REVELESEN 7

1Nao biaen long ol samting ya, mi luk fo enjel we oli stap stanap long ol fo kona blong wol. Oli blokem ol fo win long wol, nao i no gat win i blu long graon, mo long solwota mo long ol tri. 2Nao mi luk wan narafala enjel we i aot long is, i stap kam. Hem i holem mak we God ya we i laef we i no save ded, hem i stap yusum blong makem ol man blong hem. Enjel ya i singaot bigwan, i go long ol fo enjel ya we God i givim paoa finis long olgeta blong oli spolem graon mo solwota. 3Hem i talem se, “Yufala i no spolem graon mo solwota mo ol tri fastaem, gogo bambae mifala i makem ol man blong wok blong God blong yumi, mifala i putum mak blong hem long fes blong olgeta.” 4Nao mi harem namba blong ol man we mak blong God i stap long olgeta. I gat wan handred foti fo taosen man olgeta, we oli kamaot long olgeta laen blong Isrel. 5Olgeta we mak blong God i stap long olgeta i olsem. Long laen blong Juda i gat twelef taosen man, mo long laen blong Ruben i gat twelef taosen man, mo long laen blong Gad i gat twelef taosen man. 6Mo long laen blong Asere i gat twelef taosen man, mo long laen blong Naftali i gat twelef taosen man, mo long laen blong Manase i gat twelef taosen man. 7Mo long laen blong Simeon i gat twelef taosen man, mo long laen blong Livae i gat twelef taosen man, mo long laen blong Isakara i gat twelef taosen man. 8Mo long laen blong Sebulun i gat twelef taosen man, mo long laen blong Josef i gat twelef taosen man, mo long laen blong Benjamin i gat twelef taosen man. 9Nao biaen long samting ya, mi mi luk wan vison bakegen, mo mi luk wan bigfala hip blong ol man, we olgeta i plante we plante, i no gat man i save kaontem olgeta. Ol man ya oli kamaot long olgeta kala, mo long olgeta kantri, mo long olgeta laen, mo long olgeta lanwis. Olgeta oli werem waet klos, mo oli stap holem lif blong pamtri long han blong olgeta. Nao oli stap stanap long fran blong bigfala jea blong king, mo long fes blong Smol Sipsip ya. 10Nao oli singaot bigwan, oli talem se, “God blong yumi, hem i King, i stap sidaon long bigfala jea blong hem. Hem wetem Smol Sipsip ya, tufala ya nao i wokem rod blong sevem mifala.” 11Olgeta enjel oli stap stanap raon long bigfala jea blong God, mo raon long ol elda mo ol fo jerubim ya, nao oli bodaon we fes blong olgeta i kasem graon, long fes blong God we i stap sidaon long bigfala jea blong hem, oli mekem wosip long hem, 12oli talem se, “Yes i tru ya. God ya blong yumi, olgeta man oli mas presem hem, oli mas leftemap nem blong hem, oli mas talemaot waes blong hem, oli mas talem tangkiu long hem, oli mas ona long hem, oli mas talemaot hae nem blong hem, mo oli mas talemaot paoa blong hem, gogo i no save finis. Amen.” 13Nao wan long ol elda ya i askem long mi se, “!E! ?Ol man ya we oli werem waet klos, yu save olgeta? ?Yu save weples olgeta oli kamaot long hem?” 14Nao mi mi talem long hem se, “Masta. !Yu nomo yu save.” Nao hem i talem se, “Hemia ol man ya we oli kasem bigfala trabol, we ol man oli spolem olgeta tumas, be naoia oli winim ol trabol ya finis. Oli wasem ol klos blong olgeta finis long blad blong Smol Sipsip ya we i ded, blong mekem ol klos ya oli waet. 15Mo naoia, oli stap stanap long fes blong God we hem i stap sidaon long bigfala jea blong hem, mo long dei mo long naet, oli stap mekem wosip long hem insaed long haos blong hem. God, hem i King blong olgeta, mo hem bambae i stap wetem olgeta oltaem, blong lukaot long olgeta. 16Bambae oli no moa hanggri bakegen, oli no moa tosta bakegen. Bambae san i no moa bonem olgeta bakegen, bigsan bambae i no moa save kasem olgeta nating, 17from we Smol Sipsip ya we i stap long medel long bigfala jea blong God, hem bambae i lukaot long olgeta, olsem we man blong lukaot long sipsip i stap lukaot long ol sipsip blong hem. Hem bambae i lidim olgeta oli go dring long ol springwota ya we i save givim laef. Mo God bambae i ravemaot wota blong ae blong olgeta.”

will be added

X\