Matiyee 27

1Dɔ k'a mɛ dɔgta mɩŋŋa m bɩ, wosocɛmannɩbənno jɩtannɔ wɔɔ kan tara bɩ gʋɔɔgusinno kɩ lɛ sa k'a Yeezuu ka zɛ ma. 2Ŋ n a sur, ŋnɩ ta m, ŋn'aa ka Rɔm lɛɛzaa Pɩlatɩ b'ʋ. 3Zidas Yeezuu nyasʋ an a ka, bɩ, k'a b'a yɩ ŋnɩ Yeezuu dʋdɔ yar k'a zɛ gər bɩ, a kʋrkʋr da, an a bɔ an a wanzurfu busooyaa bukərku rɔ wɔɔ ka wosocɛmannɩbənno jɩtannɔ wɔɔ ʋ kan gʋɔɔgusinno wɔɔ kɩ ʋ. 4A n a hɩ ŋ nɩ, a ʋ: "Gʋaa k'a n hɔsɩ ba naa kʋ mɔɔ ka ŋn'a zɛ naa, mimbʋnyaa mɔɔ ba." Bɩ brɔɔ a nyɩ bɔ nʋ, ŋ ʋ: "Kara ɩ pakra ba wɔɔ ma? Ɩbɩɩ mim m!" 5A n aa busoo bɩ lo Wosocɛ b'ʋ, an a hʋr, an ta an aa bar da a ma. 6Wosocɛmannɩbənno wɔɔ n busoo bɩ gʋr, ŋn'a hɩ, ŋ ʋ: "Wɔɔ lɛrɔ wɔɔ nɔ ʋ, a n a ga m, kʋ wɔɔ n busoo naa do zar Wosocɛ bɩ busoo ra y, bala, gərzɛrɛ busoo m." 7Ŋ nɩ kʋ ma, ŋnɩ busoo bɩ sa ŋnɩ mɔrdor hɔsɩra si m, k'an yɩ saanɔɔ gəənoyaa. 8Bɩ y'a ka, n n hɔsɩra bɩ do tɔ ka, n ʋ: 'Ma sɩra,' an ta, an her dɔmɩm ku. 9A m naa, wosolɛsinnɩsorazaa Zeremii meerbaa k'a ba bɩ n kʋ yɩ: 'Ŋ wanzurfu bukərku bɩ sa, ŋnɩ mɔrdor bɩ hɔsɩra bɩ si m, amba Zuuba a hɩ mɔɔ m bɩ m. Gʋaa kʋ Israyɛl nyɩnɔ kʋ ma, ŋn'a ter ba bɩ busoo m.' 11Bɩ, Yeezuu yaa jɩm lɛɛzaa Pɩlatɩ lɛɛ. Bɩ n a lar, a ʋ: "Zɩɩfʋrɔ cir n'ɩbɩɩ m gɛ?" Yeezuu n a nyɩ bɔ ʋ, a ʋ: "Ɩbɩɩ hɩ ɩ zim." 12Bɩ, wosocɛmannɩbənno jɩtannɔ wɔɔ kan gʋɔɔgusinno wɔɔ kɩ ɩ mim kam Yeezuu ra, b'a n hɔsɩ nyɩ bɔ ʋ y. 13Pɩlatɩ n a hɩ m, a ʋ: "Ɩbɩɩ bɩr minno kʋ ŋ nɩ ŋ karɛ ɩ ra bɩ mam na?" 14Bɩ, Yeezuu n deem taan••• nyɩ bɔ ʋ y, naa do a ka cir bɩ n zɛ kədə. 15Pakkɩ cibsa biyəə ma, lɛɛzaa Pɩlatɩ bɩ tɩr lɔ kʋ zamaa bɩ lɛ n taa bɩ bɔ, an a ka ŋ ʋ. 16A n bɔkarɛ lɔ deem ɩ nyɩnta b'ʋ, lɔ wɩsɩ, a tɔ m Barabas. 