1 Ka a daba ɩ̃sʋɔ na be be di Ananias ka a wʋ pɔɔ mɩ di Safira. Ba mɩ den a ba pobile da. 2 Wʋ ir naa libie amɩne bin ka a pɔɔ bɔ̃ɔn, tɩchɛ na wʋ chiin a ŋmaa tɩ bin a nɩtʋ̃nsɩ sɛ̃. 3 Ka a Pita sʋʋr a Ananias, "Bo lɛ so ka a Satan sɛɛ fʋ a nyãa a fʋ ŋmaa jir kara yɔ̃ɔ a Nãaŋmɩn Sɩɛ, na fʋ ir a libie amɩne a lɛ fʋn da a puo bin? 4 A ba ɩ fʋ̃ʋ lɛ so na fʋ de da ɛ? Fʋn wa da baar a ba ɩ fʋ̃ʋ lɛ so a libie ɛ? Bo lɛ ɩ a fʋ tɩɛr a fʋ maal a nɩtɔ̃? Nɩrɛ ba lɛ fʋ ŋmaa a jir nyã 'yɔ̃ɔ ɛ, tɩchɛ Nãaŋmɩn lɛ." 5 Ananias na wõ a nɩtɔ̃nɔ̃ na wʋ lo kpi a jie. Ka a dãbɩ̃ɛ kpɛ a bala jaa na wõ naa. 6 Ka a pɔlbil ir a ba pɔ 'mɔɔ a kũu lũ tuo yin tɩ ũu. 7 An wa kor bɩ̃lãa ka a wʋ pɔɔ mɩ wa bʋ̃n dɔɔl ba bɔ̃ɔ a lɛ na ɩ ɛ, 8 ka a Pita sʋʋr a pɔɔ, "A libie a jaa lɛ a anyãna a fʋ̃ʋ nɩ a Ananias na da a puo nyɛ ɔ? 'Yɛr kʋ ma." A wʋ 'yɛr, "Ɔ̃ɔ, lɛ lɛ." 9 A Pita 'yɛr kʋ wʋ, "Ŋmɩnɛ lɛ a ɩ a yɩ guor taa ɩka yɩ bɛɛr a sɩ Soro Sɩɛ kaa? Nyɛ a nɩbɛ bala a dɔ̃dɔr nɛɛ bala lɛ tuo a fʋ sɩrɛ yin tɩ ũu, ba mɩn tuo fʋn yin." 10 Ajienaa ka a ɩ wʋ mɩ lon kpi be a Pita niem. A pɔlbil bala na ben wa kpɛ nyɛ ka a ɩ wʋ kpi naa, ka ba tuo wʋ yin tɩ ũu lan a sɩrɛ. 11 Ka a dãbɩ̃ɛ kpɛ a pupuorbiir ba jaa nɩ nɩrɛ jaa na wõ naa. 12 A nɩtʋ̃nsɩ tʋ̃n nɛ'maa tʋ̃ yɔɔ a nɩbɛ sɔ̃ɔ. Ka a bala na sɔɔ de, ba jaa tara na nɛbʋ̃'yen ma lɔ̃ɔ taa a be a Solomon Bɛchaar pɔ. 13 Nɩrɛ jaa kpire ba naa, tɩ ɩ̃sʋɔ jaa maa 'la lɔ̃ɔn ba ɛ. 14 Tɩchɛ nɩyɔɔ jaa chɛnɛ na waara, ka dɔɔr nɩ pɔbɔ na sɔɔ de a sɩ Soro pʋɔrɔ 'yɔ̃ɔnɔ̃. 