1 Ol brata mo sista. Mi mi lavem yufala tumas, mo mi wantem tumas blong luk yufala. Yufala i stap mekem mi mi harem gud, mo mi glad tumas long yufala. Mi mi lavem yufala tumas. Nao from samting ya, yufala i mas stanap strong long paoa blong Masta blong yumi from we yufala i joen finis long hem. 2 Yuodia mo Sintike. Mi mi talem strong long yutufala, se from we yutufala i woman we i joen long Masta blong yumi, yutufala i mas gat wan tingting nomo. 3 Yes, mo yu tu we yumitufala i bin wok tugeta longtaem finis, mi wantem blong yu yu givhan long tufala woman ya. Tufala ya i wok strong wetem mi, mo Klemen, mo ol narafala man ya we oli wok wetem mi long ol wok blong gud nius blong Kraes. Nem blong olgeta ya i stap finis long buk ya blong God, we nem blong olgeta we oli gat laef, i stap long hem. 4 Yufala we i joen long Masta blong yumi, oltaem yufala i mas glad. Mi mi talem bakegen, se yufala i mas glad. 5 Yufala i mas soemaot long olgeta man, we yufala i kwaet man. Bambae i no longtaem Masta blong yumi i kamtru. 6 Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. 7 Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes. 8 Ol brata mo sista. Mi wantem talem wan samting moa long yufala. I gat ol gudfala fasin i stap we oli stret gud, mo we i stret nomo blong yumi presem ol man we oli mekem ol fasin ya. Mo yufala i mas putum tingting blong yufala i stap strong long ol fasin olsem. Ol fasin ya oli tru, mo oli hae, mo oli stret, mo oli klin gud, mo oli save mekem yumi harem gud, mo ol man oli stap ona long olgeta we oli stap mekem ol fasin ya. 9 Yufala i mas holem ol fasin ya we mi mi soemaot long yufala long ol tok mo ol wok blong mi, mo we mi tijim yufala long hem, nao yufala i lanem olgeta finis. Nao God ya we i stamba blong pis, hem bambae i stap kampani wetem yufala. 10 Mi mi stap harem i gud tumas, mi presem Masta blong yumi, from we naoia, yufala i soemaot bakegen we yufala i gat sore long mi. Longtaem finis, yufala i no moa mekem sam samting blong givhan long mi, be i no from we yufala i no moa tingbaot mi, be from we yufala i no gat rod blong givhan. 11 Mi mi tok olsem, i no from we mi stap sot long sam samting, nogat. Mi mi lanem finis, se long wanem rod we mi stap long hem, be mi save stap gud nomo. 12 Sipos mi trabol, be mi save rod blong samting ya finis. Sipos mi gat plante samting, be mi save rod blong samting ya tu, from we mi gotru long ol samting ya finis. Nao long wanem rod mi pas long hem, be mi stap harem gud. Sipos mi fulap gud, no mi hanggri, sipos mi gat plante samting, no mi trabol, be nating. 13 Mi save mekem evri samting, long paoa blong Kraes ya we i stap mekem mi mi strong. 14 Be taem yufala i givhan olsem long ol trabol ya blong mi, yufala i mekem i gud tumas long mi. 15 Yufala man Filipae, yufala i savegud, we long taem ya we wok blong gud nius i jes stat nomo long ol ples ya, taem mi aot long Masedonia, yufala nomo i givhan long mi. I no gat narafala jos we i givim sam samting long mi blong givhan long mi long rod. 16 Mo taem mi stap long Tesalonaeka, i no wan taem nomo we yufala i givhan long mi, long taem ya we mi trabol long mane. 17 Be plis yufala i no ting se mi mi wantem kasem sam samting long yufala, nogat. Mi wantem we yufala i gat frut long laef blong yufala, blong leftemap yufala. 18 I olsem we yufala i pemaot kaon blong yufala long mi finis, nao yufala i mekem antap bakegen. Naoia, mi kasem ol samting ya long Epafrodaetas, we yufala i sanem i kam, mo mi mi no moa sot long wan samting. Ol samting ya we yufala i givim long mi, hem i olsem wan presen we yufala i givim i go long God, we i gat gudfala smel blong hem, mo we God i glad blong kasem. 19 Mo God blong yumi we i rij tumas, mo i gat olgeta paoa long heven, hem bambae i lukaot long yufala we i joen long Jisas Kraes, i givim olgeta samting long yufala we yufala i sot long hem. 20 God i Papa blong yumi, mo bambae yumi stap leftemap nem blong hem, gogo i no save finis. Amen. 21 Mi mi talem halo long yufala evriwan, we yufala i joen long Jisas Kraes, yufala i Kristin man. Ol brata blong yumi we oli stap wetem mi long ples ya, oli talem halo long yufala. 22 Olgeta Kristin man long ples ya, oli talem halo long yufala. Antap bakegen, ol Kristin man long haos blong Sisa, oli talem halo long yufala. 23 Prea blong mi, we Jisas Kraes, Masta blong yumi bambae i stap givhan long yufala long laef blong yufala, long gladhat blong hem.
