REVELESEN 4

1Nao biaen long ol samting ya, mi luk wan vison bakegen, mo long vison ya mi luk wan doa long heven we i open. Nao mi harem sem Man ya nomo we i stap toktok long mi fastaem, hem i toktok long mi bakegen we voes blong hem i bigwan, i olsem pupu. Nao hem i talem long mi se, “Yu kam antap long ples ya, nao bambae mi soemaot long yu ol samting we bambae oli kamtru.” 2Wantaem nomo, Tabu Spirit i kam long mi we paoa blong hem i holem mi, nao mi luk wan bigfala jea olsem jea blong king i stap long heven, mo wan Man i stap sidaon long hem. 3Man ya i saen we i saen, olsem tu gudfala ston ya jaspa mo kanilian we tufala i red. Mo i gat wan renbo i goraon long jea ya, mo laet blong hem i saen olsem gudfala ston ya emeral, we i grin. 4Mo raonabaot long bigfala jea ya, i gat twanti fo narafala jea, oli stap, we oli bigbigwan, nao long ol jea ya i gat twanti fo elda oli stap sidaon long olgeta. Olgeta ya, klos blong olgeta i waet, mo oli putum hat olsem hat blong king we oli wokem long gol. 5Nao long jea ya blong king i gat laetning i stap saenaot i kam, mo i gat bigfala noes blong tanda i faerap. Long fran blong jea ya i gat seven bigfala laet oli stap laet. Hemia ol seven spirit blong God. 6Mo bakegen long fran blong jea ya, i gat wan samting olsem solwota i stap, we i olsem glas, we i saen we i saen. Long medel blong ol samting ya, raonabaot long jea ya, long ol fo saed blong hem, i gat fo jerubim oli stap stanap. Ol jerubim ya oli gat ae we i plante we plante we i kavremapgud bodi blong olgeta. 7Fas jerubim, hem i olsem laeon mo sekenwan i olsem pikinini blong buluk, mo namba tri, fes blong hem i olsem fes blong man, mo namba fo i olsem wan igel we i stap flae. 8Ol fo jerubim ya evriwan oli gat sikis wing blong olgeta, mo oli gat fulap ae blong olgeta, we i kavremap bodi blong olgeta long insaed mo long afsaed tu. Nao long dei mo long naet, oli stap singsing we oli no spel nating. Oli stap singsing se, “!Hae God ya we i God blong yumi, hem i tabu, we i tabu, we i tabu! !Hem i gat olgeta paoa! Hem i stap we i stap, mo i stap fastaem, bifo olgeta, mo bambae i stap oltaem gogo i no save finis.” 9Nao ol jerubim ya oli stap sing blong leftemap nem blong God ya we i laef, mo i no save ded samtaem, we i stap sidaon long jea blong hem. Mo oli stap ona long hem, oli stap talem tangkiu long hem. 10Mo evritaem oli mekem olsem, ol twanti fo elda ya tu oli bodaon long fes blong hem we fes blong olgeta i kasem graon, oli mekem wosip long hem. Oli tekemaot hat blong olgeta, oli sakemdaon long fran blong jea blong hem. 11Mo oli talem se, “Yu yu Masta blong mifala, mo yu God blong mifala. Yu yu mekem olgeta samting evriwan. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli bodaon, oli ona long yu, mo blong oli stap aninit long paoa blong yu oltaem.”

will be added

X\