15 A lɛ vɛ̃ naa ka a nɩbɛ yin a ba baalsɩ tɩ gaal ba a gador ju nɩ a sɔ̃n pɔ a sɔr kõkoor chɛlɛ nɩ a Pita, ɩka 'lɔ wa tala a wʋ gãagiel wʋ pɔɔ ba. 16 Nɩyɔɔ yin a tẽbil ala na jilʋ̃ a Jerusalɛm waan a ba baalsɩ wa lɔ̃ɔn 'matãan a bala a sɩdɛbɛ na tara, ka ba jaa sa. 17 Ka a nyuur kpɛ a Juu nɩbɛ bɔɔrlo nɩkpɛ̃ɛ nɩ a wʋ taaba bala na pʋɔ a Saduseemɩne gbul pɔ. 18 A ba nyɔɔr a nɩtʋ̃nsɩ 'yɔ̃ɔ pɔɔfʋ die pɔ bar. 19 Tɩchɛ a tɩ̃sɔɔ a sɩ Soro tʋ̃ naa a wʋ malaka ka wʋ wa yuo a pɔɔfʋ die pãn na wʋ tɔɔ ba yin 20 tɩ 'yɛr, "Yɩ chen a Nãaŋmɩn puorfʋ yir bɛchaar pɔ na yɩ tɩ 'yɛr a nyɛvʋr paalaa nyã 'yɛr kʋ a nɩbɛ." 21 A wɛr na wa chaar ba kpɛ̃n be a Nãaŋmɩn puorfʋ yir bɛchaar pɔ, nɩtãa lɛ a malaka na 'yɛr ba tɩ piel wile a nɩbɛ. A Juu nɩbɛ bɔɔrlo nɩkpɛ̃ɛ nɩ a wʋ taaba mɩ wa lɔ̃ɔn taa na ba bʋɔl a Juu nɩbɛ nɩdierbe ba jaa lɔ̃ɔ taa na ba na guor a 'yɛr, na ba pãa tʋ̃ ɩka ba chen a pɔɔfʋ die pɔ tɩ yuo a nɩtʋ̃nsɩ waan. 22 Tɩchɛ ban wa tɩ ta a pɔɔfʋ die pɔ baa nyɛ nɩrɛ jaa ɛ. A ba lɩɛb chen tɩ mana kʋrɔ ba, 23 "Sɩ chen tɩ nyɛ a pɔɔfʋ die dɔ̃dɔr na chɛnɛ kpal, ka a nɩrɛ 'lɔ na ara gu chɛnɛ ara a dɔ̃dɔr nɛɛ, tɩchɛ sɩn wa yuo a pãn nɩrɛ jaa ba be be a die pɔ ɛ." 24 Ban wa wõ a anyãna ban man ka a Nãaŋmɩn puorfʋ yir guguro nɩkpɛ̃ɛ nɩ a Juu nɩbɛ bɔɔrlo nãmɩne ka a ɩ ba chĩcham, a ba baala baa bɔ̃ɔ lɛn na ɩ ɛ. 25 Ka a nɩrɛ ɩ̃sʋɔ wa 'yɛr kʋ ba, "Yɩ nyɛ a nɩbɛ bala yɩn nyɔɔr pɔɔ, ba ben be a Nãaŋmɩn puorfʋ yir bɛchaar pɔ wile a nɩbɛ." 26 Ka a Nãaŋmɩn puorfʋ yir guguro nɩkpɛ̃ɛ tara a wʋ tʋ̃tʋ̃nbɔ chiin tɩ tara a nɩtʋ̃nsɩ jaa jom waan. Baa tɩ fɩr ba ɛ, bojũu ba joro na dãbɩ̃ɛ ɩka a nɩbɛ na lɔb ban nɩ kʋsɩbɛ. 27 Ban wa waan ba, ba vɛ̃n ka ba ara a nɩbɛrɛ niem, ka a Juu nɩbɛ bɔɔrlo nɩkpɛ̃ɛ na sʋʋr ba 'yɛr, 28 "Saa kpãkpãan yɩ jaa 'yɛr ɩka, yɩ taa lɛ ɩrɛ wa pʋrɔ a yuor nyãna wile nɩ nɩrɛ jaa go ɛ? Tɩchɛ a yɩ chɛnɛ tɔr tɩ sɛɛ a Jerusalɛm nɩ a yɩ wiilfʋ nyãna, na yɩ bʋɔrɔ ɩka yɩ de a daba nyãna jɩ̃ɩ yele dɔɔl sɩ." 29 Ka a Pita nɩ a nɩtʋ̃nsɩ bala na chɛ 'yɛr, "Sɩn tun Nãaŋmɩn nɛɛ gar nɩsaal. 