REVELESEN 18

1Biaen long samting ya mi luk wan narafala enjel i aot long heven i kamdaon. Hem i gat bigfala paoa, mo i gat laet i stap saenaot long hem i kasem olgeta ples long wol. 2Hem i singaot bigwan, i talem se, “Taon ya Babilon we i hae we i hae, hem i foldaon finis, we i foldaon olgeta. Hem i kam nogud finis, mo naoia i ples blong ol rabis devel, mo ol devel ya we oli nogud we i nogud. Hem i ples blong ol pijin ya we oli no klin long fes blong God, we oli nogud olgeta. 3Hem i olsem wan rabis woman, we i mekem ol man blong olgeta kantri long wol oli dring waen blong hem, we waen ya, hemia ol fasin nogud wetem woman. Olgeta king long wol oli mekem nogud finis wetem woman ya, mo olgeta bisnesman long wol oli kam rijman finis from fasin ya blong hem we hem i wantem evri samting.” 4Nao mi harem wan narafala toktok i kamaot long heven, i talem se, “Ol man blong mi, yufala i kam. Yufala i kamaot long hem. I nogud yufala i stap joen wetem hem long ol sin ya we hem i stap mekem, mo i nogud we bambae yufala i joen wetem hem blong kasem panis wetem hem. 5Ol sin ya blong hem i stap hivap i go kasem heven, mo God i stap tingbaot ol rabis fasin blong hem. 6Yufala i mas mekem long hem, stret olsem we hem i mekem long yufala. Ol samting we hem i mekem long yufala, yufala i mas givimbak tu taem long hem. Yufala i mas fulumap kap blong hem long waen we i strong moa, we paoa blong hem i dabolem paoa blong waen we hem i givim long yufala. 7Olsem we woman ya i stap mekem ol rabis lafet blong hem, i stap harem gud long hem, yufala i mas mekem we hem i stap harem nogud tumas long bodi blong hem mo long tingting blong hem. Hem i stap talem hem wan se, ‘Mi mi kwin. Mi mi gat bigfala jea blong mi i stap. Mi mi no wan widowoman, mo mi no gat man blong mi, we bambae mi krae from.’ 8Nao from samting ya, bambae olgeta trabol blong hem oli kasem hem long wan dei nomo. Bambae hem i sik, mo i harem nogud, i krae, mo bambae hem i gat hadtaem blong kasem kakae, mo bambae faea i kakae hem, from we Hae God we i Masta blong yumi, we bambae i jajem hem, hem i gat paoa.” 9Ol king ya blong wol we oli mekem nogud wetem woman ya Babilon, we oli joen long hem blong harem gud wetem hem, bambae oli krae long hem. Taem oli luk smok blong faea we bambae i kakae hem, bambae oli krae tumas from. 10Bambae oli stanap longwe tumas long hem, from we oli fraet se panis ya blong hem bambae i kasem olgeta tu. Nao bambae oli krae se, “!O, sore we sore tumas! Babilon, yu yu wan bigfala taon, we yu strong tumas. Be long wan aoa nomo, yu kasem panis blong yu.” 11Ol bisnesman blong wol ya tu bambae oli krae we oli krae tumas from woman ya, from we bambae i no moa gat man blong pem ol samting blong olgeta. 12Bambae i no moa gat man blong pem ol gol mo silva mo gudfala ston mo perel blong olgeta. Bambae i no moa gat man blong pem ol gudfala kaliko ya linen, mo kaliko we i pepol, mo kaliko we i red we i red, mo kaliko ya silik, we praes blong olgeta i antap tumas. Bambae i no moa gat man blong pem ol defren kaen wud we i had blong man i faenem, mo ol samting we oli wokem long tut blong elefen, mo long wud we praes blong hem i antap, mo long bras, mo long aean, mo long flas ston ya mabol. 