Sakari 9

1Amɛniwa Yinni Gusunɔ u gerua Hadarakin tem sɔ̃ u nɛɛ, kon wuu ge ba mɔ̀ Damasi siri. Domi nɛn nɔni wãa tɔmbu sɔɔ nge mɛ yi wãa Isireliban bwese kɛri kpuro sɔɔ. 2Kon maa Hamati ye ya wãa Damasin tem nɔɔ bura yerɔn tem siri ka Tiri ka sere maa Sidoni, baa mɛ wuu sin tɔmbu ba bwisi mɔ. 3Tiri ye, ya wãa gbãra damgirun suunu sɔɔ. Mɛya ya gobi guramɔ nge tua. Ma ya wura guramɔ nge pɔtɔkɔ. 4Adama nɛ, Yinni Gusunɔ, kon ye kpuro mwa. Kon yen dam sure nim wɔ̃ku sɔɔ kpa n de yu dɔ̃ɔ mwaara. 5Asikalonigibu ba koo ye wa kpa bu bɛrum duura. Kon de tem yiiri bakabu bu Gasa wɔri, kpa Ekoronigibun yĩiyɔbu kpuro bu kam ko. Gasa ya koo sunɔ bia. Goo kun ko n maa wãa Asikaloniɔ. 6Sɔbu ba koo na bu sina Asidɔduɔ. Kpa n Filisitiban tii suabu kpeerasia. 7Ba ǹ maa yɛm dimɔ. Ba ǹ maa bũu yãku dĩanu dimɔ. Ba koo kowa nɛ, Gusunɔn tɔmbu nge Yudaba kpa Ekoronigibu ba n maa sãa nɛn tɔmbu nge mɛ Yebusiba ba kua. 8Kon nɛn sansani gira n ka nɛn sãa yeru sikerena. Kpa yibɛrɛ be ba daamɔ ba wuramamɔ bu ku raa ye wɔri. Dam dioba kun maa sarɔ mi. Domi nɛn nɔni wãa mi. 9Bɛɛ Siɔnigibu, i nuku dobun kuuki koowo. Bɛɛ Yerusalɛmugibu, i yɛ̃ɛrio nuku dobun sɔ̃. Wee bɛɛn sina boko u sisi bɛɛn mi. U sãawa gemgii ka faaba kowo. U ǹ tii sue. Kɛtɛku buuwa u sɔni. 10Kon de tabu kɛkɛ yi kpe Efaraimun temɔ kpa dumi ka tɛn ni ba raa ka tabu kua yu kpeera Yerusalɛmuɔ. Sunɔ wi, u koo ka bwesenu bɔri yɛndu naawa. U ko n bandu diiwa nim wɔ̃ku geen di sere ka nim wɔ̃ku giɔ, saa maa daa te ba mɔ̀ Efaratin di n ka da handunian goonu nnɛ sɔɔ. 11Yinni Gusunɔ u nɛɛ, nɛn arukawani ye na ka bɛɛ bɔkuan sɔ̃, ma i ye sire ka yãku yaa yɛm, kon bɛɛn yobu yara dɔkɔ kpirirun di te ta ǹ nim mɔ. 12Bɛɛ yobu, bɛɛ be i yĩiyɔ bakabu mɔ, i wuro bɛɛn wusɔ si su gbãranu mɔ. Na maa bɛɛ nɔɔsiamɔ ma kon bɛɛ domaru kua nge yellugirun nɔn yiru. 13Kon Yuda dendi nge tɛndu. Kpa Efaraimu ya n sãa ten sɛ̃ɛnu. Yerusalɛmu, kon wunɛn bibu sua bu Gɛrɛkiba tabu wɔri. Kon bu kowa nge tabu durɔ damgiin takobi. 14Nɛ, Yinni Gusunɔ, kon tii sɔ̃ɔsi wɔllɔ. Nɛn sɛ̃u ga koo doona nge guru maakinu. Kon kɔba so, kpa n sarama guru woo bɔkɔ sɔɔ, ge ga wee saa sɔ̃ɔ yɛ̃san nɔm dwaru gian di. 15Nɛ, Gusunɔ, wɔllu ka tem Yinni, kon nɛn tɔmbu kɔ̃su. Ba koo ben yibɛrɛba kamia bu ben kpurantɛɛnun kpenu kɔsuku. Kon de yibɛrɛ ben yɛm mu yari nge tam, ǹ kun mɛ nge yãku yaa yɛm mɛ mu ra gbɛ̃ɛru yibu bu yɛ̃ka yãku yerun kãanɔ. 16Yen tɔ̃ɔ te, kon nɛn tɔmbu faaba ko nge mɛ yãa kparo u ra win yãanu faaba ko. Ba koo balli ben temɔ nge kpee gobigii ni ba mani sina furɔ sɔɔ. 17Tem miya doo nɔɔru ka buram mu ko n wãa. Alikama ka tam koo de aluwaasiba ka wɔndiaba ba n dam mɔ.

will be added

X\