Tʋ̃mɔ̃ 7

1Be lɛ ka a Juu nɩbɛ bɔɔrlo nɩkpɛ̃ɛ sʋʋr wʋ, "Sɩrɛ lɛ a anyãna ban 'yɛr bɩɩ?" 2Ka a Sɩteven haa 'yɛr, "Yɛɛr nɩ sãamɩne, yɩ chɛlɛ. A Nãaŋmɩn tɩɩr sʋɔ dɔ̃ɔ yi a sɩ sãa Abraham lɛ wʋn dɔ̃ɔ chɛnɛ be a Mesopotamiya wɛr pɔ sɛrɛ tɩ wa chen a Haran. 3A Nãaŋmɩn 'yɛr kʋ wʋ, 'Yi a fʋ tẽe na fʋ bar a fʋ nɩbɛ tɩ na fʋ chen wɛr yuo pɔ ɩn na wiil fʋ.' 4"A wʋ yi a Chaldea wɛr pɔ na wʋ chen tɩ jɩ̃nɛ a Haran wɛr pɔ. A wʋ sãa na wa kpi baar lɛ a Nãaŋmɩn waan wʋ a kana yɩn ben kpɩɛrɛ. 5Nãaŋmɩn ba kʋ wʋ bon jaa a kana ɛ, waa kʋ wʋ jibile jaa gba ɛ, bɩɩ gbɛr nɛfʋ jie ɛ. Tɩchɛ Nãaŋmɩn tɩr nɛɛ kʋ wʋ ɩka 'lɔ nɩ a wʋ yɔn lɛ na so a jie, tɩ waa tara bie gba ɛ. 6Nɩtɔ̃ lɛ a Nãaŋmɩn 'yɛr kʋ a Abraham, 'A fʋ yɔn na ɩ naa sãanba paal sãan pɔ, na ba ɩ gbãgbaar ka ba ge ba yuom kɔɔr anaar (400). 7Tɩchɛ Nãaŋmɩn 'yɛr naa, ɩka wʋn yaa naa a sãn a paal 'lɔ na maal ba a gbãgbaar. A anyã puor lɛ ban wa puor ma a jie nyãna.' 8Nãaŋmɩn tɩr nɛɛ kʋ a Abraham a yʋɔr ŋmaafʋ yele. Abraham na wa dɔɔ a Isaakɩ, wʋ ŋmaa wʋn a yʋɔr a ber aniin daar. Ka a Isaakɩ mɩ dɔɔ a Jekɔb, ka a Jekɔb mɩ dɔɔ a sɩ sãamɩne pie nɩ ayi. 9"A sɩ sãamɩne banyãna na tara nɩ a ba yɛbile Josefʋ nɩ nyuur jũu, na ba nyɔɔ wʋ da kʋ a Ijipitɩ dẽme. Tɩchɛ ka a Nãaŋmɩn be a wʋ sɛ̃. 10Na wʋ faa wʋ yin a wʋ wõm a jaa pɔ. Wʋ kʋ naa a Josefʋ yɛ̃ na wʋ sʋ̃ʋ wʋ a wʋ nyɛ 'yɔ̃ɔfʋ a Faaro na ɩ a Ijipitɩ nãa niem, na wʋ maal wʋ ka wʋ ɩ a Ijipitɩ nɩ a nãa jie wʋ jaa nɩkpɛ̃ɛ. 11"Ka a kɔ̃ lo Ijipitɩ nɩ a Kanaan wɛr wʋ jaa waan dɔɔyɛ, ka a sɩ sãamɩne ba nyɛrɛ bʋ̃diir ɛ. 12Jekɔb na wa wõ ɩka bʋ̃diir ben a be Ijipitɩ, wʋ tʋ̃n a sɩ sãamɩne ka ba chen. 13A gbɛɛ ayi sʋɔ ban chen lɛ a Josefʋ wiil a wʋ mɩ̃ɛ kʋ ba, ka a Faaro mɩ pãa bɔ̃ɔ a Josefʋ yir nɩbɛ. 14A anyã puor lɛ a Josefʋ tʋ̃ bʋɔl a wʋ sãa Jekɔb nɩ a wʋ yir dẽme, a ba jaa ɩ nɩbɛ lɩjaata nɩ pie nɩ anũu (75). 