1 Timoti 6

1Bala jaa na be a gbãgbaar tʋ̃mɔ̃ pɔ, ba 'yɔ̃ɔnɔ̃ a bala na tʋ̃ɔ ba, ka nɩrɛ kʋ̃ tʋ̃ɔ 'yɛr a Nãaŋmɩn yuor 'yɛrdɛɛr ɛ, nɩ a sɩ wiilfʋ ɛ. 2A gbãgbaar bala na tara a nɩbɛrɛ a ba ɩ Yesu turbo, ba ta vɛ̃ ba 'yɔ̃ɔfʋ ɛ, ban 'mataa puoro jũu ɛ, ba ir nyãa 'yɔ̃ɔ tʋ̃nɔ̃ kʋrɔ ba, bojũu ba puoro naa ka ba nʋ̃ ba. Wile a anyãna na fʋ kpãkpãana ba. 3Ala ɩ nɩrɛ wiil wiil yor na ba tu a sɩ Soro Yesu Kɩrɩsɩto wiilfʋ ɛ, nɩ lɛ a Nãaŋmɩn 'yɛrbie na 'yɛr ɛ, 4a nɩbɛ nyã wile na wʋ mɩ̃ɛ, na waa bɔ̃ɔ bon jaa ɛ. Wʋ ma chɩrɛ na nɩ a 'yɛrbie, bojũu a nyɛntãan fɩka a wʋ tɩɛr sɔ̃ɔ naa. A lɛ vɛ̃ naa ka wʋ tara nyuur na wʋ ma jɛɛrɛ, na wʋ ma tʋrɔ a wʋ taaba, na wʋ ma tara tɩɛr dɛɛr nɩ a wʋ taaba. 5Na ba pãa ma chɩrɛ taa nɩ tɩɛr sɔ̃ɔnsɩ. Baa bɔ̃ɔ a yelmɩ̃ɛ ɛ, na ba tɩɛr ɩka a Nãaŋmɩn puorfʋ ɩn lefʋ yele lɛ. 6Tɩchɛ Nãaŋmɩn sɔr tufʋ ɩn lefʋ bon, ala ɩ a ala fʋn tara sɛɛn fʋ naa. 7Bojũu saa waan bon jaa a wɛr nyã pɔ ɛ, na sɩ kʋ̃ lɛ de bon jaa yin a wɛr pɔ ɛ. 8A lɛ jũu, ala ɩ sɩ tara na bʋ̃diir nɩ bʋ̃sursɩ, sɩ vɛ̃ ka a sɛɛn sɩ. 9A bala na bʋɔrɔ ɩka ba ɩ tara dẽme, ma lon bɛɛr kaa chɛbaa pɔ, ka jɔl tɩɛr nɩ vɔldɛbɛ ma tɔɔ a nɩbɛ chiine sɔ̃ɔfʋ nɩ a wɛfʋ jie. 10Bojũu libie nʋ̃fʋ ɩ naa yelbier jaa bʋrɔ nyɩɩr, ka a bamɩne na bʋɔrɔ ɩka ba le, ba tɔɔn jãan a yelmɩ̃ɛ, na ba kpɛ wõm pɔ. 11Tɩchɛ a fʋ̃ʋ 'lɔ na ɩ Nãaŋmɩn nɩrɛ, tɔɔ yi a anyãna a jaa pɔ, na fʋ turo yeltorsɩ, na fʋ ɩ Nãaŋmɩn nɩrɛ, tara sɔɔfʋ na fʋ tara nʋ̃fʋ, na fʋ tara kãnyir, na fʋ ɩ nɩ hɛ lɛ lɛ lɛ. 12Jɛb a sɔɔfʋ jɛɛr na fʋ nyɔɔ a nyɛvʋr na ba tara baarfʋ taa lɛɛ. 'Lɔ pɔ lɛ a Nãaŋmɩn bʋɔl fʋ a daar 'lɔ̃nɔ̃ fʋn chiir a fʋ pʋɔ a nɩyɔɔ niem. 13N kpãkpãana fʋ naa a Nãaŋmɩn nyã na kʋrɔ a bonsɩ a jaa nyɛvʋr niem, nɩ a Yesu Kɩrɩsɩto na 'yɛr a wʋ yelmɩ̃ɛ na wʋ chiir a wʋ pʋɔ a nãa Pontius Pilate niem, 14n kpãkpãana fʋ naa ɩka fʋ bɔ̃ɔ tara a Nãaŋmɩn nɛbinsɩ ka a ta tara dɛɛr, bɩɩ 'mabfʋ ɛ, tɩ tãn a sɩ Soro Yesu Kɩrɩsɩto waa daar. 15'Lɔ lɛ a Nãaŋmɩn na waan a sɔ̃ɔ 'lɔ wʋn 'yɔ̃ɔ. Nãaŋmɩn tɛɛ lɛ sɛɛn dãnfʋ nɩ a kpɛ̃ɔ, na wʋ ɩ a nãmɩne ba jaa Nãa, nɩ a sorbo ba jaa Soro. 16'Lɔ tɛɛ lɛ be be ba kpire ɛ, na wʋ be chãa 'lɔ pɔ nɩrɛ na kʋ̃ tʋ̃ɔ gbʋr ɛ, a 'lɔ nɩrɛ na ba nyɛrɛ ɛ, bɩɩ na tʋ̃ɔ nyɛ wʋ ɛ. 'Lɔ lɛ a 'yɔ̃ɔfʋ nɩ a kpɛ̃ɔ sɛɛn sɔ̃ɔ jaa. A ɩ a lɛ. 17A bala na ɩ a taraa dẽme a pʋ̃pãanyã, kpãa ba ɩka ba ta wile ba mɩ̃ɛ bɩɩ de a ba tɩɛr 'yɔ̃ɔ a bʋ̃tarsɩ ala pɔ ɛ, tɩchɛ ba dɩɛl Nãaŋmɩn nyã na kʋ sɩ a bʋ̃bʋrɔ bʋrɔsɩ a jaa a sɩ de chɩlɛ nɩ. 18Kpãa ba a ba tʋ̃nɔ̃ vɩla na ba nʋ̃ɔ a vɩla tʋ̃mɔ̃ pɔ, na ba ɩ yɛ̃bɔ̃ɔnbɔ põnõ a ba bonsɩ. 19A lɛ ban bine na nãbonsɩ guro nɩ a nɩdaar, ka ba na nyɛ a nyɛvʋr 'lɔ na ɩ a yelmɩ̃ɛ nyɛvʋr. 20A fʋ̃ʋ Timoti, gu a ala ban de 'yɔ̃ɔ a fʋ nũu pɔ, na fʋ bar a 'yɛrvor nɩ a nɛchɩrɛ ala na ba tara par ɛ, ban bʋɔlɔ a bɔ̃ɔfʋ, 21bamɩne na kpãkpãana nɩ a yelsɩ anyãna, ba bar a sɔɔfʋ sɔr. Nãaŋmɩn wɩ̃ɛfʋ wʋ be a fʋ sɛ̃.

will be added

X\