17Pɩlatɩ n laaka da gʋaa cir k'a so kʋ ma b'ʋ bɩ han, a ʋ: "Nka awɔɔ lɛ n taa kʋ mɔɔ n wɔ saa ma, Barabas gɛɛ, Yeezuu kʋ n n'a birm Krista bɩ nɩ?" 18Bala, Pɩlatɩ a dɔ mɩŋŋa a ʋ Yeezuu nyasʋ ŋ y'a ʋ ŋn'a ka a ʋ jɩmbaa minto. 19Pɩlatɩ k'a nɩ nyɩntam dʋdɔkarɛ bɩncɛ ʋ bɩ, a laarɛ nyɔɔ da ma, kʋ n n a hɩ m, n ʋ: "Ɩ bɩ gasʋ gʋaa tɩrga naa do mim ʋ y. Bala, gunuu ʋ bɩ, mɔɔ fɩr yɩ nɩnnarɛ nɔ ʋ a minto." 20Wosocɛmannɩbənno jɩtannɔ wɔɔ kan gʋɔɔgusinno wɔɔ k'ɩ gʋaa cir bɩ nyʋnnyɔɔm, kʋ ŋ nɩ Barabas bɔrɛ yɛ, kʋ ŋ nɩ Yeezuu garɛ yɛ. 21Lɛɛzaa Pɩlatɩ bɩ n a ya, an ŋ lar, a ʋ: "Ŋ gʋaa hɩɩya bɩ barla bɩ, kara awɔɔ lɛ n taa kʋ m bɔ m a ka a ʋ?" Ŋ n a hɩ, ŋ ʋ: "Barabas." 22Pɩlatɩ n laaka da ŋ han, a ʋ: "Bɩ bɔ mɔɔ n'a bam Yeezuu kʋ n n'a birm Krista bɩ nɩ?" Ŋ haay n a nyɩ bɔ ʋ, ŋ ʋ: "A wɔ gɔdarkʋra ma!" 23Pɩlatɩ n laaka da, a ʋ: "Mimbʋnyaa kara a a ba?" Ŋ n zee da kan paŋŋa kɩ, ŋ ʋ: "A wɔ gɔdarkʋra ma!" 24Pɩlatɩ k'a n'a yɩrɛ, a ʋ, awɔɔ b'a dam mim bɩ bankarɛ ma bɩ, bɩ zamaa bɩ y'a ŋʋam k'a lɛɛ zɛ kʋ ma bɩ, a hi kusi, an a wɔ hir m zamaa bɩ lɛɛ, an a hɩ, a ʋ: "Mɔɔ ba gʋaa naa do zɛrɛ barla y, awɔɔ mim m!" 25Zamaa bɩ haay n a nyɩ bɔ ʋ: "K'a zɛrɛ mim n wɔɔ yɩ, kan ʋ nyɩnɔ kɩ." 26A m naa do, Pɩlatɩ n Barabas bɔ, an a ka ŋnɩ Yeezuu zɛ madɩr m, an a ka kʋ n n a wɔ gɔdarkʋra ma. 27Pɩlatɩ sʋrdaarɔ wɔɔ n ta Yeezuu m lɛɛzaa bɩ har ʋ b'ʋ, sʋrdaarɔ wɔɔ haay n a so kʋ ma ŋnɩ bɩr Yeezuu ma, 28ŋn'a huuro bɔ ma, ŋnɩ zaba piinə du ma, 29ŋnɩ laa waa ŋn'a ku a mim ma, ŋ ʋ, cinno firgə m, ŋnɩ bənkə da a bɩsɩ wɔ ʋ, ŋnɩ kukurə zɛ a taa ŋn'ɩ yaa wʋm ma, ŋn'a hɩrɛ, ŋ ʋ: "Wɔɔ ɩ yaa darɛ ɩbɩɩ m zɩɩfʋrɔ cir!" 30Ŋ n'ɩ lihi dɩndam ma, ŋn'ɩ bənkə bɩ sarɛ ŋn'a zɛm nɩ a mim ma. 31Kʋ ŋ yaa wʋ ma ŋn'a nya bɩ, ŋ zaba bɩ bɔ ma, ŋn'a huuro wɔɔ du ma, ŋn'a hʋr m k'a yaa wɔ gɔdarkʋra ma. 32Bɔ kʋ ŋ y'a ʋ kʋ b'ʋ bɩ, ŋ Sirɛnnɩ gʋaa kʋ n n'a birm Sɩmɔɔn bɩ zɛ ʋ, sʋrdaarɔ wɔɔ n paŋŋa ba ma, an Yeezuu gɔdarkʋra bɩ busu. 33Ŋ n lee ku lɛɛ kʋ ŋ n'a birm Golgotaa b'ʋ, a jɩ ʋ k'a hɩ a ʋ, 'Minkorgo bɩncɛ.' 