1 Gʋaa niŋŋə haay k'a sɩra ka a ʋ, Yeezuu bɩ Krista m, Woso nyɩ m. Gʋaa niŋŋə haay k'a Zɩ ŋʋa, a a Nyɩ ŋʋa sɔ. 2 Hɔ k'a n'a hɩnkarɛ a ʋ, wɔɔ Woso nyɩnɔ ŋʋa bɩ ba n nɩ: Kʋ wɔɔ Woso ŋʋa, ʋ nɩ zure a lɛrɔ ʋ. 3 Ba wɔɔ ŋʋarɛ kan Woso kɩ bɩ n na: Kʋ wɔɔ n a lɛrɔ si. B'a lɛrɔ wɔɔ, mɔr gorezaa bɛɛ y. 4 Bala, gʋaa haay kʋ Woso y'a yɩ bɩ bʋr durnya ra. Hɔ k'a bʋr durnya ra bɩ, wɔɔ sɩrakarɛ m. 5 Nka ɩ bʋr durnya ra? Kʋ bɩ m, gʋaa k'a sɩra ka, a ʋ, Yeezuu bɩ, Woso Nyɩ m. 6 Yeezuu Krista ɩ bʋr durnya ʋ, an a hɩnka hi m kan ma kɩ. Hi bɛɛ m bala y, hi m kan ma kɩ. Bɩ, Sɛnt-Ɛspri n'a kasɛtɩ kam, bala, Sɛnt-Ɛspri m sɩra. 7 Ŋ kaakʋ, ŋ n'a kasɛtɩ karɛ: 8 Sɛnt-Ɛspri, hi kan ma kɩ. Bɩ ŋ kaakʋ rɔ wɔɔ kasɛtɩ deem ŋ n'a karɛ. 9 Kʋ wɔɔ ɩ gʋɔɔ kasɛtɩ sire, Woso kasɛtɩ bɩ gʋtabaa lɛ da. Ba Woso kasɛtɩ bɩ n na: A kasɛtɩ ka a Nyɩ b'ʋ. 10 Gʋaa k'a sɩra ka Woso Nyɩ b'ʋ, a ɩ kasɛtɩ naa do m a heer ʋ. Gʋaa k'a n sɩra ka Woso ʋ bɩ, Woso ba an nawʋm ŋʋaarzaa. K'a n sɩra ka kasɛtɩ kʋ Woso a ka a Nyɩ b'ʋ bɩ minto. 11 Ba kasɛtɩ bɩ n na: Woso mɩsɩrbaa k'a nyarɛ ba ʋ bɩ ka wɔɔ ʋ, bɩ mɩsɩrbaa bɩ do ɩ Nyɩ bɩ zi. 12 Gʋaa k'a nɩ kan Nyɩ bɩ kɩ, a ɩ mɩsɩrbaa m. Gʋaa k'a ba kan Woso Nyɩ bɩ kɩ, a ba mɩsɩrbaa bɩ do nɩ y. 13 Naa haay gʋrsɩra ba mɔɔ ʋ awɔɔ ma, awɔɔ k'a nɩ sɩra kam Woso Nyɩ b'ʋ bɩ, k'awɔɔ n a dɔ a ʋ, a ɩ mɩsɩrbaa k'a nyarɛ ba ʋ bɩ m. 14 Hɔ k'a nɩ wɔɔ heer bam kookoo Woso zi bɩ ba n nɩ: Kʋ wɔɔ hɔ niŋŋə yɛ han an zu a hɔɔnhɔ ʋ, a y'a tʋr kam wɔɔ ma. 15 Bɩ kʋ wɔɔ dɔ, ʋ ʋ, kʋ bɔ wɔɔ yɛ han a y'a tʋr kam wɔɔ ma bɩ, wɔɔ dɔ wɔɔ ʋ, wɔɔ ɩ hɔ kʋ wɔɔ yɛ bɩ m. 16 Kʋ gʋaa a danyɩ yɩ, an nɩ mimbʋnyaa barɛ, mimbʋnyaa bɩ do bɩr tam zɛ bɩncɛ ʋ, k'an yaa da. Woso mɩsɩrbaa kaŋ ʋ, kʋ mimbʋnyaa bɩ do bɩr tam zɛ bɩncɛ ʋ paan••• y. Bala, mimbʋnyaa ta ʋ, an nɩ tam zɛ bɩncɛ ʋ. Mimbʋnyaa bɩ do minto bɛɛ mɔɔ ʋ, a yaa da y. 17 Zibəə bʋnyaa haay bɩ, mimbʋnyaa m. Bɩ, mimbʋnyaa haay bɛɛ nɩ tam zɛ bɩncɛ ʋ y. 18 Wɔɔ dɔ wɔɔ ʋ, gʋaa niŋŋə haay kʋ Woso a yɩ bɩ bɩr mimbʋnyaa bam dʋntɔ y. Bala, Woso Nyɩ b'ɩ dɔm ma, Bʋnyaabarɛzaa bɩr heer bam ma y. 19 Wɔɔ dɔ wɔɔ ʋ, Woso gʋɔɔ m wɔɔ m, bɩ durnya haay jilli ɩ Bʋnyaabarɛzaa wɔ ʋ. 20 Bɩ wɔɔ dɔ sɔ wɔɔ ʋ, Woso Nyɩ bʋr, an bɩ wɔɔ hɔɔn gu, k'ʋ Woso paan••• bɩ dɔ. Bɩ Woso paan••• Nyɩ Yeezuu Krista nɔ wɔɔ n ta ʋ. A m Woso paan•••, a m mɩsɩrbaa k'a nyarɛ ba ʋ bɩ. 21 M nyɩnɔ ŋʋarɛrɔ, a b'a ka a wosobaawɔnnɔ wɔɔ da ʋ y.