15Jekɔb chen a be a Ijipitɩ nɩ a sɩ sãamɩne be lɛ ba jaa tɩ kpi. 16Ba tuo naa a ba ɩ̃gãma waan a Sekem wa ũu ba a yaa 'lɔ pɔ a Abraham na da a Hamor bibiir sɛ̃ a be a Sekem. 17"A sɔ̃ɔ na wa gbʋr ka a Nãaŋmɩn na maal a lɛ wʋn tɩr a nɛɛ kʋ a Abraham, a sɩ nɩbɛ na be a Ijipitɩ dɔɔn paal. 18Ala lɛ ka a nãyuo wa di na wʋ kaara a Ijipitɩ na waa bɔ̃ɔ a Josefʋ yele ɛ. 19Wʋ maal naa a sɩ nɩbɛ putuyele na wʋ ge ba, na wʋ ma fɩr a pɔɔ pʋʋr ka bala wa dɔɔ bipɩlɛ ba lɔb ba 'yɔ̃ɔ a kʋ̃ɔ pɔ a ba kpi. 20"A sɔ̃ɔ nyãna lɛ ba dɔɔ a Mosesɩ, ka wʋ ɩ bivɩla a Nãaŋmɩn niem. A ba guol wʋ ŋmɛrsɩ ata be a wʋ sãa yir. 21Ban wa yin wʋ tɩ bar a yõo, Faaro bipɔɔ de wʋn guol ka wʋ ɩ a wʋ mɩ̃ɛ bidaba. 22Ba jãn naa Mosesɩ a Ijipitɩ tẽe yɛ̃ a jaa, ka wʋ kpɛ̃mɛ a wʋ 'yɛr nɩ a wʋ tʋ̃mɔ̃ pɔ. 23"A lɛ a Mosesɩ na wa ta yuom lɩjaayi (40), wʋ tɩɛr naa a wʋ yɛɛr Isɩral nɩbɛ na wʋ ɩka wʋ chen tɩ piir ba kaa. 24Wʋ tɩ nyɛn a ba ɩ̃sʋɔ a Ijipitɩ nɩrɛ ɩ̃sʋɔ na gere ka wʋ ŋmaa de na wʋ kʋ a Ijipitɩ nɩrɛ 'lɔ. 25Mosesɩ tɩɛr lɛ ɩka a wʋ mɩ̃ɛ nɩbɛ na bɔ̃ɔn naa ɩka 'lɔ lɛ a Nãaŋmɩn na de faan ba, tɩchɛ baa tɩɛrtɔ a lɛ ɛ. 26A wɛr na wa chaar, wʋ tɩ nyɛn a Isɩral nɩbɛ ayi mɩ na jɛɛrɛ taa. Ka wʋ 'maal ba tɩ sʋrɔ ba, 'Yɩn yɛɛr nara, bo lɛ so a yɩ jɛɛrɛ taa?' 27Tɩchɛ a 'lɔ sʋɔ na tʋ̃ɔ a wʋ tɔ sʋɔ daan a Mosesɩ bar tɩ sʋʋr wʋ, 'An tʋ̃ fʋ ɩka fʋ wa kaara sɩ na fʋ tɔɔrɔ a sɩ 'yɛr? 28Fʋ bʋɔrɔ naa ɩka fʋ mɩ kʋ ma nɩtãa lɛ fʋn kʋ a Ijipitɩ nɩrɛ a jãa wɛ?' 29Mosesɩ na wõ a 'yɛr nyãna ka wʋ jo chen tɩ kpɩɛrɛ a Midiyan, be lɛ wʋ be na wʋ wa dɔɔ dabil ayi. 30"Yuom lɩjaayi (40) na wa po, malaka wa lɩɛb bũu lɩrɛ tɩbile pɔ, na wʋ dũu a Mosesɩ be a mɔgɔ̃ɔ pɔ na gbʋr a Sinai tɔ̃ɔ par. 31Wʋn wa nyɛ a lɛ ka a nɛ'maa wʋ, a wʋ tɔɔ gbʋr ɩka wʋ kaa. Be lɛ wʋ wõ a Soro kɔkɔr na 'yɛr, 32''Maa lɛ ɩ a fʋ sãamɩne Nãaŋmɩn, Abraham, Isaakɩ nɩ a Jekɔb Nãaŋmɩn.' Ka a dãbɩ̃ɛ kpɛ a Mosesɩ waa lɛ 'lara na kaa ɛ. 33"Ka a sɩ Soro pãa 'yɛr kʋ wʋ, 'Yaa a fʋ nafɔɔr bar, a jie fʋn ara ɩ naa jichɛchɛ. 