Sakari 7

1Darusin bandun wɔ̃ɔ nnɛse sɔɔ, yen suru nɔɔba nnɛse wi ba mɔ̀ Kisilun sɔ̃ɔ nnɛse sɔɔra Yinni Gusunɔ u ka Sakari gari kua u nɛɛ, 2Betɛligibu ba raa Sarɛsɛɛ ka Regɛmu Mɛlɛki ka gabu gɔra Gusunɔ wɔllu ka tem Yinnin sãa yerɔ bu ka win durom kana. 3Kpa bu maa yãku kowobu ka win sɔmɔbu bikia bà n ko ba n sumɔn na, kpa ba n nɔɔ bɔkua wɔ̃ɔn suru nɔɔbuse kpuro sɔɔ nge mɛ ba mɔ̀ tɛɛbun di. 4Yera Gusunɔ, wɔllu ka tem Yinni u Sakari sɔ̃ɔwa u nɛɛ, 5a yãku kowobu ka tɔn be kpuro wisio a nɛɛ, saa wɔ̃ɔ wata ka wɔkurun di, ba ra nɔɔ bɔke kpa ba n wãa nuku sankiranu sɔɔ wɔ̃ɔn suru nɔɔbuse ka nɔɔba yiruse sɔɔ. Adama ba ǹ ye mɔ̀ bu ka man bɛɛrɛ wɛ̃. 6Bà n maa dimɔ, ba nɔrumɔ, ben tiin sɔ̃na. 7Yellu, nɛ, Yinni Gusunɔ na tɔmbu kirɔ kua ka gari yinin bweseru nɛn sɔmɔ gbiikobun min di. Saa ye sɔɔ, Yerusalɛmu ka wuu si su ka ye sikerenɛn tɔmbu ba wãa bɔri yɛndu sɔɔ, ma tɔmba yiba sɔ̃ɔ yɛ̃san nɔm dwaru gia ka wɔwaɔ. 8- 9Gusunɔ wɔllu ka tem Yinni u maa Sakari sɔ̃ɔwa u nɛɛ, a tɔn be gari yini yaayasio yi yi nɛɛ, bu tɔmbu sirio dee dee, kpa ba n tɔn geeru ka wɔnwɔndu mɔɔsinɛ. 10Bu ku gɔminibu ka gobekuba ka sɔbu ka sãarobu dam dɔre. Bu ku maa ben winsim kɔ̃sa bwisikusi. 11Adama ba ǹ gari yi swaa sue. Ba swaa taayawa. 12Ma ba ben gɔ̃rusu bɔbiasia nge kpee kpikiru. Ba ǹ nɛ, Gusunɔ wɔllu ka tem Yinnin wooda ye swaa daki, ye na bu wɛ̃ saa nɛn sɔmɔbun min di, be nɛn Hunde u ka gari kua. Ma ben swaa taa bi, bu man mɔru kua too. 13Sanam mɛ na bu soka, ba ǹ wisa. Yen sɔ̃na nɛn tii na ǹ maa bu wisa sanam mɛ ba man somiru kana. 14Yen sɔ̃na na bu yarinasia bwesenu kpuron suunu sɔɔ ni ba ǹ daa yɛ̃. Ma ba ben tem deri dirum goo ku ra maa sare mi. Ma tem gem mɛ, mu kua bansu. Nɛ, Gusunɔ wɔllu ka tem Yinniwa na yeni gerua.

will be added

X\