Zibəəzannɔ Ci 24

1Dɔmɩm soor jɛ ʋ bɩ, wosocɛmannɩbər jɩtaarɛ Ananɩyas kan jɩtannɔ kɩ, meerbaa dɔrɛzaa deem Tɛrtulus kɩ bʋr. Ŋ n ta Pol mim bɩ m tara lɛɛzaa Feligsi taa. 2Bɩ m Pol bir, Tɛrtulus n a sɩŋŋɩda sa, an nɩ mim karɛ a lɛ m, a ʋ: "Feligsi mɩŋŋa, ɩbɩɩ minto y'a ka wɔɔ n laafɩɩ yɩ gʋta, lʋnlʋrlɛrɔ k'ɩbɩɩ ŋ ba wɔɔ bire ʋ wɔɔ do naa minto, bɩ tɔ ma. 3Dɔmɩm haay, lɛɛ haay ʋ, Feligsi mɩŋŋa, wɔɔ ɩ barka darɛ ɩbɩɩ m zibəəro mɩŋŋɔɔ nɔɔn duro minto. 4Kʋ mɔɔ lɛ baa kʋ m ɩbɩɩ kɔ gʋta bɩ, meerbaa bɩ bɩ gʋta y. Meerbaa nyɩntam poore, bɩ mɔɔ y'a yɛrɛ ɩbɩɩ han, kʋ bamɩŋŋazaa n'ɩbɩɩ m bɩ, wɔɔ dɔ, wɔɔ ʋ, ɩbɩɩ y'ɩ tʋr kam ma kan bʋraama k'ɩbɩɩ n tam wɔɔ n a dɔ bɩ kɩ. 5Wɔɔ yɩ gʋaa naa do, minzaa m. A nyaa zɛ an n'a dam durnya naa zɩɩfʋrɔ haay bire ʋ. Nazarɛtɩ gʋngʋrɛzannɔ wɔɔ karɩnda jɩtaarɛ deem m. 6A a ŋʋa k'a wɔɔ Wosocɛ bɩ zar, bɩ y'a ka wɔɔ n a nyasʋ. [ 7Wɔɔ ʋ kʋ a dʋdɔ ka, ʋ lɛrɔ wɔɔ nɔ ʋ. Sʋrdaa tisi lɛɛzaa Liziyas n a ma, an b'a bɔ wɔɔ bire ʋ kan paŋŋa gʋta kɩ, an lɛ ka gʋɔɔ kʋ ŋ mim ka ra rɔ wɔɔ ʋ, kʋ ŋ nɩ bʋr ɩbɩɩ zi.] 8Ɩbɩɩ ɩ da ma, ɩ lar ɩ zim: Ɩbɩɩ hɔ niŋŋə k'a ka wɔɔ nɩ mim kam la bɩ jɩ dɔm." 9Zɩɩfʋrɔ wɔɔ n yo meerbaa naa do ra, ŋ ʋ, sɩra m. 10Tara lɛɛzaa b'a wɔ busu, an zaa ka Pol ʋ, k'an meer ba. Pol n a nyɩ bɔ ʋ, a ʋ: "Mɔɔ dɔ mɔɔ ʋ, ɩbɩɩ ɩ so gʋrga naa do dʋdɔ karɛ ʋ a dɔɔraa laatʋ, mɔɔ heer nyɩnta sɔ, kʋ m m meer ba. 11K'ɩbɩɩ lɛ taa, ɩbɩɩ ɩ da ma, ɩ laaka da. Ta kʋ mɔɔ ʋ Zerizalɛm ʋ bɩ, a dɔmɩm n lɛ da bueerehɩɩya ra y, mɔɔ ta Zerizalɛm ʋ, kʋ m aa yaa da. 12Gɔsɩ n mɔɔ yɩ m nɩ bɩsɩ kam Wosocɛ ʋ kan gʋaa kɩ, gɛɛ, m nyaa zɛ m a da sokʋmacɛ ʋ, gɛɛ, lɛɛ vanta ʋ tara nɔ ʋ y. 13Gʋɔɔ nɔɔn duro b'a dam ma, ŋnɩ hɔsɩ yɩ ŋn'a ka mɔɔ ra, ŋ ʋ sɩra nɩ y. 14Ba hɔ kʋ mɔɔ dɔ bɩ n na: Wɔɔ zɩrɔ Woso zi mɔɔ n'a bam, m nɩ zum Zuuba Yeezuu zaa kʋ ŋ ʋ gʋngʋrɛzaa m b'ʋ. Kʋ zaa bɩ do nɩ, mɔɔ ɩ hɔ haay kʋ n y'a gʋrsɩra ba lɛrɔ ci nɔ ʋ bɩ sim kan wosolɛsinnɩsorazannɔ ciro kɩ. 15Mɔɔ ta Woso taafeerle naa do m, mɔɔ ʋ: Gʋɔɔ mɩŋŋɔɔ kan gʋɔɔ bʋnyaarɔ kɩ y'a mɩm bɔŋ ʋ. Ŋ mɩŋŋɔɔ maam sɔ. 16Bɩ minto y'a ka, mɔɔ nɩ m tɔŋ ʋ dɔmɩm haay kʋ m bɩ mim zu ʋ Woso ma kan gʋɔɔ kɩ y. Bɩ, naa minto bɩ, dabɔʋ ba mɔɔ ma y. 17Mɔɔ bɔrɛ dɔɔraa laatʋ, m m bɔ, m bʋr kɛɛrɛ, kʋ m bɩ daahan ka m dogʋɔɔ cicirzannɔ ʋ, kʋ m bɩ mannɩ ba sɔ. 18Bɩ, ŋ bɩ mɔɔ yɩ Wosocɛ ʋ, bɩ ma bɩ, mɔɔ dintim gʋ m ma. Gʋaa cir n nyɩnta ʋ y, bɩ bʋgʋr n nyɩnta ʋ sɔ y, 19kʋ Azii zɩɩfʋrɔ gɔsɩnnɔ bɛɛ nyɩnta b'ʋ y. Brɔɔ y'a ga m, ŋn'a hɩnka ɩbɩɩ taa, ŋnɩ mim yɩ ŋn'a ka mɔɔ ra, hɔ kʋ mɔɔ ba bɩ minto. 20Gɛɛ k'a bɛɛ m bɩ, gʋɔɔ kʋ ŋ nɩ naa ʋ rɔ wɔɔ a da ma, ŋnɩ hɔ kʋ mɔɔ ba, ŋnɩ ta mɔɔ m dʋdɔkənno wɔɔ taa bɩ hɩ. 21Hɔ deem naa mɔɔ jɩm brama, m zee da, m a hɩ ŋ bire ʋ: Gəəno mɩmbɔʋrɛ minto y'a ka, ŋn'ɩ mɔɔ dʋdɔ karɛ awɔɔ taa her." 22Bala, Feligsi Zuuba Yeezuu zaa bɩ mim dɔ. N gʋɔɔ wɔɔ da zaa ra, an n'a hɩrɛ, a ʋ: "Kʋ sʋrdaa tisi lɛɛzaa Liziyas bɩ bʋr naa ʋ, mɔɔ y'awɔɔ mim bɩ dʋdɔ karɛ." 23A n lɛ ka sʋrdaa zɔrɔ lɛɛzaa b'ʋ, a ʋ, an dɔ Pol ma, b'a b'a du y. A b'a ta a gʋaasɩba sɩ m tolle, a nyasʋm minto y. 24Dɔmɩm k'a cem poore bɩ, Feligsi nyɩnta kan Drusil a lʋ kʋ zɩɩfʋ m bɩ kɩ. A n a ka, ŋnɩ Pol bir k'an Krista sɩrakarɛ mim dɩnda a m. 25Bɩ, Pol k'a nɩ meer bɩ bam an nɩ tam tɩrgabaa, bʋraama, dʋdɔ k'a nɩ zɛm bɩ kɩ bɩncɛ ʋ bɩ, Feligsi da bɔ ʋ, an Pol meerbaa bɩ zɛ ra, a ʋ: "Naa ma bɩ, ɩ wusigə, ɩ ta ɩ bɩncɛ ʋ. Mɔɔ zɛm b'ɩ bir dɔmɩm niŋŋə ʋ." 26Feligsi nyɩnta an n'a hɔɔn darɛ, a ʋ, Pol busoo karɛ a ʋ. Bɩ y'a ka an tɩr nyɔɔ da, ŋn'aa bir hallɩ gallɛm gʋta k'a bɩ sʋʋra ba. 27Dɔɔraa hɩɩya k'a cem bɩ, Pɔrsiyus Fɛstus ɩ Feligsi bɩncɛ sa. Feligsi k'a lɛ n taa k'a bɩr mɩŋŋa zɩɩfʋrɔ wɔɔ mɩm ʋ bɩ, a Pol to lɔnnɔcɛ ʋ b'ʋ.

will be added

X\