34N nyɛ naa a n nɩbɛ be a Ijipitɩ pɔ ban gere, n wõ naa ba hʋ̃ʋnfʋ naa suu ɩka n wa faa ba. Wa, ka n tʋ̃ fʋ a be a Ijipitɩ.' 35"A Mosesɩ nyãna nɩ wʋ ju ban tɔr bar tɩ sʋʋr wʋ, 'An lɛ 'yɔ̃ɔ fʋ ɩka fʋ kaara sɩ na fʋ tɔɔrɔ a sɩ 'yɛr?' 'Lɔ lɛ a Nãaŋmɩn mɩ̃ɛ tʋ̃ a sɔ̃ɔ 'lɔ a malaka na wa dũu wʋ 'lɩrɛ a bũu a tɩbile pɔ, ɩka wʋ tɩ ɩ a ba nɩkpɛ̃ɛ nɩ a ba fafaara. 36'Lɔ lɛ tɩ de ba nie na wʋ tʋ̃ tʋ̃ yɔɔ be a Ijipitɩ tẽe pɔ, nɩ a Man Jɩɛ par nɩ a mɔgɔ̃ɔ pɔ ban be a yuom lɩjaayi (40). 37A Mosesɩ nyãna nɩ wʋ ju lɛ 'yɛr kʋ a Isɩral nɩbɛ ɩka, 'Nãaŋmɩn na tʋ̃ naa a 'yɛ'yɛrɛ ɩ̃sʋɔ a maa kaar ka wʋ yi a yɩ mɩ̃ɛ nɩbɛ pɔ.' 38Wʋ dɔ̃ɔ pʋɔ a nɩyɔɔ bala pɔ be a mɔgɔ̃ɔ pɔ, 'matãan a sɩ sãakpãmɩne ka a malaka 'yɛr 'yɛr kʋ wʋ be a Sinai Tɔ̃ɔ par na ɩ nyɛvʋr 'yɛr ka wʋ 'yɛr kʋ sɩ. 39"Tɩchɛ a sɩ sãakpãmɩne tɔr wʋ naa, na baa tu a wʋ nɛɛ ɛ. Ba tɔr wʋn bar ka a ba tɩɛr lɩɛb chen be a Ijipitɩ. 40Ba 'yɛr kʋ a Aaron, 'Maal ŋmɩmɛ kʋ sɩ ka a ma de sɩ nie, a Mosesɩ 'lɔ̃nɔ̃ na yin sɩ a Ijipitɩ saa bɔ̃ɔ bo nɩ tara wʋ ɛ.' 41A ba mɛ bʋtɩɩ a daar 'lɔ̃nɔ̃ ka wʋ nyɛtãan nele, na ba waan bomo wa lon bɔɔr a jie na ba dɩ̃ɛn 'yɔ̃ɔn a ba nũu bʋ̃maalaa nyãna. 42Tɩchɛ ka a Nãaŋmɩn lɩɛb puor 'yɔ̃ɔ ba, na wʋ bar ba ka ba puoro a saaju bomo. Ka anyãna tɩ tuor a lɛ a Nãaŋmɩn 'yɛ'yɛrɛ ɩ̃sʋɔ na dɔ̃ɔ sɛb, wʋ sʋʋr naa, 'A yɩn Isɩral nɩbɛ, yɩn be a mɔgɔ̃ɔ pɔ a yuom lɩjaayi (40) na yɩ dɔ̃ɔ waan a bɔɔrlo bomo maa lɛ yɩ wa kʋ bɩɩ? 43Kai, tɩ a bʋtɩbɛ ala yɩn kaara lɛ a Molokɩ nɩ ŋmɛrbir ŋmɩn Arefan, a tɩbɛ anyãna lɛ yɩ dɔ̃ɔ maal puoro. A lɛ jũu, ɩn vɛ̃ naa ka ba nyɔɔr yɩ chiin a Babilon puor ka yɩ tɩ kpɩɛrɛ a be.' 44"A sɩ sãakpãmɩne dɔ̃ɔ maal gãma yir be a mɔgɔ̃ɔ pɔ ka a ɩ dãasɩɛ, ba maal wʋ naa nɩtãa lɛ a Nãaŋmɩn na man wiil a Mosesɩ ka wʋ nyɛ. 45A gãma yir nyã lɛ a sɩ sãakpãmɩne tara ka a Josua de ba a nie ka ba waan, a ba wa faa a wɛr nyã pɔ a nɩyor na dɔ̃ɔ kpɩɛrɛ ka a Nãaŋmɩn dii ba bar. A gãn yir nyã ben be lɛ̃ɛɛ tɩ tãn a Nãa David sɔ̃ɔ. 46Nãaŋmɩn maal vɩla kʋ wʋ ka wʋ ɩka wʋn mɛn yir kʋ a Jekɔb Nãaŋmɩn. 47Tɩchɛ Solomon lɛ wa mɛ a yir kʋ a Nãaŋmɩn. 48"Fʋ̃ʋ kaa, a Nãaŋmɩn nyã na ɩ a saaju sʋɔ, ba kpɩɛrɛ a yie anyã nɩbɛ na mɛ ɛ. Nɩtãa lɛ a Nãaŋmɩn 'yɛ'yɛrɛ ɩ̃sʋɔ na dɔ̃ɔ 'yɛr, 49'Saaju lɛ ɩ a maa nakɔɔ, ka a tẽe ɩ a n gbɛɛ dɔɔlfʋ jie. Ka a sɩ Soro sʋʋr, yir bo tɔ lɛ yɩn mɛ kʋ ma? Bɩɩ nyɩnɛ lɛ na ɩ a n pɛ̃nfʋ jie? 50A ba ɩ a maa nũu lɛ maal anyãna a jaa ɛ?' 51"Yɩn nyãkpɩ̃ɛn dẽme na ɩ nɩbɛ na ba wõnõ 'yɛr ɛ, yɩ kaara a yɩ sãamɩne kaar. Yɩ maa sɔɔ kʋ a Nãaŋmɩn Sɩɛ sɔr ɛ. 52Nãaŋmɩn 'yɛ'yɛrɛ jaa ba be be ka a yɩ sãamɩne ba ge wʋ ɛ. Ba gba kʋ naa bala na de nie mʋɔl 'yɛr a Torfʋ Sʋɔ 'lɔ waa 'yɛr. A pʋ̃pãanyã, yɩn gba lɛ gar 'yɔ̃ɔ wʋ na yɩ kʋ wʋ. 53Yɩn lɛ de a Nãaŋmɩn nɛɛ wʋn kʋ a malaka a wʋ wa kʋ yɩ ka yɩ de tʋ̃nɔ̃ nɩ, tɩchɛ a yɩ tɔr bar." 54A 'yɛr nyãna ban wa wõ, ka ba suur ir a ba kpar kparaa jur 'yɔ̃ɔnɔ̃ wʋ. 55Tɩchɛ a Sɩteven a Nãaŋmɩn Sɩɛ na sɛɛ a wʋ dʋl kaa saaju na wʋ nyɛ a Nãaŋmɩn tɩɩr, ka a Yesu ara a Nãaŋmɩn nũsʋ̃ɔ jie. 56Ka wʋ 'yɛr, "Yɩ nyɛ ka, n nyɛ naa saaju na yuo ka a Nɩsaal Bie ara a Nãaŋmɩn nũsʋ̃ɔ jie." 57A anyãna ban wõ ba pɔɔn a tobo tɩ ŋme chɛlma na ba tɩ mɩl wʋ, 58na ba tɔɔ wʋ yin a tẽe chɛ̃chɛ̃ɛ tɩ piel lɔɔrɔ wʋ nɩ kʋsɩbɛ. Ka a bala na di dãasɩɛ yaar a ba fuusɩ bin pɔlbile kɔ̃ɔ ban bʋɔlɔ Sɔɔl sɛ̃. 59Ban lɔɔrɔ wʋ a lɛ nɛ na kʋ ka wʋ sʋɔr Yesu, "N Soro Yesu de a n sɩ̃ɛ." 60Wʋ lon gbur dumo tɩ pãa ŋme chɛlma 'yɛr, "N Soro taa ɩrɛ wa yaara ba sãn ɛ." A anyãna lɛ wʋ 'yɛr baar tɩ ŋmaa vʋʋr.

will be added

X\