34Ŋ n dɩvɛn war kʋ ma kan hɔ hɛɛnr kɩ, ŋn'a ka ʋ, k'an a mi. K'a da a lɛ ma bɩ, a n a ŋʋa an a mi y. 35Ŋ n a wɔ gɔdarkʋra ma, ŋnɩ pʋɛɛga da a huuro wɔɔ ma ŋnɩ ŋ jir. 36Ŋ n a gaa, ŋnɩ nyɩnta b'ʋ, ŋn'ɩ dɔm ma. 37Ŋ n Yeezuu zɛ bɩ jɩ gʋrsɩra ba warga ma, Yeezuu mim la gɔdarkʋra bɩ ma, ŋ ʋ: 'Yeezuu m naa, zɩɩfʋrɔ cir m.' 38Ŋ konno wɔ hɩɩya gɔdarkʋra ma Yeezuu jɩr ʋ, deem a bɩsɩ, deem a jɩsa. 39Gʋɔɔ kʋ ŋ nɩ cenim b'ʋ rɔ wɔɔ n'a mim zukə zɛrɛ, ŋn'a sʋnsɔ wʋrɛ. 40Ŋ n'a hɩm Yeezuu m, ŋ ʋ: "Ɩbɩɩ k'ɩ n'ɩ dam ma, ɩ Wosocɛ bɩ wurgə, ɩ ya, ɩ dɔ dɔmɩm kaakʋ nɔ ʋ bɩ, ɩ bʋmbɔ ɩ zim kʋ Woso Nyɩ n'ɩbɩɩ m, k'ɩ zer gɔdarkʋra bɩ ma!" 41Wosocɛmannɩbənno jɩtannɔ wɔɔ kan wosocikarɩnsaambɔɔ wɔɔ kɩ, gʋɔɔgusinno wɔɔ kɩ ɩ yaa wʋm ma sɔ, ŋn'a hɩrɛ, ŋ ʋ: 42"A gʋɔɔ vantɔɔ bʋmbɔ, b'a b'a dam ma, an a mɩŋŋa bʋmbɔ y. Kʋ Israyɛl cir nɩ, k'an zer gɔdarkʋra bɩ ra kɛɛrɛ, k'ʋ sɩra ka ʋ. 43A sɩra ka Woso ʋ, an a hɩ a ʋ, Woso Nyɩ n'a mɩ, kɛɛrɛ bɩ, kʋ Woso y'a ŋʋarɛ, k'a n a yɔ wa." 44Konno kʋ ŋ yɩ ŋ wɔ gɔdarkʋra ma a jɩr ʋ rɔ wɔɔ y'a sʋnsɔ wʋm sɔ. 45Sinsebir k'a da bɩ, monsigə gʋta zɛ tara burə ʋ, an ta an wakatɩ kaakʋ ku yirbəəre m. 46Yirbəə wakatɩ kaakʋ zeezi bɩ, Yeezuu zee gʋta da, a ʋ: "Eloyii, Eloyii, lama sabaktaani?" A lɛ taa k'a hɩ, a ʋ: "Mɔɔ Woso, mɔɔ Woso, bɔ m, ɩ ɩ bɔ mɔɔ ʋ?" 47Gʋɔɔ gɔsɩnnɔ kʋ ŋ nyɩnta b'ʋ rɔ wɔɔ naa ma, ŋn'a hɩrɛ, ŋ ʋ: "A ɩ Elii birm!" 48Ŋ gʋaa deem n bra si, an aa hɔ mafʋ-mafʋda sa, an a nyɔɔ hɔ hɛɛnr ma an a da bənkə ma, an a ka Yeezuu ʋ k'an a mi. 49Bɩ, a muno wɔɔ y'a hɩrɛ, ŋ ʋ: "Jɩm cɩna, k'ʋ dɩga a Elii zɛm b'a bʋmbɔ gɛ?" 50Yeezuu n a ya, an zee gʋta da, an ga. 51Lɛɛm