REVELESEN 11

1Nao wan man i givim wan stik long mi we i olsem wan longfala rula. Mo God i talem long mi se, “Yu girap, yu go makem haos blong mi, mo Olta blong mi. Mo yu go kaontem olgeta ya we oli stap mekem wosip long haos blong mi. 2Be yad blong haos blong mi we i stap afsaed, we i no blong mekem wosip, yu livim i stap. Yu no makem, from we ples ya i go finis long ol man ya we oli no bilif long mi. Bambae olgeta ya oli stap purumpurumbut long taon ya blong mi we i tabu, gogo kasem we foti tu manis i pas. 3Mo bambae mi mi sanem tufala witnes blong mi, we tufala i putum ol rabis klos nomo blong soemaot we tufala i harem nogud. Nao long ol wan taosen tu handred sikisti dei ya, tufala witnes ya blong mi bambae i stap talemaot tok we mi bambae mi givim long tufala.” 4Tufala ya i olsem tufala stamba blong tri ya olif, mo tufala i olsem tufala ples blong putum laet ya we i stap stanap long fes blong Hae God we i Masta blong wol. 5Sipos sam man oli traem spolem tufala witnes ya, bambae faea i kamaot long maot blong tufala blong spolem olgeta. From samting ya, olgeta we oli traem spolem tufala, bambae oli ded. 6God i givim paoa long tufala blong blokem ren, blong bambae taem tufala i talemaot tok we hem i givim long tufala, be ren i no save foldaon. Mo hem i givim paoa long tufala blong tanem ol springwota i kam blad. Mo hem i givim paoa long tufala tu, blong tekem ol narafala sik i kam blong spolem ol man long wol. Tufala i save mekem ol samting ya enitaem nomo, olsem we tufala i wantem. 7Taem tufala witnes ya i talemaot ol tok blong God finis, bambae bigfala wael anamol ya i kamaot long bigfala hol ya we i godaon we i godaon olgeta, nao hem bambae i faet long tufala. Hem bambae i winim tufala, i kilim tufala i ded, 8mo bambae bodi blong tufala i stap ledaon nomo long rod, insaed long bigfala taon ya we bifo olgeta oli nilim Masta blong tufala long kros long hem blong i ded. Bigfala taon ya, yumi save putum nem blong hem se “Sodom” no “Ijip” we i wan tokhaed blong makem hem. 9Nao long tri dei haf, ol man blong olgeta kala, mo kantri, mo laen, mo lanwis, bambae oli stap lukluk dedbodi blong tufala. Bambae oli no letem blong ol man oli berem tufala. 10Bambae tok blong God we tufala i talem, i mekem ol man blong wol oli harem nogud tumas. Be taem tufala witnes ya blong hem, tufala i ded, bambae olgeta ya oli save harem gud from. Bambae olgeta oli mekem lafet, oli stap givgivim presen long olgeta blong makem ded blong tufala. 11Nao long vison ya, biaen long tri dei haf ya, win blong God i kam insaed long dedbodi blong tufala, blong mekem tufala i laef bakegen, nao tufala i stanap. Mo olgeta man we oli luk samting ya, oli fraet tumas. 12Nao tufala i harem wan man long heven, i singaot bigwan, i talem se, “Yutufala i kam antap long ples ya.” Nao stret long fes blong ol enemi blong tufala, wan klaod i tekem tufala i go antap long heven. 13Nao wantaem nomo, graon i seksek bigwan. Nao long bigfala taon ya, wan haf blong hem i brobrok olgeta, naen haf blong hem i stap, mo i gat seven taosen man oli ded. Ol man we oli stap laef oli fraet tumas, nao oli stap leftemap nem blong God we i stap long heven. 14Sekenwan long tri bigfala trabol ya i finis. Be long smoltaem nomo, bambae namba tri trabol i kamtru. 15Nao namba seven enjel i blo pupu blong hem. Nao olbaot long heven, mi harem we olgeta oli stap singaot bigwan, oli talem se, “Ol kingdom blong wol ya oli kam aninit long paoa blong Hae God blong yumi, wetem Mesaea blong hem. Mo hem i King we bambae i stap rul oltaem gogo i no save finis.” 16Nao twanti fo elda ya we oli stap sidaon long ol bigfala jea blong olgeta long fes blong God, oli bodaon we fes blong olgeta i kasem graon, oli mekem wosip long hem, 17oli talem se, “Hae God, Masta blong mifala, yu yu gat olgeta paoa. Yu yu stap we yu stap, mo yu stap fastaem, bifo olgeta. Mifala i talem tangkiu long yu, from we yu yu soemaot bigfala paoa blong yu finis we yu yu kam King. 18Ol man we oli no save yu oli kros tumas, be naoia i taem blong yu yu kros long olgeta, naoia i taem blong jajem ol dedman. Naoia i taem blong givim pei long ol man blong yu, ol profet, wetem ol man blong yu, wetem olgeta we oli stap ona long nem blong yu, olgeta we oli haeman, wetem olgeta we oli no gat nem. Mo naoia i taem blong spolem ol man ya we oli stap spolem wol.” 19Nao mi luk we doa blong haos blong God long heven i open, mo ol man oli save luk Bokis ya we i Saen blong Promes blong Hae God. Nao i gat laetning i laet, mo tanda i faerap. Mo i gat bigfala noes, mo graon i seksek, mo ol ston blong aes oli folfoldaon olsem ren, we ol ston blong aes ya oli bigbigwan.

will be added

X\