɛ ka a niem, be lɛ fʋn pãa vʋ̃ a fʋ taaba niem.' 11Bojũu, nɩrɛ jaa na 'mɔɔrɔ wʋ mɩ̃ɛ saaju, Nãaŋmɩn na siir wʋ naa, 'lɔ mɩ na siir a wʋ mɩ̃ɛ, Nãaŋmɩn na 'mɔɔ wʋn saaju." 12Ka Yesu pãa 'yɛr kʋ a 'lɔ na bʋɔl wʋ, "Fʋ̃ʋ wa bʋɔl nɩrɛ ɩka wʋ wa di, taa wa bʋɔlɔ a fʋ barmɩne, bɩɩ a fʋ yɛɛr, bɩɩ a fʋ bal nɩbɛ, bɩɩ a fʋ tɔ dẽme bala na ɩ tara dẽme ɛ. Ala ɩ fʋ ɩn a lɛ, ban bʋɔl fʋn daar kɔ̃ɔ tɩ yaa a sãn. 13Tɩchɛ fʋ̃ʋ wa bʋɔlɔ nɩbɛ ɩka ba wa di, bʋɔl a nɔ̃n dẽme, nɩ a gbɛrsɩ, nɩ a nɩbaalsɩ, nɩ a jɔ̃n. 14Fʋ̃ʋ lɛ Nãaŋmɩn na sʋ̃ʋ. Ban ba tara bon na yab fʋ ɛ, fʋ̃ʋ lɛ na nyɛ sãyar a lɛ a nɩtʋ̃nsɩ na wa ir a kũu pɔ ɩ vʋ ɛ." 15Ka a bala na lɔ̃ɔ dire ɩ̃sʋɔ na wõ a nɩtɔ̃, na wʋ 'yɛr kʋ a Yesu, "An ɩn bɔɔsʋ̃n kʋ a 'lɔ na wa jɩ̃nɛ a Nãaŋmɩn nãalʋ̃ʋ pɔ dire." 16Be lɛ a Yesu lɔb a sʋkpa nyã, "Nɩkpɛ̃ɛ kɔ̃ɔ lɛ dɔ̃ɔ chɔɔrɔ na wʋ bʋɔlɔ nɩyɔɔ ɩka ba wa di. 17A sɔ̃ɔ na wa ta, wʋ tʋ̃n a wʋ tʋ̃tʋ̃nɔ̃ ɩka wʋ chen tɩ 'yɛr a bala wʋn bʋɔl ɩka wʋ maal yele a jaa baar. 18Tɩchɛ ka a ba ɩ̃sʋɔ jaa 'yɛr ɩka ba kʋ̃ nyɛ jie ɛ. Ka a 'lɔ ban dɔ̃ɔ ta ka wʋ 'yɛr, 'N dãn popaalaa naa chiine ɩka n tɩ kaa, n kʋ̃ tʋ̃ɔ tɩ ɛ.' 19Ka a ɩ̃sʋɔ mɩ 'yɛr, 'N dãn narkʋɔrsɩ pie naa jãna n kʋ̃ tʋ̃ɔ tɩ ɛ.' 20Ka a ɩ̃sʋɔ mɩ 'yɛr, 'Pɔɔ lɛ n de n kʋ̃ tʋ̃ɔ tɩ be ɛ.' 21"A tʋ̃tʋ̃nɔ̃ lɩɛb wa 'yɛr a nɩtɔ̃ kʋ a wʋ nɩkpɛ̃ɛ, ka a suur kpɛ a nɩkpɛ̃ɛ ka wʋ 'yɛr kʋ a tʋ̃tʋ̃nɔ̃, 'Lɩɛb chen fɔfɔɔ jaa a tẽe sãlsɔɔ nɩ a kõkorsɩ pɔ, na fʋ tɩ bʋɔl a nɔ̃n dẽme, a gbɛrsɩ, jɔ̃n nɩ a nɩbaalsɩ waan.' 22Ka a tʋ̃tʋ̃nɔ̃ wa 'yɛr, 'Nɩkpɛ̃ɛ, n ɩ naa a lɛ fʋn 'yɛr ɩka n ɩ, tɩchɛ ka a jie chɛnɛ be be.' 23Be lɛ a nɩkpɛ̃ɛ pãa lɛ 'yɛr kʋ a tʋ̃tʋ̃nɔ̃, 'Yi chen a sɔɩ pɔ, nɩ a sɛɛr pɔ tɩ bʋɔl nɩbɛ waan ka n yir wa sɛɛ. 24N 'yɛrɛ na kʋrɔ yɩ ɩka ɩ̃sʋɔ jaa kʋ̃ lɛ̃ maa ɛ.' " 25Yesu nɩ a nɩyɔɔ 'mantaa chiine, ka wʋ lɩɛb kaa ba tɩ 'yɛr, 26"Ala ɩ nɩrɛ na wa naa a n sɛ̃, na waa 'laar a wʋ sãa nɩ a wʋ ma, nɩ a wʋ pɔɔ, a wʋ bibiir, a wʋ yɛɛr nɩ a wʋ yɛpɔbɔ 'matãan a wʋ mɩ̃ɛ nyɛvʋr ɛ, wʋ kʋ̃ tʋ̃ɔ ɩ a n poturo ɛ. 27Nɩrɛ 'lɔ mɩ na ba de a wʋ daa tuo turo nɩ ma ɛ, wʋ kʋ̃ tʋ̃ɔ ɩ a n poturo ɛ. 28"Ala ɩ a yɩ ɩ̃sʋɔ bʋɔrɔ na yir kpɛ̃ɛ mɛfʋ, a ba ɩ wʋn den nie jɩ̃nɛ guor kaa ala ɩ wʋ tara naa a libie na tʋ̃ɔ mɛn baar ɛ? 29Na wʋ taa kpar a yir tɩ ba tʋ̃ɔ baar ɛ, ka a wʋ taaba nyɛ laara wʋ 30'yɛrɛ, 'Jaal piel a mɛfʋ tɩ na waa baar ɛ.' 31Bɩɩ nãbuor lɛ bʋɔrɔ ɩka wʋ tɩ jɛb a wʋ nãa tɔ sʋɔ na waa de nie jɩ̃nɛ kaa ɩka wʋn tʋ̃ɔ de a wʋ nɩbɛ turo pie (10,000) tɩ jɛb a 'lɔ na waara nɩ a wʋ nɩbɛ turo lɩjɛr (20,000) ɔ? 32Ala ɩ wʋ kʋ̃ tʋ̃ɔ ɛ, wʋn tʋ̃n nɩbɛ ka ba chen tɩ 'maal a nãa 'lɔ na chɛnɛ be a tɛɛr. 33Lɛ mɩ lɛ, a yɩ ɩ̃sʋɔ jaa baa bar a wʋ bonsɩ a jaa ɛ, wʋ kʋ̃ tʋ̃ɔ ɩ a n poturo ɛ. 34"Nyaar ɩ naa, tɩchɛ a wʋ nʋ̃ɔ wa baar, ŋmɩnɛ ban lɛ ɩ wʋ ka wʋ lɛ nʋ̃mɔ̃ go? 35Wa vɩɛl kʋ a tãpuor tãna ɛ, ban lɔb bar. Nɩrɛ 'lɔ na tara toor wõnõ, vɛ̃ ka wʋ wõ naa."

will be added

X\