Matyu 1

1Kale, ^Mesaya Yesus em awalik kumel im wiin te. Yesus e Debit em angin kelei, Debit be Abalakam em min dow ete te. 2Beem sang e kanekote: Abalakam e Aisak em alew kese kale. Aisak e Sekow em alew kese kale. Sekow e Suda so akalem awkunum kumel so im alew kese kale. 3Suda e Feles so Sela so im alew kelei, Tamal u aso im auk kesu kale. Feles e Kesolon em alew kese kale. Kesolon e Alam em alew kese kale. 4Alam e Aminadaw em alew kese kale. Aminadaw e Nason em alew kese kale. Nason e Salmon em alew kese kale. 5Salmon e Boas em alew kelei, Elakaw u em auk kesu kale. Boas e Obet em alew kelei, Ilut u em auk kesu kale. Obet e Sesi em alew kese kale. 6Sesi e emisik kamok fian Debit em alew kese kale. Kelei, Debit e Solomon em alew kelei, Ulia em kalun waneng u Solomon em auk kesu kale. 7Solomon e Elekoboam em alew kese kale. Elekoboam e Abiya em alew kese kale. Abiya e Asa em alew kese kale. 8Asa e Sekosabat em alew kese kale. Sekosabat e Sekolam em alew kese kale. Sekolam e Usia em alew kese kale. 9Usia e Sotam em alew kese kale. Sotam e Akas em alew kese kale. Akas e Kesekia em alew kese kale. 10Kesekia e Manase em alew kese kale. Manase e Emon em alew kese kale. Emon e Sosaya em alew kese kale. 11Sosaya e Sekoyakim so akalem awkunum kumel so im alew kese kale. Biim bisiw ding dim kabalak e, maka i teleko, Suda kawtiw biilo Babilon abiw mutuk fian kalo yemde unsiliw kale. 12Beli, biim Babilon abiw mutuk fian ka kel bisiliw ding so, aneng beem iti kolewsiliw ding dim bakate, Sekoyakim e Sealtiel em alew kese kale. Sealtiel e Selubabel em alew kese kale. 13Selubabel e Abiut em alew kese kale. Abiut e Elyakim em alew kese kale. Elyakim e Asol em alew kese kale. 14Asol e Sadok em alew kese kale. Sadok e Akim em alew kese kale. Akim e Eliut em alew kese kale. 15Eliut e Eleasal em alew kese kale. Eleasal e Matan em alew kese kale. Matan e Sekow em alew kese kale. 16Sekow e Yosew em alew kelei, Yosew e Malia um imok kese kale. Keko beli, Malia u Yesus dukului, kunum waneng i aul beem wiin e “^Mesaya!”, dangsiliw kale. 17Beli, Abalakam teleko, Debit em dim kabalak e, mutum kel dow kesiliw kale. Kesomeliwi, Debit teleko, Suda kawtiw i Babilon abiw mutuk fian kalo unsiliw ding kabalak e, bakati mutum kel dow kesiliw kale. Keliwi, biim Babilon alenaliw ding teleko, Malia um ^Mesaya dukusu ding kabalak e, it mutum kel dow kesiliw kale. 18Malia um Yesus Kulais dukusu sang e kanekote: Kunum mak em wiin e Yosew alenale kale. Kunum be Yesus em auk Malia ulo tonol keumeko, “Kuloki te!”, wangeko, alenale kale. Keko beli, alew bi kule kule kelinba ke alenaliw ding kabalak e, Sunbin-Finik em kitil e waneng buulo aul kumun keumse kale. 19Keumei, Yosew e watemete: “Ai! U aul kumun kelu kai!”, angeko, koumomin ibolow kese kale. Koumomin ibolow kese kate, Yosew e kiol kuw kunum ke alenale kasike, e kawtiw im kiin dim e “Mesik u inkal keloku kai!”, angomelei, yawal keko, koumomin ibolow memen kese kale. 20Keko beli, Kamok Fian em dabalakamin finik mak fiteweko, kiin dem sin bokolewomele: “Wee! Yosew, kamok fian Debit em angin kutaka! Ku kanelom finganemokolew te! Sunbin-Finik em kitil e Malia buulo aul kumun keumbe kasike, ku waneng buulo kame kulolewka! 21Ku kilele kilila! Auk bu kunum aul mak dukuloku te. Dukului, beem wiin e 'Yesus!' dangolewka! Nimtew angom? E teleko, akalem angin im ibolow sili sili kukuw beem kuankemin deiw okileweko, finik so deiw mo koyemomin deiw kukuyemoke kasike. 22Feinka! Sunbin-Got em bontem dim bakamin kunum Aisaya em sua em bokose weng e kame dem gilako, fein ki keloke kasike. E bokoyemomele: 23'Waneng seiw mak kunum so akalinba waneng mak aul kumun kesomi, aul dukuloku te. Dukului, kawtiw i aul beem wiin e 'Emanuel' dangokoliw te.', yangse kale.”, angeko, Yosew elo dangse kale. 'Emanuel' beem mongom e kanekote: 'Sunbin-Got nuso be te!' 24Keko beli, Yosew e baba teineko, Kamok Fian em dabalakamin finik beem dange weng be fein geleweko, Malia ulo kuluse kale. 25Kulusomelei, auk buum kumun kebu ding kabalak e, Yosew e uso kal bonggulinba kese kale. Kesomi, um aul dukusu ding kabalak e, e aul beem wiin e “Yesus” dangse kale.


Copyright
Learn More

will be added

X\