1 Yeezuu gasʋ Zeriko ʋ, an nɩ kʋ bɩ zɛm la. 2 Gʋaa nɩ b'ʋ a tɔ m Zasee, yawʋrsinno cir m, arzakazaa m sɔ. 3 A n n'a kam Yeezuu ma k'a yɩ, kʋ nka m, k'a a dɔ. Zamaa bɩ minto, kʋ gʋaa kutiim m bɩ, a b'a dam ma, a n a yɩ y. 4 A n bra si an ta lɛɛ, an aa der gɔ ra, kʋ Yeezuu bʋr an nɩ cenim b'ʋ, k'a yɩ. 5 Kʋ Yeezuu lee ku bɩncɛ bɩ do ʋ bɩ, a a bɔɔta an a hɩ m, a ʋ: "Zasee, a ba zɔɔ ɩ zer, bala, mɔɔ cɩnta kʋ m zer ɩbɩɩ har ʋ her." 6 Zasee n zer zɔɔ-zɔɔ, an a si kan heernyɔɔ kɩ. 7 Kʋ zamaa bɩ naa yɩ bɩ, ŋn'ɩ kukur barɛ, ŋ ʋ: "Zer a ʋ mimbʋnyaabər har ʋ." 8 Zasee n a zɔ Zuuba ma an a hɩ m, a ʋ: "Dɩga, Zuuba, mɔɔ yɩ m arzaka bɩ haay, zɛkumbir sam, m a ka cicirzannɔ ʋ, bɩ, kʋ mɔɔ mim zu ʋ gʋaa ma, mɔɔ y'a sompim nʋ gallɛm si." 9 Yeezuu n a hɩ, a ʋ: "Bʋmbɔrɛ gasʋ har naa do ʋ her, bala, gʋaa naa do Abraham yaŋŋa m sɔ. 10 Bala, Gʋaanyɩ bɩ bʋr a ʋ, an b'a ka gʋɔɔ kʋ ŋ nyaam nɔ wɔɔ ma, an ŋ bʋmbɔ." 11 Kʋ ŋ gɔɔta ŋn'a tʋr kam a meerbaarɔ wɔɔ ma bɩ, Yeezuu a ya, an hɔbɔkʋrɛnoom naa do da ŋ nɩ. Bala, a a zɔ Zerizalɛm ma. Bɩ, gʋɔɔ wɔɔ ɩ dɩgam ma, ŋ ʋ, Woso cirbəə bɩ y'a hɩnkarɛ a m b'ʋ lɛɛm. 12 Bɩ y'a ka Yeezuu n a hɩ, a ʋ: "Cir nyɩ deem ɩ ta kʋ laatʋ ʋ k'a yaa cirbəə bɩ, k'a bɔ a bʋr. 13 A n a zibəənyɩnɔ bir bu, an busoo jir ŋ nɩ minnɩ deem-deem, an a hɩ ŋ nɩ, a ʋ: 'K'a zi ba m, k'an ta an mɔɔ wusigəre dɔmɩm ku.' 14 B'a gʋrgazannɔ wɔɔ sɔ m, ŋnɩ gʋɔɔ nyɔɔ a jɛ ʋ kʋ ŋ n'a a hɩ cirbəə karɛzaa bɩ m, ŋ ʋ: 'Wɔɔ lɛ baa k'an a so wɔɔ ʋ y.' 15 K'a yaa cirbəə bɩ bɩ an bʋr bɩ, a a ka ŋnɩ zibəənyɩnɔ k'a busoo jinjir ŋ nɩ rɔ wɔɔ bir a taa, k'a dɩga a kʋ bɔ zi ŋ y'a ba m gɛ. 16 Lɛɛkarɛzaa bɩ n bʋr, a ʋ: 'Zuuba, minnɩ deem k'ɩbɩɩ ka mɔɔ ʋ bɩ, minnɩ bu y'a da ra.' 17 A n a hɩ m, a ʋ: 'Zibəənyɩ mɩŋŋa n'ɩbɩɩ m, bala, ɩbɩɩ noonhubaa hɩnka hɔ poorero nɔ ʋ, mɔɔ cirbəə karɛ ɩbɩɩ ʋ, k'ɩ ɩ so tara bu ʋ.' 18 A hɩɩya hɔ bɩ n b'a hɩ, a ʋ: 'Zuuba, ɩbɩɩ busoo bɩ nyɩ da minnɩ soor. 19 A n a hɩ bɩ m sɔ, a ʋ: Ɩ so tara soor ʋ.' 20 A vanta n bʋr, a ʋ: 'Zuuba, ba ɩbɩɩ busoo bɩ n na, pɛɛra mɔɔ burgu ma, m a nyaakʋm da.' 21 Mɔɔ ɩ nyi barɛ ɩbɩɩ m, ɩbɩɩ heer kʋsɩrabaa bɩ minto. Hɔ k'ɩbɩɩ n a cɩnta bɩ ɩbɩɩ n n'a sam. Hɔ k'ɩbɩɩ n a duu bɩ, ɩbɩɩ n n'a dam. 22 A n a hɩ m, a ʋ: Ɩbɩɩ mɩŋŋa meerbaa bɩ mɔɔ n n'ɩbɩɩ dʋdɔ yarm ma, zibəənyɩ bʋnyaa. 'Ɩbɩɩ dɔ, ɩ ʋ: gʋaa kʋsɩ m mɔɔ m, mɔɔ nɩ hɔ kʋ mɔɔ n a cɩnta bɩ sam, m nɩ hɔ kʋ mɔɔ n a duu bɩ dam. 23 Bɔ minto, ɩbɩɩ n mɔɔ busoo bɩ cɩnta busoo cɛ ʋ y? Kʋ mɔɔ m bɔ, m bʋr kʋ m bɩ nyɔɔdʋ yɩ?' 24 A n a hɩ gʋɔɔ kʋ ŋ nɩ b'ʋ rɔ wɔɔ m, a ʋ: 'K'a busoo bɩ yɔ m, a ka gʋaa k'an ta m bu b'ʋ.' 25 Ŋ n a hɩ m, ŋ ʋ: 'Zuuba, a lɛɛ ka an a yɩ bu.' 26 A hɩ mɔɔ nawʋrɛ awɔɔ m, gʋaa biyəə k'an ta hɔ m bɩ, n y'a kaŋ ʋ, gʋaa k'a ba m bɩ, baa k'a ta m poore bɩ, n y'a yɔm nɩ. 27 Mɔɔ jɩnnɔ kʋ ŋ nɩ mɔɔ ŋʋa kan cirbəə kɩ rɔ wɔɔ, k'a bʋr ŋ nɩ mɔɔ taa naa ʋ, a ŋ zɩnzɛ." 28 Yeezuu k'a naa hɩ bɩ, a ka ŋ lɛɛ an nɩ tam Zerizalɛm ʋ. 29 K'a ta an n'a zɔm Bɛtfazee ma kan Betanii kɩ, Oliviyee ci bɩ zeezi bɩ, a a karɩndanyɩnɔ nyɔɔ hɩɩya. 30 A n a hɩ ŋ nɩ, a ʋ: "K'a ta kʋ k'a nɩ lɛɛ naa ʋ. K'awɔɔ ta an nɩ gasʋm, awɔɔ brapoo yɩm n n'a kʋsɩ, bɩ gɔsɩ n da ʋ cɩna y. K'a hʋr a bʋr m. 31 Bɩ kʋ gʋaa awɔɔ lar, a ʋ: Bɔ m awɔɔ n'a hʋrlɛ? K'a hɩ m, a ʋ: Zuuba lɛ n taa." 32 Gʋɔɔ k'a ŋ nyɔɔ rɔ wɔɔ, kʋ ŋ ta bɩ, ŋ yaa hɔ haay bɩ yɩ amba Yeezuu a hɩ bɩ m. 33 Kʋ ŋn'ɩ brapoo bɩ hʋrm bɩ, a zannɔ wɔɔ n a hɩ ŋ nɩ, ŋ ʋ: "Bɔ minto m, awɔɔ n'a hʋrlɛ?" 