REVELESEN 9

1Nao namba faef enjel i blo pupu blong hem. Nao mi luk wan sta we i aot long skae, i foldaon long graon. Sta ya i gat ki blong openem bigfala hol we i godaon we i godaon olgeta. 2Mo hem i openem bigfala hol ya, nao plante smok i kamaot long hem, olsem smok blong bigfala faea, mo smok ya i mekem san mo skae i kam tudak. 3Nao i gat ol lokis oli kamkamaot long smok ya, oli kamdaon long graon, mo oli gat paoa olsem paoa blong skopion. 4Be oli blokem olgeta finis se oli no save spolem gras mo tri mo ol samting olsem. Oli save spolem ol man ya nomo we mak blong God i no stap long fored blong olgeta. 5Mo oli blokem olgeta tu, se oli no save kilim ol man ya oli ded, be bambae oli save mekem olgeta oli harem nogud nomo long bodi blong olgeta gogo kasem faef manis. Mo samting ya bambae i mekem olgeta oli stap harem nogud tumas, olsem we skopion i kakae olgeta. 6Nao long faef manis ya, bambae ol man ya oli traem lukaot rod blong ded, be bambae oli no save faenem. Bambae oli wantem tumas blong oli ded, be bambae ded i ronwe long olgeta. 7Ol lokis ya, mi luk olgeta oli olsem ol hos we oli laenap long taem blong faet. Long hed blong olgeta oli gat samting olsem hat blong king, we oli wokem long gol blong flasem. Mo fes blong olgeta i olsem fes blong man. 8Hea blong olgeta i longlongfala, olsem hea blong woman, mo tut blong olgeta i olsem tut blong dog, be i bigbigwan. 9Nao mi luk we oli werem samting olsem klos blong faet blong blokem bodi blong olgeta, ara i no save kasem olgeta. Mo noes blong wing blong olgeta i olsem noes blong plante kat blong faet we ol hos oli pulum, blong resis i go long faet. 10Oli gat tel olsem skopion nomo, we i gat tut long tel blong hem. Mo paoa ya we oli gat blong mekem ol man oli harem nogud long faef manis ya, hem i stap long tel blong olgeta. 11Oli gat jif blong olgeta we i bos blong olgeta, mo jif ya, hemia enjel ya we i bos blong bigfala hol ya we i godaon we i godaon olgeta. Long lanwis blong ol laen blong Isrel, nem blong jif ya, Abadon. Mo long lanwis blong ol man Gris, nem blong hem, Apolion, we i min se “Man blong spolem evri samting”. 12Faswan long tri bigfala trabol ya i kamtru finis, be i gat tu i stap yet. 13Nao namba sikis enjel i blo pupu blong hem. Nao mi harem wan tok we i kamaot long ol kona blong Olta ya we oli wokem long gol, we i stap long fes blong God. 14Tok ya i talem long namba sikis enjel we i stap holem pupu blong hem se, “Yu lego ol fo enjel ya we oli fasem olgeta bifo, oli stap long bigfala reva ya Yufretes.” 15Nao hem i lego ol fo enjel ya. Ol fo enjel ya, olgeta oli rere longtaem finis, nao oli stap wet blong kasem taem ya nomo, long yia ya mo manis ya mo dei ya stret. Wok blong olgeta i blong kilim wan haf blong ol man oli ded, tu haf nomo blong olgeta bambae oli stap. 16Nao mi harem namba blong ol soldia blong olgeta we oli stap sidaon long hos, mo i gat tu handred milian man olgeta. 17Nao long vison ya, mi luk ol hos mo ol man we oli stap sidaon long olgeta. Ol man ya oli werem klos blong faet we oli wokem long aean, blong ara i no save kasem olgeta. Ol klos ya oli red olsem faea, mo oli blu olsem bluston, mo oli yala olsem salfa. Hed blong ol hos i olsem hed blong laeon, mo i gat faea mo smok mo salfa i stap kamaot long maot blong olgeta. 18Long trifala trabol ya, long faea, mo long smok mo long salfa we i stap kamaot long maot blong olgeta, i gat wan haf blong ol man oli ded, tu haf blong olgeta oli stap laef. 19Paoa blong ol hos ya, i stap long maot blong olgeta mo long tel blong olgeta tu, from we tel blong olgeta i olsem snek we hed blong hem i stap long en blong hem. Nao oli stap yusum tel blong olgeta tu blong spolem ol man. 20Be ol narafala man, we oli no ded long ol trabol ya, oli stap gohed, oli stap mekem wosip long ol devel, mo long ol samting ya tu we oli wokem long han blong olgeta nomo. Oli stap prea long ol narafala god we oli wokem long gol, mo long silva, mo long bras, mo long ston, mo long wud. Ol god ya oli no save luk wan samting, oli no save harem wan samting, mo oli no save wokbaot, be ol man ya oli no tanem tingting blong olgeta blong livim ol god ya blong olgeta. 21Mo oli no tanem tingting blong olgeta tu from ol sin blong olgeta, we oli kilim man i ded, mo oli wokem ol bisnes blong posen mo kleva, mo oli ronem woman, mo oli stil.

will be added

X\