1 Wɔɔ danlʋ Febe k'a nɩ zi bam Sankre kristagʋɔɔ sokʋma bɩ nɔ ʋ bɩ, mɔɔ n'a hɩ m, a kasɛtɩ mɩŋŋa. 2 K'a si a zi Zuuba tɔ ma, amba a a ga barɛ m wosogʋɔɔ kan kʋ kɩ bire ʋ bɩ m, k'a bʋr a lɛ n taa awɔɔ daahan ma, k'a a da han a mim haay nɔ ʋ. A mɩŋŋa a da gʋɔɔ han gʋta, a a da mɔɔ mɩŋŋa han sɔ. 3 K'a yaa da Priska kan Akilas kɩ m, mɔɔ zibəəkɔɔnrɔ m Krista Yeezuu zibəə bɩ nɔ ʋ. 4 Ŋ y'a mɩŋŋɔɔ mee ka zɛ ma, k'a mɔɔ bɔ lɛm. Mɔɔ yɩ m deem bɛɛ nɩ ŋ barka darɛ y, do vantɔɔ wɔɔ kristagʋɔɔ sokʋmarɔ wɔɔ haay yɩ ŋ barka dam sɔ. 5 K'a yaa da sɩrakarɛzannɔ kʋ ŋ n'a som kʋ ma ŋ har ʋ rɔ wɔɔ m. K'a yaa da mɔɔ gʋaasɩba Epayinɛtɩ bɩ m, a ɩ lɛɛ ka an sɩra ka Krista ʋ Azii kʋrɔ wɔɔ ʋ. 6 K'a yaa da Maarii k'a zi ba gʋta awɔɔ tɔ ma bɩ m. 7 K'a yaa da Andronikus kan Zuniyas kɩ m, mɔɔ danyɩnɔ m, bɩ, n nyɩnta n nɩ ŋ du lɔnnɔcɛ ʋ kan mɔɔ kɩ. Kristazibəəzannɔ wɩsɩrɔ m, ŋ lɛɛ ka mɔɔ m ŋn'a ba kristagʋɔɔ. 8 K'a yaa da Ampliyatus m, mɔɔ ŋʋarɛzaa m Zuuba zuure nɔ ʋ. 9 K'a yaa da Urbɛn m, wɔɔ zibəəkɔɔn m Krista zibəə bɩ nɔ ʋ, kan mɔɔ ŋʋarɛzaa Sɩtakɩs kɩ m. 10 K'a yaa da Apelɛs m, a a sɩra ka Krista ʋ hɩnka hɔ gʋta nɔ ʋ. K'a yaa da Aristobul hargʋɔɔ m. 11 K'a yaa da Herodɩnyɔ m, mɔɔ danyɩ m. K'a yaa da Narsis hargʋɔɔ kʋ ŋ sɩra ka Zuuba ʋ rɔ wɔɔ m. 12 K'a yaa da Trifɛn kan Trifozɩ kɩ m, Zuuba zi ŋn'a bam. K'a yaa da Pɛrzidɩ m mɩŋŋa, a zi ba gʋta Zuuba tɔ ma. 13 K'a yaa da Rufus m, Zuuba zibəənyɩ wɩsɩ m. K'a yaa da a da bɩ m, mɔɔ da m sɔ. 14 K'a yaa da Asɩnkritɩ m, Flegɔn m, Hermɛs m, Patrobas m, Hermas m, kan danyɩnɔ vantɔɔ kʋ ŋ nɩ kan ŋ kɩ rɔ wɔɔ m. 15 K'a yaa da Filolɔg kan Zuli kɩ m, Neere kan a danlʋ kɩ m, Olɩmpas kan wosogʋɔɔ kʋ ŋ nɩ kan ŋ kɩ rɔ wɔɔ m haay. 16 K'a yaa da kʋ m mɩŋŋa danyɩbaa nɔ ʋ, kan kʋ daʋrɛ kɩ, ŋʋarɛ kɩ. Krista sokʋmarɔ wɔɔ haay ɩ yaa darɛ awɔɔ m. 17 M danyɩnɔ, a yɛ mɔɔ nawʋrɛ awɔɔ han k'a dundo a zi, kan gʋɔɔ kʋ ŋ nɩ gʋɔɔ gʋngʋ kʋ ma zi bam nɔ wɔɔ kɩ, ŋnɩ sɩrakarɛzannɔ nyʋnnyɔɔ m, bɩsɩ kʋ ŋ n'a kam hɔdɩndarɛ k'awɔɔ yɩ bɩ ma. K'a gʋ ŋ ma laatʋ. 