Heburu 11

1Pʋ̃pãanyã, a sɔɔfʋ nyã vɛ̃ naa ka saa 'lɔɔrɔ gbɛr ɛ, yelmɩ̃ɛ jaa a bon 'lɔ 'yɔ̃ɔ sɩn tara a tɩɛr tɩ ba nyɛn nɩbir ɛ. 2A sɔɔfʋ nyã lɛ a kõr dẽme dɔ̃ɔ tara, ka a Nãaŋmɩn dãn ba. 3Sɔɔfʋ lɛ vɛ̃ a ba bɔ̃ɔ a par ɩka Nãaŋmɩn dɔ̃ɔ de a wʋ nɛɛ 'yɛrbie maal a tẽe, nɩ a saaju wʋ jaa, ka a bonsɩ sɩn ben nyɛrɛ, a ba ɩ a dɔ̃ɔ be be ka wʋ de maal ɛ. 4Sɔɔfʋ lɛ vɛ̃ ka a Abel bɔɔrlo bonsɩ wʋn de kʋ Nãaŋmɩn ɩ gar a Kain bɔɔrlo bonsɩ. Sɔɔfʋ lɛ vɛ̃ ka a Nãaŋmɩn dãn wʋ 'yɛr ɩka a wʋ yele tor naa, a sɔ̃ɔ 'lɔ a Nãaŋmɩn na dɔ̃ɔ 'yɛr a Abel kʋfʋsɩ nyã 'yɛr, wʋn sɔɔ kpi gba, tɩchɛ a sɔɔfʋ lɛ vɛ̃n ka wʋ chɛnɛ 'yɛrɛ. 5Sɔɔfʋ lɛ vɛ̃ ka Nãaŋmɩn wa de a Enok bʋ̃nɩbir. 'Lɔ ba kpi bɔ̃ɔ kũu ɛ, baa lɛ wa nyɛ wʋ jaa go ɛ, bojũu Nãaŋmɩn mɩ̃ɛ lɛ wa de wʋ. Bojũu sɛrɛ tɩchɛ ka wʋ wa chen, Nãaŋmɩn 'yɛr a ɩka a Enok yele nʋ̃mɔ̃ wʋ naa. 6Nɩrɛ ba wa tara sɔɔfʋ ɛ, an ɩn tuo wʋn na tʋ̃ɔ pɛl Nãaŋmɩn pʋɔ, bojũu nɩrɛ ɩ̃sʋɔ jaa wa waara a Nãaŋmɩn sɛ̃, wʋ sɔɔn ɩka wʋ ben be, na wʋ mɩ ma yara a bala na mʋ̃ɔ nɩbir bʋɔrɔ wʋ. 7Sɔɔfʋ lɛ vɛ̃ ka a Nowa tu a lɛ a Nãaŋmɩn na dɔ̃ɔ 'yɛr kʋ wʋ tɩ ba nyɛn nɩbir ɛ, tɩ na wʋ de dãbɩ̃ɛ maal a daka bulomtum faan a wʋ yir dẽme nɩ a wʋ mɩ̃ɛ. A wʋ sɔɔfʋ vɛ̃ naa ka wʋ 'yɛr nɛtuo 'yɔ̃ɔ a wɛr nɩbɛ ba jaa ban tɔr a Nãaŋmɩn 'yɛr jũu, tɩ na wʋ lɩɛb a yeltorsɩ bʋ̃dire a wʋ sɔɔfʋ jũu. 8Abraham sɔɔfʋ jũu, a sɔ̃ɔ 'lɔ a Nãaŋmɩn na dɔ̃ɔ bʋɔl wʋ ɩka wʋ yi chen a jie 'lɔ na wa ɩ a wʋ sofʋ daar kɔ̃ɔ, wʋ tu naa a Nãaŋmɩn nɛɛ na wʋ chen, wʋn gba na ba bɔ̃ɔ a jie wʋn chiine ɛ. 9Sɔɔfʋ vɛ̃ naa ka wʋ tɩ kpɩɛrɛ a nɛtɩraa tẽe 'lɔ pɔ ɩ sãan a be a paal 'lɔ pɔ. A gãma sɛɛr ala pɔ lɛ wʋ dɔ̃ɔ 'mataa kpɩɛrɛ nɩ a Isaakɩ nɩ a Jekɔb, na ba mɩ pʋɔ wʋ na wa so a jie 'lɔ a Nãaŋmɩn na tɩr a wʋ nɛɛ. 10Bojũu wʋ dɔ̃ɔ kaara niem ɩka wʋ nyɛ yir par ban sʋ̃ɔ, ka a Nãaŋmɩn mɩ̃ɛ ɩ a mɩmɩɛrɛ. 