Sofoni 2

1Bɛɛ sekuru sariba, i de i sina i bwisiku, 2Yinni Gusunɔn himba yu sere koora. Kpa tɔ̃ɔ te, tu ku raa bɛɛ samba ko nge doo sako ge ga ka woo doonɔ. I de i sina i bwisiku Yinni Gusunɔn mɔru baka yen tɔ̃ru tu sere tunuma tu bɛɛ deema. 3Bɛɛ be i tii kawe kpuro tem mɛ sɔɔ, i Yinni Gusunɔ kasuo. Bɛɛ be i nùn mɛm nɔɔwɛ, i gem kasuo, kpa i tii kawa. Sɔrɔkudo i ko i yari Gusunɔn mɔrun tɔ̃ɔ te sɔɔn di. 4Gasan tem mu koo bansu ko. Kpa Asikaloni yu yɔ̃ra dira. Ba koo Asidɔdun tɔmbu gira sɔ̃ɔ sɔɔ gbãara. Kpa bu Ekoronin tɔmbu seeya ben wuun di. 5Bɛɛ Keretin bweseru, bɛɛ be i wãa nim wɔ̃kun goorɔ, i kam kuawa. Wunɛ maa Kanani, wunɛ wi a sãa Filisitiban tem, Yinni Gusunɔ u nun gerusimɔ. U nɛɛ, u koo nun kpeerasia. Goo kun maa sinamɔ wunɛ sɔɔ. 6Nim wɔ̃kun goo te, ta koo kowa kpara yenu, mi kparobu ba ko n da bɔsu ba n ben yãanu kparamɔ. 7Domi saa ye sɔɔ, Gusunɔ, Yudaban Yinni u koo ben be ba tie kpara kpa u ka ben yobu wurama. Nim wɔ̃kun goo te, ta koo ko begiru. Miya ba ko n da yaa sabenu kpare, kpa yoka bu kpuna Asikalonigibun dia mi. 8U Mɔabuba ka Amɔniban wɔma nua ye ba ka win tɔmbu sekuru doke. Ma ba tii sua ba ben tem nɔɔ bura yenu susisia. 9Yen sɔ̃na wi, Gusunɔ Isireliban Yinni, wi, wi u wɔllu ka tem mɔ, u nɛɛ, sere ka win wãaru, u koo de Mɔabuba bu kam ko nge Sodomugibu, kpa Amɔniba bu maa kam ko nge Gomɔragibu, ben tem mu yaka kɔ̃susu kpi, ǹ kun mɛ mu gɔsira bɔru. Gãanu kun maa kpiimɔ mi sere ka baadommaɔ. Win tɔn be ba tie, ba koo Mɔabu be, ka Amɔni be wɔri bu ben yãnu gura bu tem tubi di. 10Yeniwa Gusunɔ u koo de yu bu deema ben tii suabun sɔ̃ ka sere maa ye ba wi, Gusunɔ wɔllu ka tem Yinnin tɔmbu wɔnwa ba sekuru doke. 11Wi, Yinni Gusunɔ, u ǹ ka bu wɔnwɔndu mɔ̀. U koo handunia kpuron bũnu kam koosia. Baa bwese ni nu wãa tem burenɔ, nu koo yiira win wuswaaɔ nin wusɔ. 12Bɛɛ Etiopigibu, ba koo maa bɛɛ sɔkiri ka win takobi bu go. 13U koo win nɔmu dɛmiɛ sɔ̃ɔ yɛ̃san nɔm geuɔ u Asirigibu kam koosia, kpa Ninifu yu ko bansu. Gãanu kun maa kpiimɔ mi. 14Yaa sabena nu koo sina mi, yɛɛ bwese bweseka gesi. Boorosu ka duuru bɛɛkuna nu koo kpuna furɔ si ba yen gbereba kuan sɔɔwɔ. Ba koo kuuki nɔ saa fɛnɛntiban di. Nɔni swãara ko n wãa yen kɔnnɔwɔ. Domi dirun bura te ba kua ka sɛdurun dãa ta koo kɛsikira. 15Nge mɛya wuu ge, ga koo ko, ge, ge ga raa tii sue mi, ma ga tamaa ga wãawa bɔri yɛndu sɔɔ, ma ga tii sɔ̃ɔmɔ ga mɔ̀, gera ga kpuro kere. Wee ga wɔruma ga bansu kua. Ga kua yɛɛn wãa yeru. Wi u sarɔ mi, u koo wia kowa u nɔma kpara.

will be added

X\