Luka 11

1Bɩbir ɩ̃sʋɔ Yesu ben a jie kɔ̃ɔ na wʋ sʋɔrɔ Nãaŋmɩn, wʋn wa sʋɔr baar, ka a wʋ poturbo ɩ̃sʋɔ 'yɛr kʋ wʋ, "Sɩ Soro, wiil sɩ a Nãaŋmɩn sʋɔrfʋ, nɩtãa lɛ a Jɔɔn na wiil a wʋ poturbo." 2A wʋ 'yɛr kʋ ba, "Yɩn ma wa sʋɔrɔ a Nãaŋmɩn yɩ 'yɛr, Sɩ Sãa, sɩ kʋ naa a fʋ yuor tɩɩr. A fʋ nãalʋ̃ʋ wʋ wa. 3Na fʋ kʋ sɩ a sɩ bɩbir jaa bʋ̃diir. 4Vɛ̃ a sɩ maal dɛbɛ bar, bojũu sɩ mɩ vɛ̃n kʋ a bala jaa na maal sɩ a dɛɛr. Ta sɔɔ ka bɛɛr kaa nyɔɔ sɩ ɛ." 5Be lɛ wʋ pãa 'yɛr kʋ ba. "Ala ɩ a yɩ ɩ̃sʋɔ tara na baraa na wʋ wa ir chen a wʋ sɛ̃ tɩ̃sɔɔ bɩ̃ɩn tɩ 'yɛr, 'Pɛ̃ɛ ma jɔ̃ nɩ ŋmele, 6bojũu n baraa ɩ̃sʋɔ lɛ wa suu a tɩ̃sɔɔ nyãna tɩ n ba tara bon na maal kʋ wʋ ɛ.' 7Ka wʋ gã be a die pɔ tɩ 'yɛr, 'Ta dɔ̃ɔnɔ̃ ma ɛ, a pãn pɔɔ naa ka maa naa bibiir be gã, n kʋ̃ lɛ tʋ̃ɔ ir kʋ fʋ bon go ɛ.' 8N 'yɛrɛ na kʋrɔ yɩ, a wʋ baraa na ba sɔɔ ir kʋ wʋ a jɔ̃ ɛ, tɩchɛ wʋn chɛnɛ ara kpãkpãana, wʋn wa ir kʋ wʋ jɩ̃ a lɛ wʋn bʋɔrɔ. 9"Lɛ lɛ n 'yɛrɛ kʋrɔ yɩ, yɩ sʋɔr, Nãaŋmɩn na kʋ yɩ naa. Yɩ kaa yɩn nyɛ naa, yɩ kpoor a pãn wʋn yuo naa. 10Nɩrɛ 'lɔ na sʋɔr, wʋn nyɛ naa, ka a 'lɔ mɩ na kaara nyɛ, ka a pãn mɩ yuo kʋ a 'lɔ na kpoor. 11A yɩn na ɩ a sãamɩne, buor sʋɔ bie lɛ na sʋɔr wʋ jɩ̃m ka wʋ de waa kʋ wʋ. 12Bɩɩ sʋɔr najɛl ka wʋ de lɔ̃ɔ kʋ wʋ? 13Ala ɩ a yɩn gba na ɩ nɩdɛbɛ bɔ̃ɔn vɩla ma ɩ kʋ a yɩ bibiir, ŋmɩnɛ lɛ an ɩ ka yɩ Sãa na be a saaju kʋ̃ de a Sɩɛ kʋ a bala na sʋɔr wʋ ɛ?" 14Yesu dire naa a sɩdɛɛr na be daba yɔ̃ɔ vɛ̃ ka wʋ ɩ wõo. A sɩdɛɛr na wa yi a daba 'yɔ̃ɔ, ka wʋ tʋ̃ɔ 'yɛrɛ, ka nɛ'maa a nɩbɛ. 15Tɩchɛ ka a bamɩne 'yɛrɛ, "A sɩdɛbɛ nãa Beeljebul lɛ wʋ de dire nɩ a sɩdɛbɛ." 