bɩ, Wosocɛ bɩ pɛɛra bɩ n zɛ kumbir, an a sa mim ʋ an b'a zɛ tara ma. Tara n nyiŋŋə, ciro n wunwu, 52gəənoyaarɔ n a gʋngʋ. Wosogʋɔɔ kʋ ŋ gɩnga rɔ wɔɔ gɔsɩnnɔ n a mɩm bʋmbɔ ʋ gʋta. 53Ŋ n bɔ yaarɔ wɔɔ ʋ, Yeezuu k'a b'a mɩm bɔ ʋ bɩ hinni ʋ, ŋnɩ gasʋ Zerizalɛm ʋ, kʋ mɩŋŋa b'ʋ, gʋɔɔ gʋta nɩ ŋ yɩ. 54Sʋrdaa zɔrɔ cir, kan sʋrdaarɔ kʋ ŋ nɩ dɔm Yeezuu ma rɔ wɔɔ tara bɩ nyiŋŋəre yɩ, kan hɔ k'a nyɩnta an ba haay bɩ kɩ, ŋ da n bɔ ʋ gʋta, ŋn'a hɩ, ŋ ʋ: "Sɩra m, Woso Nyɩ m paan•••" 55Lannɔ nyɩnta b'ʋ guta, ŋn'a to laatʋ ŋn'ɩ dɩgam, zu ŋ y'a ʋ Yeezuu jɛ ʋ Galilee ʋ tee•••, ŋn'a dam han. 56Magdalaa Maarii nyɩnta ŋ barla, kan Maarii, Zakkɩ kan Zozɛf kɩ da bɩ, kan Zebedee nyɩnɔ da kɩ. 57Woso lɛ k'a b'a zo bɩ, Arimatee kʋ gʋaa arzakazaa deem k'a tɔ m Zozɛf bʋr, Yeezuu karɩndanyɩ deem m sɔ. 58A n ta Pɩlatɩ zi, an aa Yeezuu gər bɩ yɛ han. Pɩlatɩ n lɛ ka, n n a ka ʋ. 59A n gər bɩ sa, an pɛɛra fɛʋda burgu ma, 60an a da a mɩŋŋa yaa daa k'a hɔ ci ʋ b'ʋ, an jaa gʋta gərgu an a ta rɛ, an a hʋr. 61Magdalaa kʋ Maarii kan Maarii vanta bɩ k'ɩ nyɩntam b'ʋ, ŋn'a meer nya yaa bɩ rɛ. 62Sabaa bankarɛ hinni k'a cem dɔ n mɛ bɩ, wosocɛmannɩbənno jɩtannɔ wɔɔ kan farizɛɛnrɔ wɔɔ kɩ zu kʋ ʋ ŋnɩ ta Pɩlatɩ zi. 63Ŋ n a hɩ, ŋ ʋ: "Wɔɔ lɛɛzaa, ŋʋaarzaa naa do k'a nyɩnta an a hɩ, a ʋ: Dɔmɩm kaakʋ hinni ʋ, mɔɔ yɩ m mɩm bɔŋ ʋ bɩ, a tɔ ɩ wɔɔ nɔ ʋ. 64Lɛ ka kʋ n n dɔ yaa bɩ ma, k'an ta an dɔmɩm kaakʋ bɩ ku, k'a karɩndanyɩnɔ wɔɔ b'a da ma, ŋnɩ bʋr, ŋn'a gər bɩ kʋna, ŋn'a hɩ zamaa bɩ m, ŋ ʋ: A a mɩm bɔ ʋ gəəno bire ʋ y. Kʋ m bɛɛ m, ŋʋaar naa do lɛ dam lɛɛkarɛ hɔ bɩ m." 65Pɩlatɩ n a hɩ ŋ nɩ, a ʋ: "Awɔɔ ɩ sʋrdaarɔ m, k'a ta a ka ŋnɩ dɔ yaa bɩ ma amba awɔɔ a da ma bɩ m." 66Ŋ n a hʋr, ŋnɩ ta, ŋn'aa jaa k'a ta yaa bɩ lɛ bɩ kʋsɩ, ŋnɩ gʋɔɔ da a dɔma ʋ.

will be added

X\