Sakari 8

1Gusunɔ wɔllu ka tem Yinni u gerua u nɛɛ, 2nɛn nisinu kpã Yerusalɛmun sɔ̃. Domi na ye kĩ gem gem. 3Yen sɔ̃na na nɛɛ, kon wura Yerusalɛmu ye sɔɔ kpa na n wãa mi. Ba koo ye soku wuu gemguu. Kpa bu maa nɛ, Gusunɔ wɔllu ka tem Yinnin guu te soku guu dɛɛraru. 4Durɔ tɔkɔnu ka kurɔ tɔkɔnu nu koo ka dɛki sĩima kpa nu na nu sina yen batumaba sɔɔ. 5Bii aluwaasiba ka bii wɔndiaba ba koo yibu yen batuma be sɔɔ ba n dweebu mɔ̀. 6Isireli be ba tien nɔni sɔɔ, ya ko n sãa nge ye ya kun kpɛ̃ yu koora. Adama nɛ, Gusunɔ wɔllu ka tem Yinni, kon kpĩ n maamaaki ye ko. Nɛna na yeni gerua. 7Wee na nɛn tɔmbu faaba mɔ̀ be ba wãa sɔ̃ɔ yari yerɔ ka sɔ̃ɔ duu yerɔ. 8Kon ka bu wurama kpa bu sina Yerusalɛmuɔ ba n sãa nɛn tɔmbu kpa na n maa sãa ben Yinni gemgii wi u naanɛ mɔ. 9Wee ye nɛ, Gusunɔ wɔllu ka tem Yinni na gerua. Na nɛɛ, i wɔrugɔru koowo bɛɛ be i nua gisɔ ye nɛn sɔmɔbu ba gerua sanam mɛ ba nɛn sãa yee ten kpɛɛkpɛɛku swĩi. 10Domi yellu, goo ku ra win sɔmburun kɔsiaru wa. Goo ku ra maa yaa sabe ni nu nùn sɔmburu kuan kɔsiaru wɛ̃. Saa ye sɔɔ, goo ku ra yari. Goo ku ra maa du ka bɔri yɛndu yibɛrɛban sɔ̃. Domi na tɔmbu yɔ̃suwa bu ka wɔrina. 11Adama tɛ̃, na ǹ maa Isireli be ba tie kuammɛ nge mɛ na kua yellu. Nɛ, Gusunɔ wɔllu ka tem Yinniwa na yeni gerua. 12Kon de bɔri yɛndu tu duwa tem sɔɔ kpuro. Resɛm ya koo ma. Gura ya koo nɛ kpa tem mu dĩanu ko. Doma nini kpurowa kon Isireli be ba tie kua. 13Bɛɛ Yudaba ka Isireliba, wee i kua bwese te na bɔ̃rusi bwesenun suunu sɔɔ. Adama tɛ̃, kon bɛɛ faaba ko kpa i n sãa domarugibu tɔmbun suunu sɔɔ. Yen sɔ̃, i ku bɛrum ko. I de i n wɔrugɔru mɔ. 14Amɛniwa nɛ, Gusunɔ wɔllu ka tem Yinni na gerua. Na nɛɛ, na raa gɔ̃ru doke n bɛɛ kɔ̃sa kua yèn sɔ̃ bɛɛn baababa ba nɛn mɔru seeya. Na ǹ daa gɔ̃ru gɔsie n ye kɔbia. 15Adama tɛ̃, na gɔ̃ru doke n Yerusalɛmu ka Yudan tem kpuro gea kua. Yen sɔ̃, i ku bɛrum ko. 16I ka gari yini sɔmburu koowo. Yiya, baawure u n da win winsim gem sɔ̃. Kpa i n da baawure siri gem sɔɔ i n ka wãa bɔri yɛndu sɔɔ. 17I ku goo kɔ̃sa kua. I ku bɔ̃ri weesugii ko. Domi yeniba kpurowa na tusa. Nɛ, Yinni Gusunɔwa na yeni gerua. 18Gusunɔ wɔllu ka tem Yinni u nɛɛ, 19nɔɔ bɔku ni i ra ko suru nnɛse sɔɔ ka suru nɔɔbuse sɔɔ ka suru nɔɔba yiruse sɔɔ ka suru wɔkuruse sɔɔ, nu koo gɔsira nuku dobun tɔ̃nu Yudaɔ. Ni sɔɔra ba ko n da tɔ̃ɔ bakanu di. Adama yeba kpuro sɔɔ, i de i gem ka bɔri yɛndu kĩa. 20Na maa wure na nɛɛ, tɔmbu ba koo na Yerusalɛmuɔ saa wusu dabinun di. 21Wusu gasun tɔmbu ba koo gasun tɔmbu sɔ̃ bu nɛɛ, bu da bu nɛ, Gusunɔ wɔllu ka tem Yinnin durom kasu Yerusalɛmuɔ kpa bu man sã. 22Geema, bwese dabinu ka maa bwese ni nu dam mɔ nu koo na nu nɛn durom mɛ kasu kpa nu man sã. 23Nɛ, Gusunɔ wɔllu ka tem Yinni na nɛɛ, yen tɔ̃ɔ te, bweseru baatere sɔɔ, tɔmbu wɔku wɔkubu ba ko n Yuu turon yabe soo nɛni ba n mɔ̀, ba koo ka nùn da. Domi ba nua ma nɛ, Gusunɔ na wãa ka wi.

will be added

X\