1 Hɔ kʋ mɔɔ lɛɛ ka m n'a yɛm bɩ, a yɛ mɔɔ nawʋrɛ, kʋ gʋɔɔ n yaa da Woso m gʋɔɔ haay tɔ ma, a ŋ mim haay da Woso wɔ ʋ, a yaa da m barka ŋ tɔ ma. 2 K'a yaa da cinno wɔɔ tɔ ma, kan lɛɛzannɔ haay kɩ tɔ ma sɔ, k'ʋ nyɩnta laafɩɩ nɔ ʋ, ʋ bɩr zum Woso ʋ zenyy•••, mɩsɩrbaa zore nɔ ʋ kan daʋrɛ kɩ. 3 Naa m mɩŋŋa, an Woso kʋ wɔɔ bʋmbɔrɛzaa m bɩ nɔ yɩ, 4 a lɛ taa kʋ gʋɔɔ haay n bʋmbɔrɛ yɩ, kʋ ŋ n'a da ma, ŋnɩ sɩra dɔ. 5 Bala, Woso deem n ta ʋ, gʋaa deem taan••• nɩ gʋɔɔ zɛm kʋ ra kan Woso kɩ, Krista Yeezuu m. 6 A ɩ yɛ an a mɩŋŋa ka zɛ ma, kʋ gʋɔɔ haay n bʋmbɔrɛ yɩ. Dɔmɩm kʋ Woso a cɩnta bɩ k'a b'a ku an naa ba bɩ, a yɩ kasɛtɩ, an a hɩnkarɛ a ʋ, Woso lɛ taa k'a gʋaa haay bʋmbɔ. 7 Naa mɩŋŋa tɔ ma m Woso n mɔɔ bɔ ʋ kʋ m yɩ a lemim padər, an mɔɔ ba kristazibəəzaa, sɩra mɔɔ n'a hɩm, mɔɔ bɩr ŋʋaar barɛ y, mɔɔ cɩnta a ʋ, kʋ m sɩrakarɛ kan sɩra kɩ dɩnda do vantɔɔ gʋɔɔ wɔɔ m. 8 Naa minto bɩ, mɔɔ lɛ taa kʋ gʋɔɔ yaarɔ wɔɔ n yaa da Woso m, lɛɛ haay ʋ, ŋn'a wɔrɔ busu brama kʋ mimbʋnyaa bɩ nyɩnta ŋ gʋr zi y, ŋ bɩ nɔmaa kan nyaa kɩ to a heer ʋ ŋnɩ yaa bɩ da y. 9 Kʋ lannɔ wɔɔ nɩ, mɔɔ lɛ taa, kʋ ŋ nɩ huu k'a ga kʋ ʋ ba du a ma, ŋnɩ bɩr sappɩ, mɩŋŋahɩnkarɛ ba ŋ zi y, ŋ b'a ka mim kʋsɩrɛ waasɩ ma, gɛɛ sarma nyɛɛnnɔ ma y, gɛɛ busoo gʋta huu ma, gɛɛ mɩŋŋabankarɛ waasɩ ma y. 10 Bɩ, kʋ ŋ n'a ka zi mɩŋŋa barɛ ma, bala, lannɔ kʋ ŋ ʋ, a ɩ zum Woso ʋ rɔ wɔɔ, a ga a wʋm kʋ ŋ n'a ba ncɩnaaʋ. 11 Hɔdɩndarɛ wakatɩ ʋ, lannɔ wɔɔ a ga m, ŋnɩ zɛ sɩɩ•••, ŋnɩ yɛ hɔ haay ma. 12 Mɔɔ bɩ yɛm kʋ lannɔ n hɔ dɩnda gʋɔɔ yaarɔ m, ŋn'a so ŋ ʋ y, a a ga m, ŋnɩ zɛ sɩɩ•••. 13 Bala, Adam Woso lɛɛ ka an a da, Ɛɛvɩ n bɔkarɛ an a nya ʋ. 14 Adam bɛɛ Sʋtaana bra ba nɩ y, Ɛɛvɩ a bra ba m, an yɛ, an bɩsɩ ka Woso lɛ ma. 15 Bɩ, k'a yɛ nyɩdazaambaa ma an a tʋntɔ ʋ sɩrakarɛ nɔ ʋ, kan ŋʋarɛ kɩ, mɩŋŋabaa kɩ, mɩŋŋazerle kɩ, a bʋmbɔrɛ yɩm.
