2 Timote 1

1Mɔɔ mɩŋŋa Pol ɩ ci naa do ba, Woso ɩ mɔɔ bɔ ʋ, kʋ mɔɔ n yɩ Krista Yeezuu zibəəzaa, kʋ m mɩsɩrbaa kʋ Woso a ler bɔ, wɔɔ n'a yɩm Krista Yeezuu nɔ ʋ bɩ pa da. 2Ci bɩ ba mɔɔ nawʋrɛ ɩbɩɩ ma, Timote, mɔɔ nyɩ n'ɩbɩɩ m, m n'ɩ ŋʋam, a yɛ mɔɔ nawʋrɛ kʋ Zɩ Woso, kan wɔɔ Zuuba Krista Yeezuu kɩ n barka, kan cicirzɛrɛ kɩ, kan laafɩɩ kɩ ka ɩ ʋ. 3Mɔɔ ɩ yaa dam Woso m barka, a zi mɔɔ n'a bam kan noom hu kɩ, amba mɔɔ yaabɔɔ zu ʋ bɩ m. Sinuu ʋ kan gunuu ʋ kɩ mɔɔ yaadarɛ nɔ ʋ haay, mɔɔ ɩ yaa darɛ ɩbɩɩ tɔ ma, m n'a barka darɛ. 4Nyi k'ɩbɩɩ ka bɩ tɔ ɩ mɔɔ nɔ ʋ, mɔɔ n'a ŋʋam paan••• kʋ m m ya, m ɩ yɩ, kʋ m heer n nyɔɔ gʋta. 5Sɩra k'ɩbɩɩ ka denter bɩ, a tɔ ɩ mɔɔ nɔ ʋ, ɩbɩɩ yaabalʋ Loyis ɩ nyɩnta sɩrakarɛ bɩ do m, ɩ da Enis nyɩntam sɔ. Bɩ, mɔɔ dɔ mɔɔ ʋ, ɩbɩɩ ta sɩrakarɛ bɩ do m sɔ. 6Naa minto m, mɔɔ nɩ m ya, m n'a hɩrɛ ɩbɩɩ m, m ʋ, ganwʋrɛ kʋ Woso a ka ɩ ʋ k'ɩ zi ba m, mɔɔ nɩ m wɔ ka ɩbɩɩ ra ɩbɩɩ n a yɩ bɩ, zi ba m. 7Bala, Ɛspri kʋ Woso a ka wɔɔ ʋ bɩ bɩr wɔɔ dam nyibəə ma y, bɩ, paŋŋa kan ŋʋarɛ kɩ, daamɩŋŋama kɩ an n'a kam wɔɔ ʋ. 8Naa tɔ ma bɩ, ɩ bɩ nyannɩ zɛ wɔɔ Zuuba kasɛtɩ karɛ ma y, ɩ bɩ nyannɩ zɛ mɔɔ tɔ ma kʋ mɔɔ nɩ lɔnnɔcɛ ʋ a tɔ ma bɩ minto sɔ y. Bɩ, yo Woso paŋŋa ma, ɩ yɛ fɩr ma lemim nyɩnta bɩ tɔ ma am mɔɔ hɔ bɩ m. 9Woso mɩŋŋa ɩ wɔɔ yɔ, wɔɔ bir a ʋ, kʋ wɔɔ n yɩ a gʋɔɔ. A n naa ba, wɔɔ zibəəro mɩŋŋɔɔ tɔ ma y, a mɩŋŋa hɔɔnhɔ kan barka k'a n'a kam bɩ kɩ tɔ ma m. Barka bɩ do ka a ʋ wɔɔ ʋ, Krista Yeezuu nɔ ʋ, bɩ ma bɩ, durnya n a sɩŋŋɩda ba y. 10Bɩ kɛɛrɛ naa, wɔɔ bʋmbɔrɛzaa Krista Yeezuu k'a bʋr bɩ, barka bɩ do a hɩnka garga ra. Bala, a zɛ paŋŋa zaar ba, an mɩsɩrbaa k'a nyarɛ ba ʋ hɩnka lemim nyɩnta bɩ m. 11Lemim nyɩnta bɩ do padarɛ tɔ ma m, Woso n mɔɔ bɔ ʋ, kʋ m yɩ a padarɛzaa, kristazibəəzaa, a hɔdɩndarɛzaa. 12Bɩ tɔ ma m, mɔɔ nɩ fɩr naa yɩm, bɩ fɩr bɩ yɩrɛ nyannɩ ba mɔɔ nɩ y, bala, gʋaa kʋ mɔɔ sɩra ka ʋ bɩ, mɔɔ bɩ zaa dɔ mɩŋŋa, bɩ mɔɔ heer kookoo sɔ, m a dɔ m ʋ, a ɩ paŋŋa m k'a dɔ hɔ k'a a da mɔɔ wɔ ʋ bɩ ma, k'an ta an a zɛrɛ hinni ku. 13Yo sɩra meerbaarɔ kʋ mɔɔ ŋ ba kan ɩ kɩ rɔ wɔɔ ma, ɩ jɩm sɩrakarɛ kan ŋʋarɛ kʋ wɔɔ n ta ŋ nɩ Krista Yeezuu nɔ ʋ bɩ nɔ ʋ kɔɔkɔɔ. 14Dɔ hɔdɩndarɛ mɩŋŋa kʋ n y'a da ɩ wɔ ʋ bɩ ma, ɩ dɔ ma Sɛnt-Ɛspri paŋŋa k'a nɩ kan wɔɔ kɩ bɩ m. 15Ɩbɩɩ dɔ ɩ ʋ, kristagʋɔɔ kʋ ŋ nɩ Azii kʋ b'ʋ rɔ wɔɔ haay a bɔ mɔɔ ʋ, Fizɛl kan Hɛrmozɛnnɩ kɩ yɩ ŋ barla sɔ. 16A yɛ mɔɔ nawʋm kʋ Woso n'a cicirzɛrɛ kərgu Onezifɔɔr hargʋɔɔ ra, bala, a tɩr mɔɔ heer ba kookoo dɔmɩm niŋŋoo ʋ, nyannɩ n a nyasʋ mɔɔ dure bɩ tɔ ma y. 17Bala, bʋr k'a ʋ Rɔm ʋ naa ʋ bɩ, a a ka mɔɔ bɩncɛ ma paan•••, an aa mɔɔ yɩ. 18A yɛ mɔɔ nawʋm kʋ Zuuba n a ka, k'an Woso ba mɩŋŋa yɩ, Zuuba mɩŋŋa zɛrɛ hinni ʋ. Ɩbɩɩ dɔ mɩŋŋa sɔ ɩ ʋ, nyɩnta kʋ mɔɔ ʋ Efɛɛzɩ ʋ bɩ, a a da mɔɔ han gʋta.

will be added

X\