11Sɔɔfʋ lɛ vɛ̃ ka a Abraham na dɔ̃ɔ kor ɩ danyɔ̃ɔ, ka a wʋ pɔɔ Saara mɩ ab, tɩ ba chɛnɛ na dɔɔ bie. Wʋ tara na sɔɔfʋ nɩ a Nãaŋmɩn nɛɛ wʋn tɩr kʋ wʋ. 12Ka a dabʋ̃'yen nyã na kor bʋ̃tul ta kũu, tɩ wʋ 'yɔ̃ɔn par ka ba waa fɩka a ŋmɛrbie na be a saaju, na ba kaara man nɛɛ bire kaar fʋn kʋ̃ tʋ̃ɔ sɔr ɛ. 13A nɩbɛ banyãna sɔɔn Nãaŋmɩn tɩ tãn a sɔ̃ɔ 'lɔ ban kpi. Baa nyɛ a lɛ a Nãaŋmɩn na dɔ̃ɔ tɩr a nɛɛ kʋ ba ɛ, nɩdaa lɛ ba gbã nyãa tɩ sɔɔ de, na ba sɔɔ ɩka sãanba nɩ nɩyʋɔrsɩ lɛ ba ɩ ka a wɛr pɔ. 14A nɩbɛ banyãna na 'yɛr a anyãna, wiil ɩka ba kaara na bʋɔrɔ a tẽe 'lɔ na ɩ a ba mɩ̃ɛ tʋɔr. 15Ala ɩ ba dɔ̃ɔ tɩɛrɛ a paal 'lɔ ban yi, ban taa tʋ̃ɔn lɛ lɩɛb kul a be. 16Tɩ lɛ ba lɛ ɛ, ba dɔ̃ɔ tɩɛrɛ a paal 'lɔ na gar a be, na be a saaju. Ala lɛ so ka a vɩ̃ ba kʋrɔ wʋ wʋn ɩ a ba Nãaŋmɩn ɛ, bojũu wʋ chɔɔr a tẽe kʋ ba. 17Sɔɔfʋ vɛ̃ naa ka Abraham, a sɔ̃ɔ 'lɔ a Nãaŋmɩn na bɛɛr wʋ kaa ka wʋ sɔɔ de a wʋ bidaba Isaakɩ ka wʋ ɩ a bɔɔrlo bon a wʋn lon a bɔɔr. 'Lɔ lɛ dɔ̃ɔ sɔɔ de a lɛ a Nãaŋmɩn na tɩr a nɛɛ kʋ wʋ, tɩ na wʋ sɔɔ de a wʋ bidabʋ̃'yen tɛɛ nyã na lon a bɔɔr. 18Nãaŋmɩn gba na dɔ̃ɔ 'yɛr kʋ wʋ ɩka, "Isaakɩ lɛ na 'yɔ̃ɔ a fʋ par, lɛ ɩn tɩr a nɛɛ kʋ fʋ." 19Abraham tɩɛr bɔ̃ɔn ɩka Nãaŋmɩn na tʋ̃ɔn sɩ̃ɩ kũu, ka a nyɛtãan fɩka wʋ nyɛn a Isaakɩ na yi a kũu pɔ. 20Sɔɔfʋ vɛ̃ naa ka Isaakɩ 'yɛr nɛvɩla 'yɔ̃ɔ Jekɔb nɩ a Esau a ba nɩdaar kɔ̃ɔ yele. 21Sɔɔfʋ lɛ vɛ̃ ka a Jekɔb na ta a kũu, wʋ 'yɛr nɛvɩla 'yɔ̃ɔ a Josefʋ bibiir ba jaa tɩ na wʋ guun lan a wʋ dãgbal diiraa tɩ puor Nãaŋmɩn yãan. 22Sɔɔfʋ vɛ̃ naa ka a Josefʋ kũu na wa gbʋrɔ, tɩ wʋ 'yɛr kʋ a Isɩral nɩbɛ a Ijipitɩ tẽe pɔ yifʋ 'yɛr kʋ ba, na wʋ man ba a lɛ ban na ɩ nɩ a wʋ kɔbɔ. 23Sɔɔfʋ nyã vɛ̃ naa ka a sɔ̃ɔ 'lɔ ban dɔɔ a Mosesɩ a wʋ dɔɔrbɔ sɔɔl wʋn bar ŋmɛrsɩ ata. Bojũu ba nyɛn wʋn ɩ bivɩla, na baa joro a nãa binfʋ ɛ. 24Sɔɔfʋ nyã vɛ̃n a lɛ a Mosesɩ na wa nʋ̃ɔ, waa sɔɔ ka ba bʋɔlɔ wʋ a nãkpɛ̃ɛ Faaro bipɔɔ bie ɛ. 25Wʋ kãan ir ban na 'mataa gen wʋ nɩ a Nãaŋmɩn nɩbɛ gar wʋn na di a yelbier nʋ̃ɔ bɩ̃lãa tɛɛ. 26Wʋ nyɛn wʋn na di dɔɔyɛ a Kɩrɩsɩto jũu ka a tara tɔ̃nɔ̃ gar a Ijipitɩ tẽe pɔ nãbomo. Bojũu daar kɔ̃ɔ sãyar lɛ wʋ mʋ̃ɔ nɩbir kaara. 