FAS KORIN 14

1Fasin ya we man i stap lavem ol man, yufala i mas traehad blong folem. Mo yufala i mas putum tingting blong yufala i stap strong long ol paoa ya tu we God i stap givim, blong yufala i save kasem olgeta. Mo nambawan long ol paoa ya, i paoa blong talemaot ol tok we God i givim. 2Man we i stap toktok long ol narafala lanwis olsem we Tabu Spirit i givim long hem, hem i stap toktok long God nomo, i no toktok long ol man. Tabu Spirit i stap givim paoa long hem, blong i talemaot ol trutok ya we fastaem i stap haed, be ol man oli no save kasem tok blong hem. 3Be man we i stap talemaot ol tok we God i givim, hem i stap toktok long ol man. Nao i stap givhan long olgeta, i stap leftemap tingting blong olgeta, mo i stap mekem olgeta oli harem gud. 4Man we i stap toktok long ol narafala lanwis, hem i stap givhan long hem nomo. Be man we i stap talemaot ol tok we God i givim, hem i stap givhan long olgeta man blong jos. 5Sipos yufala evriwan i gat paoa ya blong toktok long ol narafala lanwis, bambae mi mi glad tumas. Be sipos yufala evriwan i save talemaot ol tok ya we God i givim, bambae mi mi glad moa. Sipos man i toktok long narafala lanwis, be i no gat man blong tanem tok blong hem blong ol man blong jos oli save, bambae narafala man we i stap talemaot ol tok we God i givim long hem, hem i givhan moa long olgeta. 6Ol brata mo sista. ?Sipos mi mi kam luk yufala, nao mi stap tok long yufala long wan narafala lanwis olsem, olsem wanem bambae mi save givhan long yufala? Sipos mi no save soemaot sam niufala samting long yufala, we God i soemaot long mi, mo mi no save talem sam waestok long yufala, bambae i nogud ya. Sipos mi no save talemaot sam tok we God i givim, mo mi no save tijim yufala long sam samting, bambae mi no save givhan long yufala nating. 7Yufala i traem tingbaot ol samting olsem bambu we man i stap blu long hem, mo gita we man i plei long hem. Ol samting ya oli no laef, ol man nomo oli stap mekem olgeta oli sing. Be sipos olgeta oli no saon gud, bambae yufala i no save wanem singsing we olgeta oli stap sing long hem. 8Mo sipos pupu i krae we i no klia gud, bambae i no gat man i save se i taem blong faet. 9Be long yufala, i olsem nomo. Sipos tok blong yufala i paspas from we yufala i stap tok long ol narafala lanwis ya, bambae i no gat man i save wanem samting we yufala i stap talem. Ol tok ya blong yufala bambae i blong nating nomo. 10I gat ol naranarafala lanwis oli stap olbaot long wol, mo olgeta evriwan oli gat mining. 11Be sipos mi mi no save lanwis blong wan man, man ya i olsem strenja long fes blong mi. 12Mo long yufala tu, i olsem. Nao from we yufala i wantem tumas ol paoa ya we Tabu Spirit i save givim, yufala i mas gohed moa blong yusum ol paoa ya we oli save mekem ol man blong jos oli strong. 13Nao from samting ya, man we i gat paoa blong toktok long narafala lanwis olsem, hem i mas prea blong Tabu Spirit i givim paoa long hem, blong i tanem tok ya. 14Sipos mi mi prea olsem long wan narafala lanwis, olsem we Tabu Spirit i givim long mi, hemia mi tok, be mi mi no save ol tok ya we mi stap talem. 15?Ale, bambae mi mekem olsem wanem? Bambae mi mi prea long narafala lanwis, olsem we Tabu Spirit i givim long mi, be bambae mi prea tu long lanwis we mi mi save. Bambae mi sing long narafala lanwis, olsem we Tabu Spirit i givim long mi, be bambae mi sing tu long lanwis we mi mi save. 16Taem yufala i prea blong talem tangkiu long God long ol narafala lanwis, ol man olbaot oli no save talem Amen long prea blong yufala, from we oli no save kasem tok blong yufala. 17Maet prea ya blong yufala blong talem tangkiu long God i gud tumas, be i no save givhan nating long ol man ya. 18Mi mi stap talem tangkiu long God, from we mi stap toktok long ol narafala lanwis ya moa, i winim yufala evriwan. 19Be long fes blong ol man blong jos, mi mi glad tumas blong talem faef wod nomo we i kamaot long tingting blong mi, mo oli save tijim ol narafala man. Hemia i gud moa, i winim we mi talem ten taosen wod long ol narafala lanwis ya. 20Ol brata mo sista. I nogud yufala i stap we tingting blong yufala i olsem tingting blong pikinini. Long fasin blong yufala, i gud yufala i olsem smol pikinini nomo we hem i no save fasin blong mekem sin. Be long tingting blong yufala, yufala i mas kam olsem we yufala i bigman finis. 