1 Mï kada ma Yësu këdï kɔrɔ kpa pöpö 'ba Genesareta tïndï kuru bo 'deni toko bërï tuwö lende 'ba Bɔko'ba, 2 bo o'ba kɔmɔ bo ŋgï bo ko'ja sorope rïyö mɔtɔ ga këdï 'deni kpa götö yayi, atoyi mo ga ari 'deni turögö rɔ duru 'bënnï ga. 3 Kina bo kari këkï ŋgï mï ma kɔtɔ ame rɔ 'ba Simona ne, bo iya zi Simona 'dɔ koto sorope nima kari dɔgba mbowa yaga di dɔ kpa götö. Kina bo koloma ŋgï bërï mï sorope yayi tiyandi bilaka. 4 Kina ɔdɔ bo kote tilende 'deni tine bo ënyï kiya zi Simona, bo iya te, “Oto sorope kari mï zana mini ma kalo 'dɔ ku'duke duru 'be tugu kenze.” 5 Tine Simona ileki dɔmo, iya te, “Ŋere, dopi rɔze 'deni tu'du mo ti korɔndɔ ene ŋbö bi këzë dɔze rɔ yawa kinza ma do'ja ma kɔtɔ te. Ne gɔ lende kiya 'bï ti mu'du duru nima ŋgï.” 6 Kina ɔdɔ lïjë ku'du yɔ na kilaka kenze ŋgï ŋbaŋi, duru koma tirica. 7 Kina lïjë ko'dɔ közïnnï ŋgï zi lëpï nnï ama ga mï sorope mɔtɔ yayi ne gɔ kako tokɔnyi lïjë. Kina lïjë kope kenze ŋgï koza koso mï sorope naga nima kpaki rïyö ki'di sorope pili koma za 'böwu tönzu bërï. 8 Tine ɔdɔ Simona Pïtörö koŋgɔ 'deni te bo ako ŋgï kolɔdɔ bërï kɔmɔ Yësu. Bo iya te, “Ŋere, ese yaga di rɔma. Ma bɔ lende kënyë na.” 9 Römöyï kenze nima kilaka zïnnï ne na lende mo kigayi lïjë 'deni ŋgï pili. 10 Lende mo igayi lëpï bo ama ga Yakoba ni ti Yowani kole 'ba Zebedayo ga 'deni gbï. Kina Yësu kënyï kileki kiya zi Simona, iya te, “Kinza kere dë. Kisaki di mï kada nime tɔne ti këddï rɔ bɔ tinda'ba bilaka zi Bɔko'ba.” 11 Kina lïjë kilala sorope 'bënnï ga ŋgï yaga dɔ kpa götö, lïjë kola wa pili yayi lïjë kösö ŋgï nati gɔ Yësu. 12 Kina ɔdɔ Yësu këdï 'deni mï gawo mɔtɔ yayi tine na bɔ mɔtɔ mönyu konyo rɔmo ga 'deni ŋgï pili röwë ki'di dönï ŋgï. Bo ako kila'ba rɔ kpa kutu'bö kɔmɔ Yësu bërï bo koma'jo rɔ bo, iya te, “Ŋere, ɔdɔ ko'dɔkɔ ŋgï ti kileŋo ma ŋgï yaga rɔ ma kɔpɔ.” 13 Yësu oja közï bo kosa rɔ bɔ nima, kiya te, “Mo'dɔkɔ 'deni ŋgï, ileŋo yi 'deni.” Kina mönyu tönë kola bɔ nima ŋgï. 14 Tine Yësu ose gɔmo zi bo, iya te, “Kinza kari kiya lende mo dë titi zi bɔtɔ tine ari kileme röyï zi bɔ akumu 'dɔ bo kiŋeli röyï gɔ kileme ŋgï ileŋo yi 'deni rɔ ma kɔpɔ. Kina gɔ ko'de akumu kɔzɔ ame Musa ki'di kö'du mo 'deni ne tara.” 15 Ne pele lëbï 'ba Yësu ïyëlë rönï ŋgï nduwë rɔ mbëmbë. Kina bilaka koloma ŋgï rɔ tɔlɔ rɔ tïndï kako tuwö akiyandi abo gbï 'dɔ bo kileŋo lïjë di dɔ rɔkɔ'ɔ 'bënnï ga. 16 Tine Yësu ö'bö tusu rɔ bo kari titi mbowa yï mökö rɔ dɔ kutu bo to'dɔ mötu. 17 Mï kada ma dɔ kɔtɔ mɔtɔ ko'ja bo këdï rɔ tiyandi bilaka Parosi ni ti bɔ kɔmɔ kiyandi mɔtɔ ga ame kako di mï gawo 'ba mï dɔyayi 'ba Galilaya ni ti Yudayi gbï di Yerosalema ëdï yayi. Tigɔ 'ba Bɔko'ba ëdï ti Yësu tileŋo bɔ rɔkɔ'ɔ timo. 18 Kina ya mɔtɔ ga ko'de bɔ keŋme bërï mɔtɔ këdï kombi ti sora ŋgï. Lïjë o'dɔkɔ toto bɔ nima kari ko'ba bërï kɔmɔ Yësu rö yayi. 19 Tine ɔdɔ lïjë ko'ja kɔri 'ba 'dɔ to'dɔ mo tara dë kpe römöyï tïndï oso 'deni ŋgï kola kɔri dë kpe zïnnï, na lïjë kuyï rönnï ŋgï këkï tɔrɔ dɔ rö lïjë kumö bi koja bɔ nima di teyi kako bërï mï zana tïndï naga nima ko'ba kɔmɔ Yësu. 20 Kina ɔdɔ Yësu koŋgɔ ya naga nima ki'di dönnï 'deni gɔ tigɔ abo tara tine bo ilende ŋgï zi bɔ nima, bo iya te, “Bɔ pɔri ma, ola yi 'deni gɔ lende kënyë 'bï ga.” 21 Kina Parosi ni ti bɔ kɔmɔ kiyandi mo tönë ga koloma ŋgï rɔ tomeri mo ti mïnnï, iya te, “Bɔ nime bo yë na bo këdï ko'dɔ dölï kiyari rɔ bo ti Bɔko'ba te? Bɔko'ba na ŋge kɔtɔ rɔ bɔ tola bilaka gɔ lende kënyë.” 