16Ka a bamɩne mɩ bɛɛr wʋ kaara na ba bʋɔrɔ jɩ̃nɛ na yi saaju. 17Yesu bɔ̃ɔn a lɛ ban tɩɛrɛ na wʋ 'yɛr kʋ ba, "Nãa jaa na jɛɛrɛ nɩ a wʋ mɩ̃ɛ a wʋ nãa na sɔ̃ɔ naa. Yir nɩbɛ mɩ na ir jɛɛrɛ taa kʋ̃ tʋ̃ɔ 'mataa kpɛ ɛ. 18Lɛ mɩ lɛ, ala ɩ a Satan lɩɛb jɛɛrɛ nɩ a wʋ mɩ̃ɛ, ŋmɩnɛ a wʋ nãalʋ̃ʋ na ɩ ara? N 'yɛr naa nɩtɔ̃ bojũu yɩ 'yɛr ɩka a Beeljebul lɛ n de dire nɩ a sɩdɛbɛ. 19Ala ɩ a Beeljebul lɛ n tara dire nɩ a sɩdɛbɛ, tɩ a bala na ɩ a yɩ poturbo bo lɛ ba tara dire nɩ a sɩdɛbɛ? A lɛ jũu, bala lɛ na ɩ a yɩ 'yɛr tɔɔrbɔ. 20Tɩchɛ ala ɩ Nãaŋmɩn kpɛ̃ɔ lɛ n dire nɩ a sɩdɛbɛ ka a yire wiil yɩn ɩka a Nãaŋmɩn nãalʋ̃ʋ wa naa a yɩ sɛ̃. 21"Gãdaa na gu a wʋ yir nɩ jɛɛr bomo, a wʋ bonsɩ maa dam ɛ. 22Tɩchɛ ala ɩ nɩrɛ ɩ̃sʋɔ wa wa naa na wʋ kpɛ̃mɛ gar wʋ, wʋn faan a wʋ jɛɛr bomo ala wʋn dɩɛl tɩ de a wʋ bonsɩ põn nɩbɛ. 23"Nɩrɛ 'lɔ na ba be a n sɛ̃ ɛ, wʋ tara man nɩ 'yɛr, nɩrɛ 'lɔ na ba pʋɔ ma a sɩ kaala lɔ̃ɔnɔ̃ taa ɛ, wʋ ma yɛ̃yɛl bar. 24"Sɩdɛɛr ban wa dii bar ka wʋ yi nɩrɛ pɔ, wʋ ma chen dal pʋɔ ju tɩ bʋɔrɔ pɛ̃nfʋ jie, na waa nyɛ ɛ, na wʋ pãa wa 'yɛr, 'Ɩn lɩɛb kul a nɩrɛ 'lɔ pɔ ɩn yi tɩ chɛ bar.' 25Wʋn wa lɩɛb wa, wʋ nyɛn a nɩrɛ 'lɔ na kaara yir kaar ban pɩɩr tɩ chɔɔr wʋ sʋ̃. 26Ka wʋ pãa tɩ bɔ sɩɩr ayopõi na tara putuo gar wʋ ka ba chen tɩ kpɩɛrɛ a be. Ka a daba pãa ɩ dɛɛr gar a lɛ wʋn dɔ̃ɔ be." 27A nyãna lɛ a Yesu 'yɛrɛ ka a pɔɔ ŋme chɛlma be a nɩyɔɔ pɔ tɩ 'yɛr, "Pʋpɛl lɛ kʋ a fʋ ma 'lɔ na dɔɔ fʋ, nɩ a wʋ bɩr fʋn 'yɛn." 28Ka a Yesu 'yɛr, "Lɛ ba lɛ ɛ, a bala na wõ a Nãaŋmɩn 'yɛr na ba turo, bala lɛ ɩ a pʋpɛl dẽme." 29A nɩbɛ na waara 'yɔ̃ɔnɔ̃ ka Yesu 'yɛr, "A dɩna nɩbɛ banyãna ɩn putudẽme tɩ bʋɔrɔ nɛ'maa tʋ̃mɔ̃ ka a na ɩ jɩ̃nɛ, tɩchɛ ba kʋ̃ nyɛ ɩ̃sʋɔ jaa ɛ, ka a Jona jɩ̃nɛ ba lɛ ɛ. 30Bojũu, lɛ a Jona na dɔ̃ɔ ɩ jɩ̃nɛ kʋ a Ninive dẽme, lɛ mɩ lɛ a maa Nɩsaal Bie na ɩ a jɩ̃nɛ kʋ a dɩna nɩbɛ. 31A Siba Pɔɔ Nãa na yin a 'yɛr tɔɔrfʋ daar na wʋ wa 'yɔ̃ɔ a yɩn dɩna nɩbɛ 'yɛr, bojũu wʋ dɔ̃ɔ yi be a tẽtɛɛr wa chɛl a Nãa Solomon yɛ̃ 'yɛr, tɩchɛ yɩ kaa a 'lɔ na gar a Solomon ben ka. 32A 'yɛr tɔɔrfʋ daar Ninive nɩbɛ na ir 'yɔ̃ɔ a yɩn dɩna nɩbɛ 'yɛr, bojũu ba lɩɛb ba tɩɛr a Jona na dɔ̃ɔ 'yɛr a Nãaŋmɩn 'yɛr kʋ ba, yɩ kaa a 'lɔ na gar a Jona ben ka. 33"Nɩrɛ jaa ba be na chʋm fɩ̃tɩn na wʋ sɔɔl bar ɛ, bɩɩ de laa kpa pɔɔ ɛ. Wʋ ma dɔɔl bar a dɔɔl fʋ jie, ka a bala na kpɩɛrɛ nyɛ a chãa. 34A fʋ nɩbir ɩn a ɩ̃gãn fɩ̃tɩn. A fʋ nɩbie wa ɩ, a fʋ ɩ̃gãn wʋ jaa ma sɛɛn nɩ chãa. Tɩchɛ ala ba wa ɩ ɛ, a fʋ ɩ̃gãn wʋ jaa ma ɩn libe. 35Yɩ kaara sʋ̃ ka a chãa 'lɔ na be a yɩ pɔ, taa lɩɛb libe ɛ, 36A lɛ jũu, ala ɩ a chãa sɛɛn a fʋ ɩ̃gãn wʋ jaa ka a libe bɩ̃lãa jaa ba be be ɛ, wʋ jaa na ɩn chãa nɩtãa lɛ a fɩ̃tɩn na ma chaar fʋ a wʋ chãa." 37Yesu na wa 'yɛr baar, Farasee nɩrɛ ɩ̃sʋɔ bʋɔl wʋ naa ka wʋ tɩ di bʋ̃diir, lɛ lɛ wʋ chen tɩ kpɛ jɩ̃nɛ a bʋ̃diir par. 38Tɩchɛ ka a Farasee nɩrɛ jʋrɔ a Yesu ka a ɩ waa pɛɛ a ba pɛɛfʋ ɛ, ka nɛɛ 'maa wʋ. 39Be lɛ a Soro pãa 'yɛr kʋ wʋ, "Faa nyɛ, a yɩn Faraseemɩne ma pɛɛr naa a ŋmama nɩ a laar dũkur, tɩchɛ ka a yɩ pʋɔ sɛɛn fɔlfʋ nɩ putuo. 