1 Timoti 2

1A lɛ jũu, a ala na de nie nɩ nyã, n kpãkpãan yɩn ɩka yɩ sʋɔrɔ, Nãaŋmɩn sʋɔrfʋ, na yɩ ma sʋɔrɔ kʋrɔ taa, tɩ na yɩ ma puor Nãaŋmɩn yãan kʋ nɩrɛ jaa. 2Yɩ mɩ sʋɔrɔ Nãaŋmɩn kʋrɔ a nãmɩne nɩ a bala na ɩ a kpɩ̃ɛn dẽme, ka a lɛ na vɛ̃ ka sɩn jɛ̃n ɩ̃gãn 'maar nɩ nyã'maar na sɩ maala a lɛ a Nãaŋmɩn na bʋɔrɔ. 3A nyã lɛ tor, naa pɛlɛ a sɩ Fafaara Nãaŋmɩn pʋɔ. 4'Lɔ lɛ bʋɔrɔ ɩka nɩrɛ jaa wʋ nyɛ faafʋ, na wʋ wa bɔ̃ɔ a yelmɩ̃ɛ. 5Bojũu Nãaŋmɩn bʋ̃'yen tɛɛ lɛ be be, nɩ 'ma'maala bʋ̃'yen na be a Nãaŋmɩn nɩ a nɩsaalba chara pɔ, 'lɔ lɛ a nɩrɛ Yesu Kɩrɩsɩto. 6'Lɔ lɛ de a wʋ nyɛvʋr yab faan nɩrɛ jaa. A 'yɛr nyã lɛ a Nãaŋmɩn kʋ sɩ ɩka sɩ mʋɔl a pʋ̃pãanyã. 7A lɛ lɛ so ka Nãaŋmɩn ir ma ka ɩ mʋmʋɔlɔ nɩ a nɩtʋ̃nãa. Yelmɩ̃ɛ jaa lɛ n 'yɛrɛ, n ba ŋmara jir ɛ, ɩka n ɩ a wiwile kʋ a bala na ba ɩ a Juu nɩbɛ ɛ, sɔɔfʋ nɩ yelmɩ̃ɛ pɔ. 8Maa bɔfʋ lɛ ɩka jie jaa, a dɔɔr wa sʋɔrɔ Nãaŋmɩn, ba jɛɛr a ba nuur puoro, na ba maala a lɛ a Nãaŋmɩn na bʋɔrɔ, na ba ta tara suur nɩ nɛchɩrɛ ɛ. 9Lɛ lɛ a pɔbɔ mɩ, ba ma su bon pɔɔ a ɩ̃gãn, tɩ na ba ta ma mal pir a jukɔɔl nɩ a sɛlma nɩ a lɛrsɩ bɩɩ a fɔɔr ala daa na ɩ tuo ɛ, 10tɩchɛ tʋ̃sʋ̃n lɛ sɛɛn a pɔbɔ bala na 'yɔ̃ɔnɔ̃ Nãaŋmɩn. 11Pɔbɔ ba ma jãn ɩ gbul na ba siir ba mɩ̃ɛ chɛlɛ a lɛ a nɩdierbe na wile. 12N ba bar sɔr ɩka pɔɔ jaa wʋ wile bɩɩ tara kpɛ̃ɔ daba ju ɛ, tɩchɛ wʋ ma ɩ gbul. 13Bojũu Adama lɛ a Nãaŋmɩn de nie mɛ tɩ na wʋ wa mɛ a Hawa tu. 14Satan ba dɔ̃ɔ nie bɛl Adama ɛ, tɩchɛ a Hawa lɛ wʋ bɛl ka wʋ sɔ̃ɔ Nãaŋmɩn nɛɛ. 15Tɩchɛ a pɔbɔ na nyɛn faafʋ tu bie dɔɔfʋ pɔ, ala ɩ ba chɛnɛ na tara sɔɔfʋ nɩ nʋ̃fʋ na ba ɩ chɛchɛ nyɔɔrɔ ba mɩ̃ɛ vɩla.

will be added

X\