27Sɔɔfʋ vɛ̃ naa ka a Mosesɩ yi be a Ijipitɩ tẽe pɔ, tɩ ba joro a nãa suur ɛ. Wʋ tara na kãnyir, bojũu wʋ nyɛn a 'lɔ a nɩbir na maa nyɛ ɛ. 28Sɔɔfʋ lɛ wʋ de tun a lɛ a Nãaŋmɩn na 'yɛr a Gõl Bar Bɩbir 'yɛr, na wʋ dɔ̃ɔ 'yɔ̃ɔ ka ba bol a jɩ̃ɩ a ba dɔ̃dɔ̃ ɛ, ka a sɔ̃ɔfʋ 'lɔ na waara ba tʋ̃ɔ sɩɩr a Isɩral nɩbɛ bidadɔ̃n ɛ. 29Sɔɔfʋ vɛ̃ naa ka a Man Jɩɛ var lɩɛb sɔr, ka a Ijipitɩ dẽme mɩ na wa ta nyɛ a lɛ na ba kpɛ ka a man di ba jaa. 30Sɔɔfʋ lɛ vɛ̃ ka a Jeriko dachin kpɛ̃ɛ 'lɔ wʋ jaa gel lo, a lɛ a Isɩral nɩbɛ na wa gʋɔr a tẽe wʋ jaa a ber ayopõi tuor. 31Sɔɔfʋ lɛ dɔ̃ɔ faa a sɛ̃sɛ̃ pɔɔ 'lɔ ban bʋɔlɔ a Worahab, bojũu wʋ dɔ̃ɔ sɔɔ de a bala ban tʋ̃ ɩka ba tɩ jʋʋr a tẽe kaa. Waa dɔ̃ɔ pʋɔ a bawõnsɩ pɔ kpi ɛ. 32N lɛ man bo go? N ba tara jaa na man lɛ a Gɩdɩyɔn nɩ Barakɩ nɩ Samson nɩ Jefeta nɩ a Nãa David nɩ Samuwɛl nɩ a lɛ a Nãaŋmɩn 'yɛ'yɛrbɛ na tʋ̃ 'yɛr ɛ, 33bala lɛ de sɔɔfʋ jɛb na ba tʋ̃ɔn nãmɩne, tɩ maal a lɛ na sɛɛ, nyɛn a lɛ a Nãaŋmɩn na tɩr a nɛɛ. Bala lɛ mɩ dɔ̃ɔ kpal a jubɛrɛ nɛɛr, 34na ba kpĩin a bũu dagel, tɩ na ba jo faa a ba mɩ̃ɛ a sɔbɛrɛ ala ban taa kʋn ba. Bala lɛ dɔ̃ɔ ɩ a nɩbaalsɩ, na ba lɩɛb nɩkpɩ̃ɛn, na ba lɩɛb gãdaar a jɛɛr pɔ tʋ̃ɔ a ba dɔ̃dẽme. 35Pɔbɔ mɩ lɛ nyɛn a ba nɩbɛ na dɔ̃ɔ kpi tɩ lɛ lɩɛb ir ɩ vʋɛ. Ba gen bamɩne putuger. Bala ta sɔɔ, ba kʋ̃ naa ge ba ɛ, tɩ ba tɔr tɩ chɛnɛ ara a ba sɔɔfʋ bʋɔrɔ ɩka ba wa nyɛ a kũu 'lɔ pɔ irfʋ na ɩ gar a nyã. 36Ba lan bamɩne na ba fɔb ba, tɩ lũn bamɩne mɩ nɩ bɔ̃jɔrsɩ tɩ 'yɔ̃ɔ pɔɔfʋ die pɔ. 37Ba lɔb bamɩne nɩ kusɩbɛ kʋ, tɩ ma chɛ bamɩne mɩ var a yi, tɩ kʋn bamɩne mɩ naa sʋɔ. Piir gãma nɩ bʋʋr gãkpoor lɛ bamɩne mɩ ma dɔ̃ɔ su yʋɔrɔ nɩ na ba ɩ nɔ̃n dẽme, ka ba tara ba gere tɩ sɩlɛ ba a pɔrɔ jaa a lɛ nɛ. 38Ka a wɛr nyã ba ta sɛɛ ɩka wʋ tara a nɩbɛ banyãna ɛ, ka ba bãra yʋɔrɔ be a mɔgɔ̃ɔ pɔ nɩ a tɔ̃n jur, kpɩɛrɛ a tɔ̃n bɔɔr pɔ nɩ a tũlotuursɩ bɔɔr ala ban ya a tẽe. 39A nɩbɛ banyãna ba jaa nyɛn dãasɩvɩla a ba sɔɔfʋ jũu, tɩchɛ a bonsɩ ala a Nãaŋmɩn na dɔ̃ɔ tɩr a nɛɛ ba ɩ̃sʋɔ jaa ba nyãa ɛ. 40Nãaŋmɩn guor yelvɩɛl na gar a anyã na wʋ gun sɩ, ka wʋ na de sɩ 'matãan ba maal yele a jaa ka a jɩ̃taa.

will be added

X\