40Jɔlɔ banyã, a ba ɩ a 'lɔ na maal a yõo 'lɔ lɛ mɩ maal a pʋɔ ɛ? 41Tɩchɛ a ala na be a laa pʋɔm, yɩ de kʋ a nɔ̃n dẽme ka a bonsɩ a jaa pãa vɩɛlɛ kʋ yɩ. 42"Nɛbier ben a yɩn Faraseemɩne sɛ̃, bojũu bʋ̃bile jaa yɩn da lɔ̃ɔn badʋʋ gba vaar, yɩ ma ir a da ŋmaa tɩ na yɩ ĩin vɩla maalfʋ nɩ Nãaŋmɩn nʋ̃fʋ bar. Ala lɛ yɩn taa irɛ na yɩ ta ĩin a ala na de nie bar ba maal ɛ. 43Nɛbier ben a yɩn Faraseemɩne sɛ̃, bojũu yɩ nʋ̃ naa a nɩbɛrɛ jaa jie a yɩ lɔ̃ɔfʋ yie pɔ na yɩ mɩ nʋ̃ a daa pɔ puorfʋ. 44Nɛbier ben a yɩ sɛ̃, bojũu yɩ kaara naa fɩka yar nɩbɛ na ba bɔ̃ɔ ɛ, tɩ do yʋɔrɔ." 45Ka a Mosesɩ Nɛɛ wiwile ɩ̃sʋɔ 'yɛr, "Wiwile, a anyãna fʋn 'yɛr, sɩ jaa lɛ fʋ 'mataa tʋrɔ." 46Be lɛ a Yesu 'yɛr wʋ, "A yɩn Mosesɩ Nɛɛ wiwiilbe nɛbier ben a yɩ sɛ̃, bojũu yɩ ma tuon nɩbɛ tuor na tɩrɛ tɩ na yɩ maa ir a yɩ nubir gba tɩɛ 'yɔ̃ɔ ba ɛ. 47Nɛbier ben a yɩ sɛ̃, bojũu a Nãaŋmɩn 'yɛ'yɛrbɛ bala a yɩ sãamɩne na kʋ, yɩn lɛ mɛ a ba yar. 48A lɛ yɩn maal din dãasɩɛ ɩka a yɩ sãamɩne lɛ. Bala lɛ kʋ a Nãaŋmɩn 'yɛ'yɛrbɛ ka yɩ mɩ mɛ a ba yar. 49A nɩtɔ̃ jũu lɛ a Nãaŋmɩn na ɩ yɛ̃ sʋɔ 'yɛr, 'N tʋ̃n a n 'yɛ'yɛrbɛ nɩ a n nɩtʋ̃nsɩ a ba sɛ̃, ka ban ir bamɩne kʋ tɩ ge bamɩne.' 50A lɛ jũu, yele tuon a yɩn dɩna nɩbɛ. A Nãaŋmɩn 'yɛ'yɛrbɛ bala ban kʋ a kõr jaa, yɩn lɛ na yab a ba sãn. 51Piel a Abel jɩ̃ɩ sɔ̃ɔ tɩ tãn a Jekariya ban kʋ a Nãaŋmɩn bɔɔr lofʋ jie nɩ a puorfʋ jie chara pɔ. Ɔ̃ɔ, n 'yɛrɛ na kʋrɔ yɩ ɩka a yɩn dɩna nɩbɛ lɛ na yab a jaa sãn. 52Nɛbier ben a yɩn Mosesɩ Nɛɛ wiwiilbe sɛ̃, bojũu yɩn lɛ tara a bɔ̃ɔfʋ pãn bir, yɩn mɩ̃ɛ ba kpɩɛrɛ ɛ, tɩ pɔɔ var a bala na bʋɔrɔ a kpɛfʋ." 53Yesu yin a be wʋn 'yɛr a anyãna, ka a Faraseemɩne nɩ a Mosesɩ Nɛɛ wiwiilbe kpãkpãana wʋ nɩ suur sʋrɔ nɩ wʋ 'yɛr yɔɔ. 54Na ba bʋɔrɔ ɩka wʋ 'yɛr 'yɛr lɩɛb nyɔɔ wʋ mɩ̃ɛ.

will be added

X\