34 Ŋ n'a nyɩ bɔ ʋ, ŋ ʋ: "Zuuba lɛ n taa." 35 Ŋ n brapoo bɩ gaa, ŋnɩ ta m Yeezuu zi, ŋn'a huuro ka ra, ŋn'a ka Yeezuu n da ʋ. 36 K'a nɩ tam bɩ, gʋɔɔ wɔɔ n'a huuro kam zaa bɩ ra. 37 K'a a zɔ Oliviyee ci bɩ zerjɩ bɩ ma bɩ, heernyɔɔ gasʋ karɩndanyɩnɔ wɔɔ ʋ, zamaa bɩ haay, ŋn'a leer busu, ŋn'a lɛ bɔm Woso ʋ hoserlo haay kʋ ŋ y'a yɩ bɩ minto. 38 Ŋ ʋ: "Cir k'a nɩ zɛm Zuuba Woso tɔ ma bɩ n barka yɩ. Kʋ laafɩɩ n nyɩnta arzana ʋ, kʋ lɛbɔʋrɛ n nyɩnta brama." 39 Farizɛɛnrɔ gɔsɩnnɔ a hɩ Yeezuu m zamaa bɩ bire ʋ, ŋ ʋ: "Karɩnsaamba, a ka k'ɩ karɩndanyɩnɔ wɔɔ n zɛ pi." 40 A n a nyɩ bɔ ʋ, a ʋ: "A hɩ mɔɔ nawʋrɛ awɔɔ m: Kʋ ŋ zɛ pi, jaarɔ n nɩ zee dam." 41 K'a a zɔ Zerizalɛm kʋnɔ bɩ ma, an a to an a yɩ bɩ, a nyi ka a minto. 42 A n n'a hɩrɛ, a ʋ: "Ɩbɩɩ sɔ, k'a dɔ ɩbɩɩ ʋ her, kʋ nka n nɩ laafɩɩ karɛ ɩbɩɩ ʋ! Bɩ naa ma bɩ, a a nyaakʋm da ɩbɩɩ lɛɛ, ɩbɩɩ b'ɩ dam ma, ɩ yɩ y. 43 Sɩra m, dɔmɩnnɔ ɩ zɛrɛ ɩbɩɩ minto, ɩbɩɩ jɩnnɔ wɔɔ tee kɩnkarɛ ɩbɩɩ pəŋŋə bɩ ma, ŋ bɩrlɛ ɩbɩɩ ma, k'a ɩbɩɩ da, ŋn'a so bɩncɛ haay ʋ. 44 Ŋ y'ɩbɩɩ wurgəm haay, ɩbɩɩ kan ɩ zamaa kɩ. Ŋ bɩ jaa deem taan••• tore, an bɩr a mim burə ʋ y, bala, ɩbɩɩ n dɔmɩm kʋ Woso bʋr k'a b'a da ɩ han bɩ dɔ y." 45 Yeezuu gasʋ Wosocɛ ʋ, an nɩ lam hɔheenno wɔɔ ra. 46 A n a hɩ ŋ nɩ, a ʋ: "N y'a gʋrsɩra ba, ŋ ʋ: 'Mɔɔ cɛ bɩ nyɩntam yaadarɛ cɛ.' B'awɔɔ, awɔɔ sa a ba konno bɩncɛ." 47 Yeezuu ɩ hɔ dɩndam dɔmɩm haay Wosocɛ ʋ b'ʋ. Wosocɛmannɩbənno jɩtannɔ kan wosocikarɩnsaambɔɔ kɩ, tara cinno kɩ y'a karɛ a zɛrɛ zaa ma. 48 Bɩ hɔ kʋ ŋ y'a cɩnta k'a ba bɩ, ŋn'a zaa yɩ y, bala, zamaa bɩ haay y'a tʋr karɛ a meerbaa ma kan bʋraama gʋta kɩ.
