Zakkɩ 5

1Hɔntazannɔ wɔɔ, k'a tʋr ka mɔɔ ma, k'a nyi ka a baa da, bala, awɔɔ fɩr yɩm gʋta. 2Awɔɔ hɔnta bɩ, hɔ vəm m, bɛɛ y'awɔɔ huuro bɩm sɔ. 3Tankampiisi y'awɔɔ sarma kan awɔɔ busoo kɩ zaar bam, ŋ zaarbarɛ bɩ nɩ nyɩntam kasɛtɩ an awɔɔ bɩ, am sɛ hɔ bɩ m. Awɔɔ hɔnta gʋr a kuntə jɛ dɔmɩnnɔ nɔɔm nɔ ʋ. 4Awɔɔ n gʋɔɔ kʋ ŋ zi ba awɔɔ hɔsɩrarɔ ʋ rɔ wɔɔ yawʋra ba y, k'a a tʋr ka, ŋ yɩ zee dam, bɩ, ŋ zee bɩ darɛ lee ku Zuuba k'a paŋŋa jirə ba ʋ bɩ zi. 5Awɔɔ mɩsɩrbaa nyɩnta yɩ tara burə ʋ, a a hɔɔnhɔ yɩ, awɔɔ hɔ bɩ gʋta a mɛ ka am hɔbɩsɩrɔ m, bɩ awɔɔ zɩnzɛrɛ dɔmɩm y'a kum. 6Awɔɔ gʋaa tɩrga dʋdɔ yar, a meeyaa bɔ ʋ, a n wɔ ʋ an jɩm awɔɔ lɛɛ y. 7M danyɩnɔ, ʋ bʋr ʋ ma, kʋ Zuuba n tolle ba an bʋr. K'a makra sa danwur ma, bʋr a nawʋrɛ a ma an nɩ dɔm mɔsa ma, k'a a tara zibəə hɔ yɩ, an nɩ dɔm lɛɛkarɛ labarɛrɔ, kan jɛ labarɛrɔ kɩ ma. 8Awɔɔ, k'a bʋr a ma sɔ, a bɩr heer koodə m, bala, Zuuba wusigəre dɔmɩm a zɔ. 9M danyɩnɔ, a bɩ kukur ba kʋ ma y, kʋ Woso b'a dʋdɔ ka y. K'a dɩga a, ba dʋdɔkər bɩ nɩ cɛlɛ ma na. 10M danyɩnɔ, wosolɛsinnɩsorazannɔ kʋ ŋ nyɩnta ŋnɩ meer ba Zuuba tɔ ra rɔ wɔɔ, ŋ fɩr yɩ, bɩ ŋ bʋr a ma fɩr bɩ nɔ ʋ. K'a ŋ hɔbaa sa. 11K'a dɩga a, gʋɔɔ kʋ ŋ nɩ jɩnɩm kɔɔkɔɔ fɩryɩrɛ nɔ ʋ rɔ wɔɔ, wɔɔ y'a hɩm wɔɔ ʋ, ŋ mimbirenyɩnta. Awɔɔ Zɔɔb k'a jɩm kɔɔkɔɔ fɩr nɔ ʋ bɩ mim ma, awɔɔ hɔ kʋ Zuuba a ba m fɩr bɩ yɩrɛ jɛ ʋ bɩ dɔ sɔ, bala, Zuuba ɩ gʋɔɔ cicir zɛm gʋta, an n'a mɩŋŋa barɛ ŋ nɩ. 12M danyɩnɔ, an lɛ da bɩ, a b'a wer si y, a b'a wer si brama tɔ nɩ, b'a ba si tara tɔ nɩ y, a b'a wer si fɩɩga y. K'awɔɔ yɛ mim ma, k'a ʋ ɩɩn••• bala. K'awɔɔ n yɛ, k'a ʋ ayy•••. A bɩ hɔsɩ na ma y, kʋ Woso b'awɔɔ dʋdɔ ka y. 13Kʋ gʋaa y'awɔɔ barla an nɩ fɩr yɩm k'an yaa da. Kʋ gʋaa nɩ heernyɔɔ m, k'an laa lɔ an a lɛ bɔ Woso ʋ. 14K'awɔɔ gʋaa deem bɩ laafɩɩ, k'an kristagʋɔɔ lɛɛzannɔ wɔɔ bir, kʋ ŋ nɩ nyɔɔ nɔ ma Zuuba tɔ ra, ŋnɩ yaa da a tɔ ma. 15Kʋ ŋ yaa bɩ da kan sɩrakarɛ kɩ, yaabazaa bɩ laafɩɩ yɩm, Zuuba y'a waam, k'a mimbʋnyaarɔ ba sɔ, Zuuba sugur kaŋ ʋ. 16Naa tɔ ma bɩ, k'a mimbʋnyaarɔ bɔ a lɛ ma, a hɩ kʋ m, k'a yaa da kʋ tɔ ma, kʋ Woso n a waa. Gʋaa tɩrga yaadarɛ ɩ zi bam kan paŋŋa gʋta kɩ. 17Awɔɔ dɔ a ʋ, Elii nyɩnta gʋaa am wɔɔ m, a yaa da Woso m ŋʋɩɩ•••, kʋ la bɩ ba y, denter sɔ, la a gʋsɩ dɔɔraa kaakʋ kan a kur kɩ. 18A n a ya an yaa da, kʋ la bɩ n ba, Woso n a ka la bɩ n ba, hɔbɩrɛ n nyɩnta ʋ tara burə ʋ. 19M danyɩnɔ, k'awɔɔ gʋaa deem nyaam, an Woso zaa k'an sɩra bɩ to, kʋ gʋaa a ka an a ya an bʋr zaa bɩ ra, 20k'a dɔ a ʋ, gʋaa k'a ka mimbʋnyaabər n a bɔ a mimbʋnyaabarɛ zaa ʋ, k'a zu Woso ʋ bɩ, a zaa bɩ meeyaa a a bʋmbɔ, an a ka sɔ, baa k'a mimbʋnyaarɔ gʋta, Woso n ŋ sugur ka ʋ haay.

will be added

X\