13Bambae i no moa gat man blong pem ol gudfala lif ya sinamon, mo ol narafala lif we i gat gudfala tes, mo insens mo mir mo frangkinsens we oli gat gudfala smel. Bambae i no moa gat man blong pem waen mo oel mo flaoa mo wit blong olgeta. Bambae i no moa gat man blong pem ol buluk, mo ol sipsip, mo ol hos mo ol kat, mo ol slef blong olgeta. Mo ol man ya we oli stap salem ol man blong oli kam slef, bambae i no moa gat man blong pem ol slef ya blong olgeta. 14Ol bisnesman ya bambae oli krae se, “!O, sore tumas! Ol frut ya blong hadwok blong yu, we yu yu putum tingting blong yu i stap long hem, i gowe finis long yu. Ol gudfala kakae blong yu, mo ol samting blong flasem yu, yu yu lusum olgeta finis, bambae yu no save luk olgeta bakegen samtaem.” 15Ol bisnesman ya we oli kam rijman long bisnes we oli mekem wetem woman ya, bambae oli stanap longwe long hem, from we oli fraet se panis ya blong hem bambae i kasem olgeta tu. Bambae oli krae we oli krae tumas, oli talem se, 16”!O, sore we sore tumas long yu, yu bigfala taon! Bifo yu yu stap werem ol gudfala klos we sam oli pepol, mo sam oli red we i red. Mo yu stap flasem yu long ol samting ya we oli wokem long gol, mo long ol gudfala ston, mo long ol perel. 17Be long wan aoa nomo, ol gudfala samting ya blong yu oli lus.” Olgeta kapten blong sip wetem ol pasenja mo ol boskru mo ol narafala man we oli stap kasem mane blong olgeta from we oli wok long sip, oli stap stanap longwe long hem. 18Taem oli luk smok blong faea we i bonem bigfala taon ya, oli krae se, “Neva i gat wan bigfala taon we i sem mak long bigfala taon ya.” 19Nao oli sakem asis blong graon i go long hed blong olgeta, blong soemaot we oli harem nogud tumas, nao oli krae we oli krae oli talem se, “!O, sore we sore tumas long yu, yu bigfala taon! Ol man we ol sip blong olgeta oli stap go olbaot long solwota, oli kam rijman long bigfala mane blong yu. Be long wan aoa nomo, yu yu lusum evri samting blong yu.” 20Be i gat narafala sing tu, we i talem se, “Yufala long heven. Yufala ol man blong God, mo ol aposol, mo ol profet. Yufala i mas harem gud, yufala i glad, from we God i jajem woman ya finis from ol samting ya we hem i mekem long yufala, mo i givim panis long hem.” 21Nao wan strong enjel i tekem wan bigfala ston, i sakem i go long solwota. Mo i talem se, “Babilon. Yu yu wan bigfala taon, be hemia nao wan saen blong soemaot fasin we God bambae i mekem long yu. Hem bambae i sakemdaon yu, we bambae man i no save luk yu bakegen samtaem. 22Long ples blong yu, bambae i no moa gat man blong kilim gita, mo man blong singsing. Bambae i no moa gat man blong blo bambu, mo man blong blo trampet. Noes blong ol samting ya bambae man i no moa save harem. Bambae i no moa gat man we i gat gudhan blong mekem wok, mo bambae i no moa gat noes blong ston we i stap granem wit i kam flaoa. 23Bambae i no moa gat laet i saenaot, mo bambae man i no moa save harem voes blong man mo woman we tufala i mekem promes blong tufala long taem blong mared. Bifo, ol bisnesman blong yu oli nambawan long olgeta bisnesman long wol. Mo long fasin blong yu blong wokem posen, yu yu trikim ol man blong olgeta kantri, yu pulum olgeta oli stap aninit long paoa blong yu.” 24Bigfala taon ya Babilon, hem i kasem panis from we blad blong ol profet mo blad blong ol man blong God i stap long hem. Yes, blad blong olgeta man we ol man oli kilim olgeta i ded, i stap long taon ya.

will be added

X\