Matayo 2

1Öyö Yësu 'deni Beteleme mï dɔyayi 'ba Yudayi mï kada 'ba Erode bɔ dɔliŋɔ. Kina bɔ lende kikali mɔtɔ ga ako ra di bïcï tɔrɔ ŋbö kömö Yerosalema. 2Lïjë ititi, tëgë, “Kole nime köyö bine rɔ ŋere 'ba Yudayi ne, bo ëdï yala ga? Këlu abo do'ja 'deni di bïcï tɔrɔ, kina me dako tïlëlu bo.” 3Kina ɔdɔ Erode kuwö lende nime 'deni te tine, mï bo ënyï kombi ŋgï kina bilaka 'ba Yerosalema mɔtɔ ga yïmo ombi 'deni gbï. 4Kina bo kari kïdëkï löbu 'ba bɔ akumu ni ti bɔ kɔmɔ kiyandi 'ba kö'du ki'di ni ŋgï pili gɔ kako zi bo, kina bo kititi lïjë, bo iya te, “Ɔdɔ tara ne Kurïsïtö ame Bɔko'ba këdï koja kako di mïtɔrɔ ne ëdï köyö bo yala ga ya?” 5Lïjë iya te, “Ëdï köyö Kurïsïtö mï Beteleme mï dɔyayi 'ba Yudayi bine. Römöyï bɔ kumë lende 'ba Bɔko'ba mɔtɔ ugu lende nime 'deni mɔlo ame kiya te, 6‘Nï, Beteleme, dɔyayi 'ba Yudayi nime, inza 'bëyï kulöwö wötï titiyi bërï di mï dɔyayi 'ba Yudayi nime. Bilaka ma löbu ti kɔdɔ 'deni di mïyï ame gɔ kokɔkɔ bilaka ma ga 'ba Yisarele.’ ” 7Kina Erode kïdëkï bɔ lende kikali tönë ga ŋgï lowo kako zi bo gɔ lïjë kiya kada 'ba tɔdɔ 'ba këlu nima zi bo. 8Kina bo kënyï koja lïjë ŋgï kari, bo iya te, “Arike Beteleme toma gɔ kole nima. Ɔdɔ ko'jake bo 'deni ako kiyake lende mo zö gɔ mari gbï tïlëlu bo.” 9, 10Kina ɔdɔ lïjë kuwö lende kiya 'ba Erode nima 'deni tine lïjë ënyï ŋgï tari. Kina lïjë ko'ja këlu mo tönë lïjë ko'ja mɔlo di yïbï ne ŋgï. Kina ɔdɔ lïjë ko'ja 'deni tara tine lïjë ŋgï ti mï këyï rɔ mbëmbë. Këlu nima ösö nduwë dɔgba zïnnï ŋbö kari kɔrɔ dɔ bi ame kole Yësu këdï teyi ne. 11Kina lïjë kɔdɔ ŋgï kari ko'ja kole ni këdï rö yayi ti ma mo. Kina lïjë kolɔdɔ ŋgï bërï tïlëlu bo. Kina lïjë kunyë kpa sanduwu 'bënnï ga ŋgï, lïjë ki'di kpa közï ki'di 'bënnï ga zi kole nima. Kpa közï ki'di mo ga rɔ yamo ma köbö, ti akato kele ti wɔwɔ kele mɔtɔ kïdëkï möyï mo rɔ murï. 12Tine na Bɔko'ba kiyandi lïjë ŋgï ti nyï kinza lïjë kileki dë kpe kebe dɔ Erode. Kina lïjë kileki ŋgï kari dɔyayi 'bënnï ti kɔri ma löwö mɔtɔ. 13Kina ɔdɔ ya naga nima kari 'deni tine, Bɔko'ba i'di nyï ko'de ŋgï dɔ Yesepa, kina malayika kiya zi bo, iya te, “Erode o'dɔkɔ toma gɔ kole nime 'dɔ bo kupö yaga. Ënyï ti kole nime ti ma mo kiriŋa kari Ezipeto. Oloma yayi ŋbö ma na 'jaa ti miya zïyï gɔ kileki.” 14Kina Yesepa kënyï ŋgï mï korɔndɔ nima kiriŋa kari Ezipeto ti kole tönë ti ma mo. 15Lïjë ari 'dɔ toloma Ezipeto yayi ŋbö kömö mï kada 'ba tölë 'ba Erode. Loma 'bënnï yayi nima ëdï 'deni kɔzɔ lende 'ba Bɔko'ba ame tönë bo kiya 'deni mɔlo ti bɔ kumë lende abo mɔtɔ, kiya te, “Mïdëkï kole ma 'deni kako di Ezipeto.” 16Kina ɔdɔ Erode kikali 'deni bɔ lende kikali naga nima ïndëndë dɔ bo 'deni kɔzɔ a nima tara tine, mï bo ënyï kata ŋgï. Kina bo koja bɔ kanya abo ga ŋgï kari mï dɔliŋɔ pili 'ba Beteleme tupö kole titi ame ga pili rɔ bɔtɔni ne, ame kɔmɔ kɔɔ mo ga këdï 'deni rïyö ŋbö kömö dɔ ame ga köyö mï kɔmɔ kɔɔ mo nima ne. Tisaki mo di dɔ ame ga kɔmɔ kɔɔ mo ga këdï 'deni rïyö ne römöyï gɔ lende 'ba kada 'ba tɔdɔ 'ba këlu ame bo kuwö lende mo di zi bɔ lende kikali naga nima ne. 17Tupö kole titi 'ba Beteleme naga nime ëdï 'deni kɔzɔ lende 'ba Bɔko'ba ame bo kiya 'deni mɔlo ne tara, ame Yeremaya kumë 'deni mɔlo kiya te, 18“Birɔ ëdï kudu mï Rama, birɔ 'ba monɔ ni ti kuwu. Rayile na këdï kudu gɔ kole 'ba kole 'bënnï ga. Lïjë ölë 'deni pili kina lɔko o'dɔkɔ dë kpe gɔ kuyë kömönï.” 19Tine Yesepa ni ëdï 'deni koloma mï Ezipeto. Kina ɔdɔ Erode kölë 'deni tine, na Bɔko'ba ki'di nyï ko'de ŋgï dɔ Yesepa, kina malayika kɔdɔ ŋgï zi bo, 20kiya te, “Ënyï di bine ti kole titi nime ti ma mo kileki kari mï dɔyayi 'ba Yisarele. Bilaka ma tönë ga yayi ko'dɔkɔ tupö kole nime ne lïjë ölë 'deni.” 21Kina bo kënyï ŋgï ti kole tönë ti ma mo, bo kileki kari mï dɔyayi 'ba Yisarele. 22Tine bo ari kuwö 'böwu tëgë kole 'ba Erode, ame kïdëkï möyï mo rɔ Arokelawo ne, na 'deni rɔ ŋere 'ba Yudayi. Kina bo kere ŋgï di bi tari toloma mï Yudayi. Kina Bɔko'ba ki'di nyï mɔtɔ ko'de gbï dɔ bo, kiya zi bo gɔ bo kari koloma Galilaya. 23Kina ɔdɔ bo kömö 'deni yayi tine, bo ari koloma 'deni mï gawo mɔtɔ kïdëkï rɔ Nazareta. Loma mï Nazareta nima ëdï 'deni kɔzɔ lende 'ba Bɔko'ba ame bo kiya 'deni mɔlo ne tara, ame bilaka mɔtɔ ga kumë lende mo 'deni, kiya te, “Bɔ nima ti kïdëkï bo 'deni rɔ bilaka 'ba Nazareta.”

will be added

X\