Sofoni 1

1Gari yiniwa Yinni Gusunɔ u Sofoni, Kusin bii sɔ̃ɔwa Yosiasi, Amɔɔn bii, Yudaban sina bokon bandun waati sɔɔ. Sofoni wi, u sãawa Gedalian debubu, Amarian sikadobu, Esekiasin yãasebu. 2Yinni Gusunɔ u nɛɛ, kon kpuro kpeerasia handunia sɔɔ. 3Kon tɔmbu ka yɛɛ ka gunɔsu ka swɛ̃ɛ kpeerasia ka sere maa tɔn kɔ̃sobu ka ye ya ra bu sokurasie. Kon tɔmbu kpuro kpeerasia handunia sɔɔ. Nɛ, Yinni Gusunɔwa na yeni gerua. 4Yinni Gusunɔ u maa nɛɛ, kon Yudaba ka Yerusalɛmugibu kpuro nɔma doke. Kon bũu wi ba mɔ̀ Baalin sãa yee ni nu tie kpeerasia min di. Kon yen wirugibu ka yen yãku kowobun yĩsa go. 5Be ba dii tɛɛri wɔllɔ kperi ka suru sãamɔ ka be ba bɔ̃rumɔ ka nɛ, Yinni Gusunɔn yĩsiru, ma ba wure ba bɔ̃rumɔ ka ben bũun yĩsiru, be kpurowa kon go. 6Be ba man biru kisi ka be ba ku ra man kasu, ka sere maa be ba ku ra man ben gari saawara ko, be kpurowa kon go. 7I nɔɔ mario wi, Yinni Gusunɔn wuswaaɔ. Domi win tɔ̃ru ta turuku kua. U win yãkuru sɔɔru kua. U maa gɔsa be ba koo tu di. 8Wi, Yinni Gusunɔn yãku ten tɔ̃ru sɔɔ, u koo wirugibu ka sina bokon bibu wɔri, ka sere maa be ba tɔn tukobun komanu swĩi. 9Yen tɔ̃ɔ te, be ba ku ra sãa yerun kɔnnɔ suuku taaram kã nge bũu sãɔbu, ka sere be ba ben sunɔn yɛnu dukia yibiamɔ ye ba gurama ka gbɛna, ka dam dibu, be kpurowa u koo wɔri. 10Yen tɔ̃ɔ te, ba koo wuri nɔ sere kɔnnɔwɔ ge ba mɔ̀ Swɛ̃ɛ, ka maa wuun wɔɔ bera gaan mi. Mɛya nɔni swãa bakara ko n wãa guunu wɔllɔ. 11Bɛɛ Makitɛsigibu, i wuri koowo. Domi tenkuba kpuro ba koo kam ko. Be ba gobi kɔsimɔ kpuro ba koo kpeera. 12Yen tɔ̃ɔ te, u koo Yerusalɛmu bũuri ka fitilanu. U koo tɔmbu wɔrima be ba sɔ̃ kpɛtɛɛ nge tam kɔrɔnu. Ma ba gerumɔ ben gɔ̃ruɔ ba mɔ̀, wi, Yinni Gusunɔ u ǹ gea mɔ̀, u ǹ maa kɔ̃sa mɔ̀. 13Ba koo ben arumani gura kpa ben yɛnusu su ko bansu. Ba koo dia bani yè sɔɔ ba ǹ sinamɔ. Ba koo resɛm duure, adama ba ǹ yen tam nɔrumɔ. 14Yinni Gusunɔn tɔ̃ɔ nanumgira ta turuku kua. Te wee ta wee fuuku, ta nɔɔgiru sue. Tabu durɔ damgii u koo kuuki ko dɔma te. 15Tɔ̃ɔ te, ta sãawa mɔrun tɔ̃ru. Tɔ̃ɔ te, ta sãawa nuku sankiranun tɔ̃ru. Ta sãawa kam kobun tɔ̃ru. Tɔ̃ɔ te, yam wɔ̃kura koo tu wukiriwa nge bukɔ ka guru winu. 16Yen tɔ̃ɔ te, tabu kowobu ba koo kɔbi so kpa bu kuuki ko bu ka wuu si su gbãranu mɔ wɔri. 17U koo tɔmbu nuku sankiranu kpɛ̃ɛ kpa ba n sĩimɔ nge wɔ̃kobu. Domi Yinni Gusunɔwa ba torari. U koo de ben yɛm mu n tɛrie nge tua, kpa ben gonu nu n sãa nge kubanu. 18Yen dɔma te, ben sii geesu ǹ kun mɛ ben wura, yen gaa kun kpɛ̃ yu bu wɔra Yinni Gusunɔn mɔru baka yen min di. Tem mɛ kpuro mu koo dɔ̃ɔ mwaara win mɔrun sɔ̃. U koo mɛn tɔmbu kpuro gowa subaru sɔɔ.

will be added

X\