1 Ŋ yaa lee ku higʋta tʋr ʋ, Gerazaa zannɔ kʋ ʋ. 2 Kʋ Yeezuu nɩ zerm kɔɔlʋʋ b'ʋ bɩ, gʋaa kʋ zinəro n ta m bɔ gəənoyaa ra, an b'a zɛ ʋ. 3 A wʋtajɩ m gəənoyaa ra bɩ m. Baa kan pɔyaabar kɩ, gʋaa paŋŋazaa ba ʋ, an b'a dam ma, an a nyasʋ y. 4 Bala, dɔmɩm biyəə bɩ, ŋ pɔyaa da a gam ʋ, ŋn'a wɔ kʋsɩ pɔyaabar m, an a cencer haay. Gʋaa ba ʋ an nɩ bʋrm ma y. 5 Sinuu ʋ kan a gunuu ʋ kɩ, gəənoyaarɔ an nɩ wʋtaŋ ʋ kan ciro wɔɔ burə kɩ, zee an n'a dam, an nɩ yaaba darɛ a mɩŋŋa ma jaarɔ m. 6 K'a a to an Yeezuu yɩ laatʋ bɩ, a bra si, an aa sʋnta a taa, 7 an nɩ zee darɛ, a ʋ: "Yeezuu, Woso k'a lɛ da haay Nyɩ, bɔ ɩbɩɩ lɛ n taa k'ɩ ba mɔɔ nɩ? Mɔɔ y'a yɛrɛ ɩbɩɩ han Woso tɔ ma gʋta: ɩ bɩ zibʋnyaa ba mɔɔ nɩ y!" 8 Bala, Yeezuu y'a hɩm zinə bɩ m, a ʋ: "Bɔ gʋaa bɩ mɛ ʋ!" 9 Yeezuu n a lar, a ʋ: "Ɩbɩɩ tɔ m bɔ?" A n a nyɩ bɔ ʋ, a ʋ: "Mɔɔ tɔ m Leziyɔn, bala wɔɔ gʋta." 10 A n a yɛ Yeezuu han kan a heer kɩ haay, a ʋ: "A bɩ la a ra tara bɩ nɔ ʋ y!" 11 Dɔmɩm bɩ do ʋ bɩ, kurkuuro cir gʋta nɩ ci bɩ zeezi, ŋn'ɩ hɔ bɩm. 12 Zinəro wɔɔ n n'a hɩrɛ, ŋ ʋ: "A ka k'ʋ gasʋ kurkuuro wɔɔ mɛ ʋ!" 13 A n zaa ka ŋ ʋ. Zinəro wɔɔ n bɔ, ŋnɩ gasʋ kurkuuro wɔɔ ʋ. Kurkuuro wɔɔ haay n'a to ci bɩ ma, ŋnɩ bra si, ŋnɩ zer, ŋn'aa a zar higʋta b'ʋ, ŋnɩ gɩnga haay. Kurkuuro wɔɔ a zɔ tisi hɩɩya ma. 14 Kurkuuro dundonno wɔɔ n bra si, ŋn'aa hɔ k'a ba bɩ hɩ taranɔzannɔ wɔɔ m, kan lezimazannɔ wɔɔ kɩ m. Gʋɔɔ wɔɔ n bʋr, ŋnɩ bɩ dɩga hɔ k'a nyɩnta an ba bɩ ma, 15 ŋnɩ bʋr Yeezuu jɩr ʋ, ŋnɩ bɩ gʋaa kʋ zinəro Leziyɔn n ta m bɩ yɩ, an huu du a ma, an nɩ nyɩntam kan laafɩɩ kɩ. Dabɔʋ n ŋ nyasʋ. 16 Gʋɔɔ kʋ ŋ nyɩnta, ŋ nɩ hɔ k'a nyɩnta an ba gʋaa kʋ zinəro n ta m bɩ m, kan kurkuuro wɔɔ kɩ m bɩ dɩnda gʋɔɔ wɔɔ m. 17 Ŋ n a da a ra, ŋn'a yɛm Yeezuu han k'an a hʋr a tara bɩ ra. 18 Kʋ Yeezuu bʋr an nɩ dam kɔɔlʋʋ b'ʋ bɩ, gʋaa kʋ zinəro n ta m bɩ k'a waa b'a yɛ han k'a bɩr kan kɩ. 19 Bɩ Yeezuu n zaa ka ʋ y, b'a a hɩ m, a ʋ: "Doo ɩ yaa a hɩ ɩ har zannɔ m. K'ɩ hɔ kʋ Zuuba a ba ɩbɩɩ m a cicirzɛrɛ minto bɩ hɩ ŋ nɩ." 20 Gʋaa bɩ n a hʋr, an aa hɔ kʋ Yeezuu a ba a m haay bɩ dɩnda Taraburo wɔɔ gʋɔɔ wɔɔ m. Gʋaa haay n zɛ kədə. 21 Kʋ Yeezuu a wusigə kɔɔlʋʋ bɩ m an higʋta bɩ zɛ ra an lee ku tʋr deem bɩ ra b'ʋ bɩ, zamaa cir gʋta a zɛ kʋ ra, ŋnɩ bʋr zi. Nyɩnta Yeezuu b'ʋ higʋta bɩ lɛ ra. 22 Zɩɩfʋrɔ sokʋmacɛ cir deem n bʋr, a tɔ m Zayɩɩr. K'a Yeezuu yɩ bɩ, a kukurə zɛ a taa, 23 an a yɛ han kan a heer kɩ haay, a ʋ: "Mɔɔ nyɩmbʋɛɛrɛ poore a zɔ zɛ ma, bʋr ɩ bɩ ɩ wɔ ka nyɩ bɩ mim la, k'an a waa, k'an la sɔ." 24 Yeezuu n cem kan kɩ, zamaa gʋta n zu kʋ ʋ kan kɩ, ŋn'a so ʋ, ŋn'ɩ tʋntɔm kʋ ra. 25 Lʋ n ta ʋ, ma n'a dam zi a dɔɔraa bueerehɩɩya hɔ m naa. 26 A a yɔ gʋta nyɩsɩbənno wɔ ʋ, a nyɩsɩbarɛ nɔ ʋ. A a wɔhɔ zar haay a tar la, b'a n a waa y. Yaaba bɩ n'a dam la. 27 Lʋ bɩ k'a Yeezuu mim ma bɩ, a bʋr a kur zamaa gaa ʋ b'ʋ, an a wɔ da a huu ma. 28 Bala, lʋ b'a hɩ a mɩŋŋa m, a ʋ: "Kʋ mɔɔ m wɔ da a huu tɔkkɛ ma, mɔɔ yɩ m waam." 29 Lɛɛm bɩ, lʋ bɩ yaaba b'a da jɩm ʋ. A n a dɔ a ʋ, yaaba bɩ bɔ a mɛ ʋ, b'a a waa. 30 Lɛɛm bɩ, Yeezuu a dɔ a ʋ, paŋŋa bɔ a mɛ ʋ poore, an a wusigə zamaa bɩ bire ʋ, an laaka da, a ʋ: "Nka y'a wɔ da mɔɔ huu ma?" 31 A karɩndanyɩnɔ wɔɔ n a hɩ m, ŋ ʋ: "Ɩbɩɩ yɩ zamaa bɩ n'ɩbɩɩ nyɔɔtam, ɩ ɩ ya, ɩ nɩ laaka darɛ, ɩ ʋ, nka y'a wɔ da ɩbɩɩ ma gɛ?" 32 Yeezuu nɩ dɩndɩgarɛ a jɩr ʋ, k'a zaa yɩ. 33 Kɛɛrɛ bɩ, lʋ b'ɩ nyi bam a mɛ n nɩ hinkəm, k'a hɔ k'a ba a m bɩ dɔ bɩ, a bɩ kukurə zɛ Yeezuu taa, an a sɩra hɩ m haay. 34 Yeezuu n a hɩ m, a ʋ: "Mɔɔ nyɩnnɩ, ɩ sɩrakarɛ ɩ bʋmbɔ, ta kan laafɩɩ kɩ, bɩ, ɩ ɩ waa ɩ yaaba bɩ minto." 35 K'a nɩ meer bam bɩ, gʋɔɔ a to zɩɩfʋrɔ sokʋmacɛ cir bɩ har ʋ b'ʋ, ŋnɩ b'a hɩ, ŋ ʋ: "Ɩ nyɩmbʋɛɛrɛ bɩ ga. K'ɩ ɩ ya, ɩ Zuuba da kɔrɛ ma lʋnlɔ gɛ?" 36 Bɩ, Yeezuu n a tʋr ka mim bɩ ma y. A n a hɩ zɩɩfʋrɔ sokʋmacɛ cir bɩ m, a ʋ: "Ɩ da bɩ bɔ ʋ y, sɩra ka bala." 37 A n yɛ kʋ gɔsɩ n zu kʋ ʋ kan a kɩ y. Pɩyɛɛr a gaa bala, Zakkɩ kan a danzaa Zaan kɩ. 38 Kʋ ŋ yaa lee ku zɩɩfʋrɔ sokʋmacɛ cir bɩ har ʋ bɩ, Yeezuu gʋɔɔ yɩ, ŋn'ɩ tatʋr barɛ, ŋn'ɩ baa darɛ, ŋn'ɩ zee dam. 39 A n gasʋ, an a hɩ ŋ nɩ, a ʋ: "Bɔ tatʋr kan baadarɛ kɩ nɩ? Nyɩ bɩ n ga y, hinceem a ba." 40 Gʋɔɔ wɔɔ nɩ yaa wʋm Yeezuu ma. A n la gʋɔɔ wɔɔ ra, ŋnɩ bɔ, an nyɩ bɩ zɩ kan a da kɩ to, a karɩndanyɩnɔ wɔɔ kɩ, ŋnɩ gasʋ nyɩ bɩ bɩncɛ ʋ b'ʋ. 41 K'a nyɩ bɩ wɔ sa bɩ, a a hɩ m, a ʋ: "Taliita kum" A lɛ taa k'a hɩ, a ʋ: "M nyɩnnɩ, mɔɔ y'a hɩ ɩbɩɩ m, wuti!" 42 Lɛɛm bɩ nyɩmbʋɛɛrɛ bɩ wuti, an nɩ tam. Bala, nyɩ bɩ dɔɔraa bueerehɩɩya. A m bɩ, zamaa bɩ n zɛ kədə. 43 Yeezuu lɛ ka gʋɔɔ wɔɔ ʋ, a ʋ: "Ŋ b'a hɩ gɔsɩ nɩ y." A n a hɩ ŋ nɩ, a ʋ: "K'a hɔbɩrɛ ka nyɩ b'ʋ, k'an a bɩ!"