22 Meri 'bënnï ti akititi 'bënnï nima, Yësu ikali 'deni. Kina bo kileki kititi lïjë, bo iya te, “Ëddï komerike wa naga nima tara mï dökï'dï ye gɔ wa'di? 23 Ma yala na kïtëwu 'dɔ tiya mo? ‘Ola yi 'deni gɔ lende kënyë 'bï,’ ala 'dɔ kiya te, ‘Ënyï tɔrɔ kiliŋgere.’ 24 Ne ziye tikali mo rɔ ma laka kole 'ba bilaka lesi ëdï ti tigɔ mï dɔliŋɔ nime bine tola bilaka gɔ lende kënyë.” Kina bo kënyï kiya zi bɔ keŋme bërï tönë, bo iya te, “Milende zïyï, ënyï tɔrɔ kombi sora 'bï kari liŋɔ.” 25 Kina bɔ tönë kënyï ŋgï kɔrɔ tɔrɔ di kömönnï pili te, bo kombi sora abo tönë bo koloma rɔ tö'dö dɔmo ne bo kari ŋgï nduwë liŋɔ ti tïlëlu Bɔko'ba. 26 Kina lende mo kigayi bilaka pili ŋgï ki'di yi nï bɔ mɔtɔ kebe ŋgï tïlëlu Bɔko'ba. Lïjë ŋgï pili rɔ tikere na lïjë kebe ŋgï tiya mo, iya te, “Do'ja a löbu 'deni tɔne.” 27 Di gɔmo na Yësu kari ko'ja bɔ kireke awada mɔtɔ kïdëkï möyï mo rɔ Lëwë koloma 'deni mï bi 'ba tireke awada. Kina Yësu kiya zi bo te, “Ösö gɔma.” 28 Kina Lëwë kënyï kola wa pili ŋgï bo kösö gɔ Yësu. 29 Lëwë o'dɔ ŋbele ma löbu liŋɔ abo zi Yësu. Na bɔ kireke awada ma konzi ti ya mɔtɔ ga koloma ŋgï rɔ tonyo kpënnï ti Yësu ni yayi. 30 Tine na Parosi ni ti bɔ kɔmɔ kiyandi 'bënnï ga koloma ŋgï rɔ tiya mo zi bɔ kösö gɔ bo ga, iya te, “Ëddï konyoke kpeye kuwëke wa bi kɔtɔ ti bɔ kireke awada ni ti bɔ lende kënyë naga nima gɔ wa'di?” 31 Tine Yësu ileki dɔmo zïnnï, iya te, “Bɔ rɔkɔ'ɔ na ŋge kari zi bɔ ki'di wɔwɔ. Ya ma kinza ti rɔkɔ'ɔ naga ari ë'bënnï dë. 32 Mako dë tïdëkï bɔ lende laka, mako gɔ bɔ lende kënyë 'dɔ kotɔ dönnï.” 33 Ya mɔtɔ ga ënyï kititi bo, iya te, “Bɔ kösö gɔ Yowani ga ti 'ba Parosi ni ö'bö rɔ toro kpënnï to'dɔ mötu, ne ma 'bëyï ga oro 'bënnï kpënnï dë gɔ wa'di?” 34 Yësu ileki dɔmo zïnnï iya te, “Ma komerike 'beye ŋba ame kako mï karama 'ba gbe ne ti koro kpënnï ko'ja më'dë 'ba nyiti këdï tïnnï? Inza tara, 35 tine kada mo ti kömö 'jaa ame 'dɔ kogba më'dë 'ba nyiti yaga di mï löŋgö lïjë kina lïjë ti koro kpënnï 'jaa mï kada mo nima.” 36 Kina bo koloma ŋgï rɔ tiya dɔŋgala nime zïnnï, iya te, “Bɔtɔ irica kapa bɔŋgɔ ma la'ja dë kuru ma köndë timo. Ɔdɔ bɔ mo ko'dɔ tara, ti kirasi ma la'ja nima, tine akuru ma di yɔki ma la'ja inza koriya ti ma mɔlo nima. 37 Kina gbï tara, bɔtɔ odɔ layi ma la'ja dë mï kilaka layi ma köndë. Ɔdɔ ko'dɔ tara layi la'ja ti kotopa kilaka layi köndë nima ŋgï yaga, kina layi ni kpaki ti kilaka mo nima këdï kirasi rönnï ŋgï. 38 Tine layi ma la'ja todɔ mo mï kilaka ma la'ja. 39 Kina gbï bɔtɔ inza ko'dɔkɔ layi ma la'ja kpe ɔdɔ bo kuwë ma mɔlo 'deni, römöyï bo ti kiya te, ‘Ma mɔlo nime na kele.’”