21Long Baebol, Hae God i talem se, “Bambae mi mi talemaot tok blong mi long ol man ya. Bambae mi yusum ol man we oli gat ol naranarafala lanwis. Nating we bambae mi yusum ol strenja blong toktok long olgeta, be bambae oli no save lesin long mi.” 22Nao from samting ya, i klia we paoa ya blong toktok long ol narafala lanwis, hem i wan saen blong ol man we oli no bilif long God, i no blong olgeta we oli bilif finis. Mo paoa ya blong talemaot ol tok we God i givim, hem i wan saen blong ol man we oli bilif finis long God, i no blong olgeta we oli no bilif. 23?Sipos sam man olbaot, no sam man we oli no bilif long God oli kam insaed long ples we yufala ol man blong jos yufala i stap mit long hem, nao yufala evriwan i stap toktok long ol narafala lanwis ya, bambae olsem wanem? ?Yufala i ting se oli no save talem se yufala i krangke? 24Be sipos yufala evriwan i stap talemaot ol tok we God i givim, nao wan man olbaot no wan man we i no bilif long God i kam insaed, hemia i narafala. Ol tok ya blong yufala bambae i stikim hem from ol sin blong hem, nao bambae i jajem hem. 25Ol tok ya blong yufala bambae i tekem tingting blong hem we i blong haed fastaem, i kam long klia ples. Nao man ya bambae i bodaon blong presem God, i talem se, “Tru, God i stap long medel blong yufala long ples ya.” 26Ol brata mo sista. Tok ya we mi stap talem i olsem. Taem yufala i kam wanples blong mekem wosip, yufala evriwan i gat wok blong mekem. Maet wan man i rere blong sing, mo narafala man i rere blong tij, mo narafala man i rere blong soemaot sam niufala samting we God i soemaot long hem, mo wan narafala man i rere blong toktok long narafala lanwis, mo narafala man i rere blong tanem tok ya. Be yumi evriwan i gat sem tingting nomo, blong mekem ol man blong jos oli kam strong moa. 27Taem we sam man oli toktok long ol narafala lanwis, i gud sipos tu man no tri man nomo oli toktok. Mo taem wan man i tok, hem nomo i save toktok gogo i finis, nao biaen, narafala man i save tok. Mo i mas gat man blong tanem ol tok ya, blong ol man oli save. 28Be sipos i no gat man blong tanem ol tok ya, man blong toktok long narafala lanwis i mas stap kwaet long fes blong ol man blong jos. Hem i save yusum ol lanwis ya blong toktok long hem, hem wan, mo blong toktok long God. 29Mo sipos tutri man oli tok, we oli man blong talemaot tok we God i givim, bambae i gud. Mo ol narafala man oli mas jajem ol tok ya blong olgeta, se i gud no i nogud. 30Be sipos wan man we i stap sidaon wetem yufala, i harem we God i soemaot wan niufala samting long hem, man we i stap toktok i mas stop fastaem, blong man ya i save talemaot samting ya. 31Nao bambae yufala evriwan i gat janis blong talemaot ol tok we God i givim long yufala. Mo long fasin ya, bambae yufala evriwan i save lan, mo tingting blong yufala i save kam strong moa. 32Mo man ya we i gat paoa blong talemaot ol tok we God i givim, hem i save gohed i toktok, no i save holem hem, blong i stap kwaet, 33from we God i no stamba blong fasin ya we olgeta samting oli paspas, hem i stamba blong pis. Yufala i mas folem sem fasin we ol man blong God oli stap folem long olgeta jos. 34Insaed long ol miting blong jos, ol woman oli mas stap kwaet. Olgeta oli no gat raet blong toktok, oli mas gat ona, olsem we Loa blong Moses i talem. 35Sipos woman i wantem askem kwestin, hem i save askem long man blong hem, long haos blong tufala. Sipos ol woman oli stap toktok insaed long ol miting blong jos, hemia i wan bigfala sem long yufala. 36?Weswe? ?Yufala i ting se tok blong God i kamaot long yufala fastaem? ?Yufala i ting se tok blong God i kam kasem yufala nomo? 37Sipos i gat wan long yufala we hem i ting se i gat paoa blong talemaot ol tok we God i givim long hem, no i ting se Tabu Spirit i stap lidim hem, hemia i gud. Be man ya i mas save we tok ya we mi stap raetem i go long yufala, hem i wan tok blong Masta blong yumi. 38Sipos hem i no save ona long ol tok ya, i gud yufala i no lesin long hem. 39Ol brata mo sista. Yufala i mas putum tingting blong yufala i stap long paoa ya blong talemaot ol tok we God i givim. Be yufala i no save blokem ol man ya we oli gat paoa blong toktok long ol narafala lanwis. 40Yufala i mas mekem olgeta samting long fasin we i stret gud, we ol man oli glad long hem.

will be added

X\