30 A sɩ sãakpãmɩne Nãaŋmɩn lɛ sɩ̃ɩ a Yesu a kũu pɔ, a 'lɔ yɩn yɔɔl a daa ju ka wʋ kpi. 31 Nãaŋmɩn 'mɔɔ wʋn don bin be a wʋ nũsʋ̃ɔ jie, ka wʋ ɩ Nãa nɩ Fafaara ɩka wʋ kʋ a Isɩral nɩbɛ sɔr ka ba lɩɛb ba tɩɛr, na ba nyɛ vɛ̃ kʋfʋ. 32 Sɩn lɛ ɩ a anyãna dãasɩɛ dẽme nɩ a Nãaŋmɩn Sɩɛ 'lɔ wʋn de kʋ a bala na tu a wʋ nɛɛ." 33 Ban wa wõ a anyãna, ba suur ir naa ka ba bʋɔrɔ a ba kʋfʋ. 34 Tɩchɛ ka a Farasee ɩ̃sʋɔ ban bʋɔlɔ Gamaliel na ɩ a Mosesɩ Nɛɛ wiwile, nɩrɛ jaa 'yɔ̃ɔnɔ̃ wʋ naa, ka wʋ ir ara a nɩdierbe pɔ tɩ 'yɛr ɩka, ba vɛ̃ ka a dɔɔr bala yi yõo bɩ̃lãa. 35 Tɩ na wʋ pãa 'yɛr kʋ ba, "Isɩral dɔɔr, yɩ bɔ̃ɔnɔ̃ sʋ̃ a lɛ yɩn bʋɔrɔ ɩka yɩ maal a nɩbɛ banyãna. 36 Sɔ̃ɔ kɔ̃ɔ lɛ a Tiudasɩ dɔ̃ɔ ir 'yɛr gãdaa 'yɛr ɩka nɩkpɛ̃ɛ lɛ wʋ ɩ ka a dɔɔr kɔɔr anaar (400) ir turo wʋ. Ba kʋ wʋ naa ka a nɩbɛ bala yɛ̃yɛl ka a jaa ɩ pɔrɔ. 37 Ala puor lɛ ka a Judas na yi a Galilee a nɩbɛ sɔrfʋ yuon ir nɩyɔɔ ka ba turo wʋ. Ba mɩ kʋ wʋ naa ka a bala jaa na turo wʋ mɩ bũbur. 38 A lɛ jũu, maa na 'yɛr yɩ naa ɩka yɩ ir nũu, tɩchɛ a nɩbɛ ba nyã bar. Yɩ bar ba a ba chiine. Ala ɩ a lɛ ban maala ɩn nɩrɛ lɛ bin an ɩn pɔrɔ. 39 Tɩchɛ ala ɩ Nãaŋmɩn sɛ̃ lɛ a yi, yaa be jaa na wa tʋ̃ɔ ŋmaa a nɩbɛ banyãna sɔr ɛ, yɩn wa bɔ̃ɔn naa ka a ɩ Nãaŋmɩn mɩ̃ɛ lɛ yɩ jɛɛrɛ nɩ." 40 A nɩbɛrɛ tu naa a lɛ a Gamaliel na 'yɛr, tɩ na ba bʋɔl a nɩtʋ̃nsɩ fɔb ba tɩ kpãkpãan ba ɩka ba taa lɛ ɩrɛ wa 'yɛrɛ 'yɛr pʋrɔ nɩ a Yesu yuor go ɛ, tɩ bar ba a ba chen. 41 A nɩtʋ̃nsɩ na wa yi a nɩbɛrɛ banyãna niem, ba chɩlɛ naa, bojũu ba sɛɛn naa a dɔɔyɛ nɩ a vɩ̃ difʋ a Yesu yuor jũu. 42 Bɩbir jaa lɛ ba ma be a be a Nãaŋmɩn puorfʋ yir bɛchaar pɔ wile a nɩbɛ na ba mɩ yʋɔrɔ a yie ba gala ɛ, na ba wile a nɩbɛ tɩ 'yɛrɛ a 'yɛr nʋ̃ɔ ɩka a Yesu lɛ ɩ a Nɩ-iraa.
