Sofoni 3

1Bɔ̃ruroba bɛɛ Yerusalɛmugibu. Domi i sãawa mɛm nɔɔ sariba, ma i disi mɔ, i dam diinamɔ. 2I ku ra googii nɔ. I ku ra maa sɛɛyasiabu wure. I ku ra Gusunɔ bɛɛn Yinni naanɛ ko. I ku ra maa nùn susi. 3Bɛɛn sina asakpɔbu ba sãawa nge gbee sinan si su kukirimɔ wuu ge sɔɔ. Ma bɛɛn siri kowobu ba maa sãa nge yokan puruka ni nu ku ra dĩanu yi bururun sɔ̃. 4Gusunɔn sɔmɔbu ba sãawa naanɛ sariba. Ba ku ra gere ye Gusunɔ u bu sɔ̃ɔwa. Bɛɛn yãku kowobu ba Gusunɔn sãaru disi dokemɔ. Ba ku ra woodaba mɛm nɔɔwɛ. 5Adama ka mɛ, Yinni Gusunɔ u wãa ka bɛɛ. U sãawa gemgii, u ku ra weesu ko. U ra win gem terasiewa siribu sɔɔ bururu baatere. U ku ra tɔ̃ru bure. Adama tɔn kɔ̃soba ba kɔ̃sa mɔ̀, sekura kun bu mɔ̀. 6Wi, Yinni Gusunɔ u nɛɛ, u bwese girinu go, ma u nin gbãranu ka nin kuku yenu kɔsuka. U dera goo ku ra maa sĩ nin swɛɛ sɔɔ. U nin wusu kɔsuka, goo kun maa wãa mi. 7Yera u nɛɛ, bɛɛ Yerusalɛmugibu, ì n daa nùn nasie, ma i win sɛɛyasiabu wuramɔ, u ǹ daa bɛɛn wãa yenu kɔsukumɔ. U ǹ daa maa bɛɛ sɛɛyasiamɔ nge mɛ u kua, adama i ra n sɛndewa kɔ̃san kobu sɔɔ. 8Yen sɔ̃, wi, Yinni Gusunɔ u nɛɛ, i nùn maruo tɔ̃ɔ tè sɔɔ u koo se u bɛɛ wɔrima. Domi u gɔ̃ru doke u bwesenu ka nin sinambu mɛnna u bu win mɔru sɔ̃ɔsi ka yen dam. Kpa n sãare nge ba tem mɛ kpuro dɔ̃ɔ doke win mɔrun sɔ̃. 9Saa ye sɔɔ, Yinni Gusunɔ u koo tɔmbun yari dɛɛrasia kpa bu win yĩsiru soku bu nùn sã sannu. 10Be ba nùn sãamɔ ba yarinɛ baama, ba koo ka nùn kɛ̃nu naawa saa Etiopin daanun gurun di. 11Yen tɔ̃ɔ te, bɛɛ win tɔmbu Isireliba, i ǹ sekuru wasi bɛɛn daa kɔ̃sa ka bɛɛn tora ni i kua sɔɔ. Domi u koo be ba ra tii sue bɛɛn suunu sɔɔ wuna, kpa bɛɛn tiin tɔn biaru tu kpe win guu dɛɛrarun wɔllɔ. 12U koo de tɔmbu fiiko ba n wãa bɛɛn suunu sɔɔ be ba ǹ tii sue. Ba koo win yĩsiru soku u ka bu kɔ̃su. 13Isireli be ba tie, ba ǹ maa kɔ̃sa mɔ̀. Ba ǹ maa weesu mɔ̀. Gari kɔ̃si yi ǹ ko n wãa ben nɔsɔ. Ba ko n wɛ̃rewa, goo kun bu baasimɔ. 14Bɛɛ Siɔnigibu, i gɔ̃ru dobun kuuki koowo. Bɛɛ Isireliba kpuro gesi, i nuku dobun kuuki koowo. Bɛɛ Yerusalɛmugibu, i yɛ̃ɛrio kpa i nasaran kuuki ko ka bɛɛn gɔ̃ru kpuro. 15Yinni Gusunɔ u bɛɛn sɛɛyasiabu kpeesia bi u koo raa bɛɛ ko. U bɛɛn yibɛrɛba yarinasia. Gusunɔ sina boko, bɛɛ Isireliban Yinni, u wãa bɛɛn suunu sɔɔ. I ǹ maa kɔ̃sa gaa wasi. 16Yen tɔ̃ɔ te, ba koo bɛɛ Yerusalɛmugibu sɔ̃ bu nɛɛ, i ku bɛrum ko Siɔniɔ. I ku de bɛɛn gɔma dwiiya. 17Gusunɔ bɛɛn Yinni u wãa bɛɛn suunu sɔɔ. U sãawa nge tabu durɔ wi u ra faaba ko. U koo nuku doo bakabu ko bɛɛn sɔ̃. U ǹ maa gãanu gerumɔ yèn sɔ̃ u bɛɛ kĩ. U ko n nuku doo bakabu mɔ. 18Be ba wãa nuku sankiranu sɔɔ yèn sɔ̃ ba ka Yerusalɛmu tonda, ba wãa sekuru sɔɔ te ta bu buniɛmɔ nge sɔmunu, ma ba ku ra maa win tɔ̃ɔ bakanu di, beya u koo mɛnnama. 19Yen tɔ̃ɔ te, u koo be ba bɛɛ dam dimɔ wɔri, kpa u yɛmɔbu faaba ko. U koo be ba raa gira mɛnna kpa u de bu tɔmbu nuku dobu wɛ̃ kpa bu yĩsiru yari tem kpuro sɔɔ mi ben baawure u raa sekuru dimɔ. 20Yen tɔ̃ɔ te, u koo de i wurama. Saa ye sɔɔ, u koo bɛɛ mɛnna. Tɔmbu ba koo bɛɛ bɛɛrɛ wɛ̃ kpa i yĩsiru yari handunian bwesenu kpuron suunu sɔɔ sanam mɛ u koo ka bɛɛn yobu wurama i bu wa. Wi, Yinni Gusunɔwa u yeni gerua.

will be added

X\