18 Bala, gʋɔɔ ncɩnaaʋ rɔ wɔɔ, Zuuba Krista zi bɛɛ ŋ n'a barɛ y, a mɩŋŋɔɔ nɔ zi ŋn'a bam. Bra ŋ n'a bam bahɔdonno m, meerbaarɔ nyɩntɔɔ kan a ŋʋaar mindɩndarɛrɔ kɩ nɔ ʋ. 19 Gʋaa haay a dɔ, a ʋ, awɔɔ ɩ yɛm Zuuba ma. Mɔɔ heer nyɩnta kan awɔɔ kɩ naa tɔ ma, bɩ mɔɔ lɛ n taa k'awɔɔ m yɩ mindɔrɛzannɔ, zi mɩŋŋa barɛ nɔ ʋ. K'a yɩ gʋɔɔ kʋ mim bɩr zar darɛ ŋ ma zannɔ, mimbʋnyaa nɔ ʋ. 20 Woso k'a a so laafɩɩ ʋ bɩ Sʋtaana hɔɔnsɩrɛ awɔɔ gannɔ taa dɩɩtaa. Bɩ kʋ wɔɔ Zuuba Yeezuu barka m bɩr kan awɔɔ kɩ. 21 Mɔɔ zibəəkɔɔn Timote ɩ yaa darɛ awɔɔ m, mɔɔ danyɩnɔ Lusiyus, Zasɔn, kan Sosipatɛɛr k'ɩ yaa darɛ awɔɔ m. 22 Bɩ, mɔɔ mɩŋŋa Tɛɛrtiyus, kʋ Pol a da ci naa do barɛ ʋ bɩ, mɔɔ ɩ yaa darɛ awɔɔ m Zuuba k'a nɩ wɔɔ zɛm kʋ ra bɩ nɔ ʋ. 23 Gayus k'a mɔɔ si a har ʋ, kristagʋɔɔ sokʋma bɩ haay n nɩ kʋ zɛŋ ʋ a har ʋ b'ɩ yaa darɛ awɔɔ m. Erastɩ, kʋ bɩ busoocɩntər bɩ, kan Kaartus kɩ ɩ yaa darɛ a m. [ 24 A yɛ mɔɔ nawʋm, kʋ wɔɔ Zuuba Yeezuu Krista barka m nyɩnta kan awɔɔ haay kɩ. Amina!] 25 Woso ɩ paŋŋa m k'awɔɔ sɩrakarɛ paŋŋa da ra, amba lemim nyɩnta kʋ mɔɔ n n'a pa dam bɩ n n'a hɩm bɩ m, Yeezuu Krista lemim kʋ mɔɔ n'a pa dam, Woso hɔ k'a nyaakʋm da gɔsɩ n a dɔ y, an a hɩnka wɔɔ m, ʋ a dɔ bɩ m. Hɔ bɩ do Woso nyɩnta an a nyaakʋm da biisi tee••• bɩ, 26 kɛɛrɛ naa, wosolɛsinnɩsorazannɔ ciro wɔɔ a hɩnka lɛɛgure nɔ ʋ gʋaa haay m, amba Woso k'a nyarɛ ba ʋ lɛ ka bɩ m, a lɛ ka kʋ n nɩ ta m doro haay zi kʋ ŋ n'a dɔ, ŋnɩ sɩra ka, ŋnɩ zu ʋ. 27 Kʋ Woso y'a deem k'an ta mindɔrɛ m bɩ m lɛbɔʋrɛ yɩ, Yeezuu Krista tɔ ma, dɔmɩm haay! Amina!
