MARKOS 1

1Ini an Marahay na Bareta ni Jesu-Cristo na Aki nin Dios, 2siring sa nasusurat sa libro ni Propeta Isaias: “‘Uya, papaenoton ko saimo an sugo ko, nganing andamon an dalan na aagihan mo.’ 3Igwang nagkukurahaw sa kalangtadan: ‘Andama an dalan para sa Kagurangnan; tanosa an dalan na saiyang lalakawan!’” 4Kaya nagduman si Juan sa kalangtadan. Nagbunyag siya asin naghulit sa mga tawo, “Magbakle na kamo saka magpabunyag asin papatawadon kamo nin Dios kan mga kasalan nindo.” 5Nagduman sa pagdangog ki Juan an gabos na taga Judea saka taga Jerusalem. Itinuga ninda an saindang mga kasalan dangan binunyagan sinda ni Juan sa Salog nin Jordan. 6An gubing ni Juan hinabol na buhok nin kamelyo saka may hagkos siyang anit; an kinakakan niya doron asin dugos. 7Nagpahayag siya sa mga tawo, “An tawong maabot na kasunod ko mas mapangyari ki sa sako, asin dai ako maninigo na maghale kan saiyang sandalyas. 8Binubunyagan ko kamo sa tubig, alagad siya mabunyag saindo sa Espiritu Santo.” 9Dai nahaloy nag-abot si Jesus hale sa Nazaret nin Galilea asin binunyagan ni Juan sa Salog nin Jordan. 10Pakahawas ni Jesus sa tubig, nahiling tolos niya na an langit nabuksan asin an Espiritu Santo arog sa salampati na naghihilig saiya. 11Dangan nagsabi an sarong tingog hale sa langit, “Ika an sakong namomotan na Aki na sakong ikinakaogma.” 12Pinaduman tolos siya kan Espiritu Santo sa kalangtadan. 13Kwarentang aldaw siya duman, na pinagsogotan ni Satanas. Idtoon man duman an mga mariringis na hayop; asin pinaglingkodan siya kan mga anghel. 14Kan mabilanggo si Juan, nagduman si Jesus sa Galilea asin naghulit siya kan Marahay na Bareta nin Dios. 15Nagsabi siya, “Uminabot na an talaan na panahon; uya na an Kahadean nin Dios! Magbakle kamo asin magtubod sa Marahay na Bareta!” 16Kan naglalakaw si Jesus sa baybayon kan Danaw nin Galilea, nahiling niya an magtugang na parasira—si Simon saka si Andres—na nag-iitsa kan hikot sa danaw. 17Inapod sinda ni Jesus, “Sumunod kamo sako asin gigibohon ko kamong parasira nin tawo.” 18Binayaan tolos ninda an saindang mga hikot saka nagsunod ki Jesus. 19Sa oroenotan nahiling ni Jesus an magtugang na Santiago asin Juan na mga aki ni Zebedeo. Yaon sinda sa sakayan nagpapakarahay kan mga hikot. 20Pakahiling sainda ni Jesus inapod niya sinda; binayaan ninda sa sakayan an ama nindang si Zebedeo sagkod an mga lalaking parapatandan, dangan nagsunod ki Jesus. 21Nagduman si Jesus asin an saiyang mga disipulo sa banwaan nin Capernaum. Pag-abot kan Sabbath, naglaog si Jesus sa sinagoga saka nagtukdo. 22An mga tawo nagngalas sa saiyang katukdoan, huli ta nagtukdo siya na may kapangyarihan, bakong arog kan mga paratukdo kan katogonan. 23Biglang naglaog sa sinagoga an sarong lalaking may maraot na espiritu saka nagkurahaw, 24”Ano an boot mong gibohon samo, Jesus na taga Nazaret? Nagdigdi ka sa paglaglag samo? Midbid taka: ika an banal na sugo nin Dios!” 25Alagad pinagbotan ni Jesus an espiritu, “Dai ka magribok asin lumuwas ka sa tawong iyan!” 26Pinakimig-kimig an lalaki kan maraot na espiritu, kuminurahaw asin luminuwas sa lalaki. 27Nagngalas nin marahay an mga tawo asin nagharapotan sinda, “Ano ini, bagong katukdoan? An tawong ini may kapangyarihan na magboot sa mga maraot na espiritu asin minakuyog sinda saiya!” 28An bareta dapit ki Jesus nakalakop sa bilog na rehiyon nin Galilea. 29Paghale ninda sa sinagoga nagdagos sinda sa harong ni Simon asin Andres, kaiba si Santiago asin si Juan. 30An panugangan na babae ni Simon naghihigda ta kinakalentura, asin ini tolos nindang sinabi ni (ki) Jesus. 31Kaya dinolok ni Jesus an babae, kinaptan sa kamot saka tinabangan na bumangon. Tolos ining narahay asin naglingkod sainda. 32Pagsolnop kan aldaw, dinara ki Jesus kan mga tawo an gabos na naghehelang asin an mga may demonyo. 33Nagtiripon sa natad kan harong an gabos na tawo sa banwa. 34Binolong ni Jesus an dakul na tawong may manlaen-laen na helang asin pinaluwas niya an dakul na demonyo. Dai ni Jesus tinugotan na magtaram nin anoman an mga demonyo huli ta midbid ninda kun siisay siya. 35Kan sunod na aldaw, haloy pa bago magsirang an aldaw, nagbangon na si Jesus dangan naghale sa harong. Nagpasiring siya sa lugar na mayong tawo dangan namibi duman. 36Hinanap siya ni Simon asin kan saiyang mga kairiba. 37Kan makua ninda siya, nagsabi sinda saiya, “Hinahanap ka kan mga tawo.” 38Alagad nagsimbag si Jesus, “Magduman kita sa ibang mga banwa tanganing hulitan ko man kan tataramon nin Dios, huli ta iyan an katuyohan kan pagdigdi ko.” 39Kaya linibot ni Jesus an bilog na Galilea. Naghulit siya sa mga sinagoga saka nagpaluwas nin mga demonyo. 40Nagdolok ki Jesus an sarong daoton, naghulod (nagluhod) saka nakimaherak na tabangan. “Kun boot mo, malilinigan mo ako,” an sabi kan daoton. 41Naherak saiya si Jesus, inunat an saiyang kamot, dinutaan an daoton asin sinabihan, “Boot ko! Magin malinig ka!” 42Nahale tolos an daot asin nagin malinig an lalaki. 43Pinahale tolos siya ni Jesus pakatapos na pagbotan nin siring: 44”Dai mo ini ipang-osip, kundi magduman ka asin magpahiling sa padi; dangan magdolot ka kan ipinagboboot ni Moises sa pagpatunay sa gabos na tawo na malinig ka na.” 45Alagad ibinuyagyag niya an nangyaring ini saen man na lugar. Kaya dai na si Jesus nakakalaog na hayag sa sarong banwa. Duman na sana siya sa luwas kan banwa; asin duman na sana siya tinutuyo kan mga tawong harale sa manlaen-laen na lugar.

will be added

X\