1 Timoti 4

1Nãaŋmɩn Sɩɛ 'yɛr ka a gã chãa pɔ ɩka a baaraa, bamɩne na bar a ba sɔɔfʋ tɩ chɛlɛ a sɩdɛbɛ bɛlfʋ, nɩ a lɛ a sɩdɛbɛ na wile. 2A wiilfʋ nyã yi naa a nɛɛr ayi dẽme na ma ŋmara a jirsɩ ka a sɔ̃ɔ a ba tɩɛr fɩka kur tʋl ban 'mon bon 'yɔ̃ɔ jɩ̃nɛ. 3Ba wile na nɩbɛ ɩka ba ta kultaar ɛ, na ba wile ba ɩka ba chire bʋ̃diir amɩne. Tɩchɛ Nãaŋmɩn na maal a kultaa nɩ a bʋ̃diir a jaa ɩka a bala na sɔɔ tɩ bɔ̃ɔ a yelmɩ̃ɛ, ba ma de tɩ puor wʋ yãan. 4Bojũu Nãaŋmɩn bʋ̃maalaa jaa vɩɛlɛ na, ka a ba sɛɛ ɩka nɩrɛ wʋ tɔr bon jaa bar ɛ, ala ɩ sɩ ma den nɩ yãan puorfʋ. 5Bojũu Nãaŋmɩn 'yɛrbir nɩ a Nãaŋmɩn sʋɔrfʋ maal yaa naa ka a ɩ bʋ̃sʋ̃. 6Ala ɩ fʋ den a kpãafʋ nyã na fʋ wiil a yɛɛr, fʋn ɩn a Yesu Kɩrɩsɩto tʋ̃tʋ̃vɩla sʋɔ, na fʋn guolo a fʋ mɩ̃ɛ nɩ a Nãaŋmɩn 'yɛr nɩ a sɔɔfʋ wiil vɩla 'lɔ fʋn turo. 7Tɔr a jirsɩ ala ban ma ŋmara nɩ a pɔɔnyɔ̃n fuolsɩ, tɩ na fʋ wile a fʋ mɩ̃ɛ a Nãaŋmɩn sɔr pɔ. 8Bojũu fʋ̃ʋ jãn a fʋ ɩ̃gãn ka wʋ kpɛ̃mɛ, a vɩla na, tɩ wʋ kʋ̃ kor ɛ, tɩchɛ a Nãaŋmɩn sɔr tufʋ vɩla na a sɔɩ a jaa pɔ, bojũu wʋ tɩr nɛɛ kʋ sɩ a nyɛvʋr nyã sɩn tara a dɩna nɩ a nyɛvʋr 'lɔ na waara daar kɔ̃ɔ. 9A 'yɛr nyã ɩn yelmɩ̃ɛ ɩka, nɩrɛ jaa wʋ sɔɔ de. 10A lɛ jũu lɛ sɩ mʋɔrɔ tʋ̃nɔ̃ nɩ tʋ̃kpɩ̃ɛn, bojũu a sɩ tɩɛrtɔ ben a Nãaŋmɩn nyã na ɩ vʋr pɔ. 'Lɔ lɛ ɩ a nɩbɛ bala jaa na sɔɔ wʋ Fafaara. 11Kpãkpãana na fʋ wile ba a yelsɩ anyãna a jaa. 12Ta vɛ̃ ka nɩrɛ jaa kaa fʋ pɔrɔ fʋn chɛnɛ ɩ pɔlbile jũu ɛ, tɩchɛ fʋ ɩ wiilfʋ kʋ a bala na tara sɔɔfʋ, nɩ a fʋ 'yɛr, nɩ a fʋ maalfʋ, nɩ a fʋ nʋ̃fʋ, nɩ a fʋ sɔɔfʋ, nɩ a fʋ chɛchɛ ɩfʋ pɔ. 13Sɛrɛ tɩchɛ ka n wa, mʋ̃ɔ nɩbir kara a Nãaŋmɩn gãn a nɩyɔɔ pɔ, na fʋ mʋɔlɔ tɩ wile nɩ ba. 14Ta mel a Nãaŋmɩn Sɩɛ 'lɔ wʋn kʋ fʋ ɛ, a daar 'lɔ̃nɔ̃ a nɩdierbe na dɔ̃ɔ 'yɛr tɩ dɔɔl fʋ a ba nuur. 15De a yelsɩ a nyã tʋ̃nɔ̃ nɩ tʋ̃mɔ̃, na fʋ de fʋ mɩ̃ɛ 'yɔ̃ɔ a tʋ̃mɔ̃ pɔ, ka nɩrɛ jaa nyɛ lɛ a fʋ tʋ̃mɔ̃ na chiine niem. 16Bɔ̃ɔ nyɔɔ a fʋ mɩ̃ɛ nɩ a wiilfʋ ɩrɛ a lɛ nɛ, na fʋ tara kãnyir. Fʋn faan a fʋ mɩ̃ɛ nɩ a bala na chɛlɛ a fʋ 'yɛr.

will be added

X\