Matiyee 18

1Wakatɩ bɩ do ʋ bɩ, karɩndanyɩnɔ wɔɔ a zɔ Yeezuu ma, ŋn'a lar, ŋ ʋ: "Nka m jɩtaarɛ Woso cirbəə bɩ nɔ ʋ?" 2Yeezuu n nyɩ poore bir an a jɩm ŋ bire ʋ, 3an bɔkarɛ, an a hɩ ŋ nɩ, a ʋ: "Sɩra mɔɔ n'a hɩrɛ awɔɔ m, k'awɔɔ n a lʋr a a ba, am nyɩ poore hɔ bɩ nɩ, awɔɔ bɩ gasʋm Woso cirbəə b'ʋ y. 4Gʋaa k'a n'a mɩŋŋa zerm am nyɩ hɔ bɩ m bɩ, bɩ zaa n jɩtaarɛ Woso cirbəə b'ʋ. 5Gʋaa k'a nyɩ poore si mɔɔ tɔ ma am nyɩ naa do m bɩ, mɔɔ mɩŋŋa a yɩ m si." 6"Bɩ, kʋ gʋaa a ka nyɩnɔ kʋ ŋ sɩra ka mɔɔ rɔ nɔɔn duro gʋaa deem n a do mimbʋnyaa nɔ ʋ, kʋ n jɛnlajaa gʋta kʋsɩ a wer ma, n n a da higʋta ʋ, a jɩra. 7Kʋsɩ nɩ kan durnya kɩ, kʋ minno n ta ʋ, ŋn'ɩ gʋɔɔ dom mimbʋnyaa nɔ ʋ bɩ minto. Minno wɔɔ duro bɩ nyam durnya nɔ ʋ y, bɩ kʋsɩ ɩ kan gʋaa k'a ka ŋn'ɩ zɛm bɩ kɩ. 8K'ɩ wɔ gɛɛ, ɩ gam y'ɩ dam mimbʋnyaa barɛ ma, k'ɩ zɛ ra, ɩ zo laatʋ ɩ ma k'ɩ gasʋ mɩsɩrbaa k'a nyarɛ ba ʋ b'ʋ, ɩ wɔ deem m, gɛɛ ɩ gam deem m, bɩ jɩra, gasʋ k'ɩbɩɩ nawʋrɛ ɩ wɔ hɩɩya m, gɛɛ ɩ gam hɩɩya m sɛhar k'a lihire ba ʋ bɩ nɔ ʋ bɩ m. 9K'ɩ mɩnyaa y'ɩ dam mimbʋnyaa barɛ ma, k'ɩ bɔ ʋ ɩ zo laatʋ ɩ ma, k'ɩ gasʋ ɩ mɩnyaa deem m mɩsɩrbaa k'a nyarɛ ba ʋ bɩ nɔ ʋ, bɩ jɩra, gasʋ k'ɩbɩɩ nawʋrɛ ɩ mɩm hɩɩya m sɛhar ʋ bɩ m. 10K'a dundo a zi, a b'a ka a nyɩnɔ nɔɔn duro gʋaa deem bɔ ʋ y. Bala, sɩra mɔɔ n'a hɩrɛ awɔɔ m, arzana ʋ bɩ, ŋ malɛɛkarɔ ɩ mɔɔ Zɩ k'a nɩ arzana ʋ bɩ mɛ yɩm wakatɩ haay. [ 11Bala Gʋaanyɩ bɩ, bʋr a ʋ, k'a gʋɔɔ kʋ ŋ nyaam nɔ wɔɔ bʋmbɔ.] 12Awɔɔ y'a hɔɔn dam lʋnlɔ? Kʋ gʋaa ɩ seero m zɔrɔ, deem n a bɔ ʋ an nyaam, a bɩ bunɛɛhʋ a yaa nɛɛhʋ rɔ wɔɔ tom zigi ra, an ta an aa a ka deem k'a nyaam bɩ ma ra? 13K'a ser bɩ yɩ, a heer yɩm nyɩnta kan kɩ an lɛ da bunɛɛhʋ a yaa nɛɛhʋ rɔ kʋ ŋ n nyaam nɔ wɔɔ ra. 14Awɔɔ Zɩ k'a nɩ arzana ʋ bɩ lɛ baa sɔ kʋ nyɩnɔ nɔɔn duro gʋaa deem n nyaam y. 15K'ɩ danyɩ a zar ɩ ma, k'ɩ ta zi, ɩ yaa hɔ k'a ba ɩbɩɩ m bɩ hɩ m, ɩbɩɩ kan kɩ a hɩɩya. K'a ɩbɩɩ mim bɩ si, k'ɩ dɔ ɩ ʋ, awɔɔ a zɛ kʋ ra. 16Bɩ, k'a n a tʋr ka ɩ ma, k'ɩ gʋaa na ɩ ma deem gɛɛ hɩɩya, amba Wosoci a hɩ, a ʋ: 'Gʋaa hɩɩya gɛɛ kaakʋ y'a ga mim kasɛtɩ barɛ m.' 17Kʋ gʋaa bɩ lɛ baa k'a tʋr ka brɔɔ ma sɔ, k'ɩ hɩ kristagʋɔɔ sokʋma bɩ m. K'a ʋ a b'a tʋr kam kristagʋɔɔ sokʋma bɩ ma, k'ɩ dɩga ma kɩfɩr gɛɛ, yawʋrsirezaa. 