OL WOK 22

1Hem i talem se, “Ol papa mo ol brata blong mi. Plis yufala i lesin long mi, blong mi talemaot ol poen blong mi long yufala.” 2Nao taem olgeta oli harem we hem i stap toktok long olgeta long lanwis blong olgeta stret, oli kam kwaet moa bakegen. Nao Pol i gohed, i talem se, 3”Mi mi wan laen blong Isrel. Mi bon long Silisia long taon ya Tasas, be mi gruap long ples ya, long Jerusalem, mi skul long nambawan tija ya Gamaliel. Hem i tijimgud mi long Loa ya blong ol olfala blong yumi, blong mi holemstret. Mo long taem ya, mi strong blong mekem ol samting we God i wantem, stret olsem yufala ya tede. 4Bifo, mi stap ronem ol man we oli folem Rod blong Jisas, blong kilim olgeta oli ded. Mi stap holem ol man mo ol woman, mi kam putum olgeta long kalabus. 5Tok ya, hae pris mo olgeta memba blong Kaonsel blong yumi oli save talem se i tru. Long taem ya, mi tekem leta blong olgeta we oli raetem long ol brata blong yumi long Damaskes. Nao mi aot, mi go long ples ya blong holem olgeta we oli folem Rod ya blong Jisas. Mi wantem fasem olgeta long jen, blong pulum olgeta oli kambak long Jerusalem bakegen, blong oli kasem panis.” 6Mo Pol i gohed i talem se, “Long taem ya mi stap folem rod, mi go klosap long Damaskes, nao klosap long medel dei, wantaem nomo, wan bigfala laet long skae i saenaot i kam kasem mi. 7Nao mi foldaon long graon, mo mi harem wan tok we i talem long mi se, ‘!Sol! !Sol! ?Weswe yu yu stap mekem i nogud long mi olsem?’ 8Nao mi askem se, ‘?Masta, yu yu hu ya?’ Nao hem i talem long mi se, ‘Mi Jisas, man Nasaret ya we yu yu stap mekem i nogud long mi.’ 9Ol man we oli biaen long mi long rod, oli luk laet ya, be oli no harem tok blong man ya we i stap toktok long mi. 10Nao mi askem long hem se, ‘?Masta, bambae mi mekem olsem wanem?’ Mo Masta ya blong mi i talem long mi se, ‘Yu girap, yu wokbaot, yu go long Damaskes. Nao long ples ya, bambae wan man i talemaot long yu olgeta samting we God i makemaot finis, blong bambae yu yu mekem.’ 11Bigfala laet ya i saen tumas, nao i mekem ae blong mi i blaen. Nao ol man ya we oli biaen long mi long rod oli holem han blong mi, oli lidim mi mi go insaed long Damaskes. 12”Long ples ya, i gat wan man i stap, nem blong hem Ananaeas. Hem i wan man blong prea, mo hem i stap holem Loa blong yumi, mo ol laen blong Isrel long ples ya oli stap ona gud long hem. 13Nao hem i kam luk mi, i kam stanap klosap long mi, i talem se, ‘Brata Sol. Naoia, ae blong yu i gud bakegen.’ Nao stret long taem ya nomo, ae blong mi i gud bakegen, nao mi luk hem. 14Nao hem i talem se, ‘God ya blong ol olfala blong yumi, hem i jusumaot yu finis, blong yu bambae yu save ol samting we hem i wantem, mo blong yu luk Stret Man ya blong hem, mo blong yu harem tok blong hem long maot blong hem nomo. 15Ol samting ya we yu luk mo we yu harem, bambae yu mas talemaot long olgeta man, blong soemaot hem long olgeta. 16Mo naoia, i nogud blong yu stap wet. Yu girap, yu prea long Jisas, nao yu baptaes, yu letem hem i wasemaot ol sin blong yu.’ “ 17Mo Pol i gohed i talem se, “Nao mi mi kambak long Jerusalem bakegen, mo taem mi stap prea long haos blong God, mi luk wan vison, 18mo long vison ya mi luk Masta blong yumi. Hem i talem long mi se, ‘Yu hareap, yu aot long Jerusalem naoia nomo, from we ol man long ples ya oli no save harem tok blong yu blong talemaot mi.’ 19Be mi mi talem se, ‘Masta. Olgeta ya oli savegud we bifo mi mi stap go insaed long ol haos blong prea blong olgeta, mi stap holem ol man ya we oli bilif long yu, mi stap wipim olgeta. 20Mo taem ol man oli stonem Steven, nao blad blong hem i ron from we hem i stap talemaot yu, be mi tu mi stap stanap wetem olgeta. Long taem ya, mi stap harem gud from we oli stonem hem, mo mi stap lukaot long klos blong olgeta.’ 21Be Masta blong yumi i talem long mi se, ‘Yu go, from we bambae mi mi sanem yu yu go longwe, long ol man we oli no laen blong Isrel.’ “ 22Nao ol man oli stap lesin gud long ol tok ya blong Pol gogo hem i talem lastok ya. Be taem olgeta oli harem tok ya, oli stap singaot bigwan, oli talem se, “!Tekemaot man ya! !Kilim hem i ded! !I nogud hem i stap!” 23Nao oli stap singsingaot bigwan, oli sakem klos blong olgeta i go olbaot, mo oli tekem asis blong graon, oli stap sakem i go antap, blong soemaot we oli stap harem nogud tumas. 24Nao komanda ya blong ol soldia blong ol man Rom i talem long ol soldia blong hem, blong oli tekem Pol i go insaed long barik. Nao hem i talem long olgeta blong oli wipim Pol blong mekem hem i talemaot, from wanem ol laen blong Isrel ya oli stap singaot bigwan agens long hem olsem. 25Be taem oli fasemgud hem blong wipim hem, Pol i talem long kapten blong olgeta, we i stap stanap long ples ya se, “!E! Mi mi sitisen blong Rom ya. Yufala i no jajem mi yet. !Olsem wanem yufala i wantem wipim mi?” 26Taem kapten i harem tok ya, hem i go talemaot long komanda se, “!E! !Ating yu yu no save, be man ya i sitisen blong Rom ya!” 27Nao komanda ya i kam luk Pol, i askem long hem se, “!E! !Yu talemgud! ?Yu tru, yu sitisen blong Rom?” Pol i talem se, “Yes, mi tru ya.” 28Nao Komanda ya i talem se, “?Olsem wanem? Mi mi pem bigfala mane blong kam sitisen blong Rom.” Be Pol i talem se, “Be mi mi sitisen, from we papa blong mi i sitisen blong Rom.” 29Nao wantaem nomo, ol soldia we oli stap rere blong wipim Pol oli sek long hem, oli arier. Mo taem komanda ya i save we Pol i sitisen blong Rom, mo we hem i fasem hem finis long ol jen, hem i fraet gud. 30Nao komanda ya i wantem harem stret, wanem poen we ol laen blong Isrel ya oli agensem Pol from. Nao from samting ya, long nekis dei, hem i tekemaot jen we oli fasem Pol long hem, mo i sanem tok i go long ol jif pris mo olgeta memba blong Kaonsel ya blong ol laen blong Isrel, blong oli mekem miting. Nao hem i tekem Pol i go stanap long fes blong olgeta.

will be added

X\