18Sɩra mɔɔ n'a hɩrɛ awɔɔ m: hɔ haay, k'awɔɔ n'a gum ma tara burə ʋ naa ʋ, n y'a gum ma sɔ Woso cirbəə nɔ ʋ. Hɔ haay k'awɔɔ nɩ yɛm ma tara burə ʋ, n yɛm ma sɔ Woso cirbəə nɔ ʋ. 19Mɔɔ m ya, m n'a hɩrɛ awɔɔ m sɔ: K'awɔɔ gʋaa hɩɩya a zɛ kʋ ra tara burə ʋ naa ʋ, k'a hɔ niŋŋə haay yɛ yaadarɛ nɔ ʋ, mɔɔ Zɩ k'a nɩ arzana ʋ bɩ hɔ bɩ do karɛ ŋ ʋ. 20Bala, lɛɛ kʋ gʋɔɔ a so kʋ ma ʋ hɩɩya gɛɛ kaakʋ mɔɔ tɔ ma bɩ, mɔɔ yɩ ŋ bireyaa ʋ." 21Pɩyɛɛr n a zɔ Yeezuu ma, an a hɩ m, a ʋ: "Zuuba, kʋ mɔɔ danyɩ a zar mɔɔ ma, gallɛm karɔ mɔɔ nɩ sugur kaŋ ʋ? Gallɛm saanhɩna gɛɛ?" 22Yeezuu n a hɩ m, a ʋ: "Mɔɔ n a hɩ ɩbɩɩ m, mɔɔ ʋ gallɛm saanhɩna y, bɩ, gallɛm busaanhɩna a gallɛm saanhɩna." 23"Naa do minto bɩ, Woso cirbəə bɩ bɔ kʋ rɛ kan cir k'a wuti k'a a zibəənyɩnɔ lar ŋ zibəə ma. 24A sɩŋŋɩda k'a k'a ba bɩ, bʋr n y'a ʋ zibəənyɩ deem m, an ta talan waa bu zɩm m. 25Bɩ, gʋaa bɩ ba hɔsɩ m an b'a zɩm bɩ karɛ y. A m bɩ, cir bɩ n lɛ ka, kʋ n nɩ gʋaa bɩ hɛɛ kan a lʋ kɩ, a nyɩnɔ kɩ, kan hɔ niŋŋə k'an ta m haay kɩ, k'a cɩnta zɩm bɩ bɩncɛ ʋ. 26A m naa, zibəənyɩ bɩ n kukurə zɛ cir bɩ taa, an cicir ba a lɛ ra, a ʋ: 'M cicir zɛ, mɔɔ yɩ m zɩm bɩ kam haay!' 27Gʋaa bɩ cicir n cir bɩ nyasʋ, an zɩm bɩ to m, an a da zaa ra. 28Zibəənyɩ bɩ n bɔ, an a muno wɔɔ deem zɛ ʋ zaa ra, a zɩm n ta ra deniyee zɔrɔ, an a wɔ so a bʋkɔ ʋ, an n'a ŋʋam k'a hoonsi ta rɛ, an n'a hɩm nɩ, a ʋ: 'M zɩm bɩ ka m ʋ.' 29A mim bɩ n kukurə zɛ a taa, an cicir ba a lɛ ra, a ʋ: 'M cicir zɛ, mɔɔ yɩ m zɩm bɩ kam.' 30Bɩ, gʋaa b'a gu, an ta, an aa a ka, n n a du lɔnnɔcɛ ʋ, k'an tolle ba, an zɩm bɩ ka, an a nya. 31Zibəənyɩnɔ mɩsɩrɔ wɔɔ kʋ ŋ naa yɩ bɩ, ŋ heer a zar gʋta, ŋnɩ ta, ŋn'aa hɔ haay woo••• k'a ba bɩ hɩ cir bɩ m. 32Cir bɩ n zibəənyɩ bɩ bir an a hɩ m, a ʋ: 'Zibəənyɩ bʋnyaa, mɔɔ ɩ zɩm bɩ to ɩbɩɩ m haay, k'ɩbɩɩ cicir ba mɔɔ lɛ ra bɩ minto. 33Ɩbɩɩ n ɩ da ma sɔ, ɩ ɩ mim bɩ cicir zɛ, amba mɔɔ ɩbɩɩ cicir zɛ bɩ n na?' 34Cir bɩ nɔ n ma ʋ gʋta, an gʋaa bɩ du lɔnnɔcɛ ʋ k'an fɩr yɩ, k'an zɩm bɩ ka haay." 35Yeezuu n a ya, an a na ma, a ʋ: "Mɔɔ Zɩ k'a nɩ arzana ʋ bɩ y'a barɛ awɔɔ m ncɩnaaʋ, k'awɔɔ bɩr sugur kam kʋ ʋ kan a heer kɩ haay y."

will be added

X\