Sakari 5

1Sakari u maa nɔni seeya kãsiru sɔɔ ma u tire kureru garu wa ta yɔ̃ɔwa. 2Ma Gusunɔn gɔrado u nùn bikia u nɛɛ, mba a waamɔ mi. Ma u nùn wisa u nɛɛ, tire kureru gara na waamɔ ta yɔ̃ɔwa. Ten dɛ̃ɛbu sãawa gɔm soonu yɛndu. Ten yasum maa gɔm soonu wɔkuru. 3Yera u nùn sɔ̃ɔwa u nɛɛ, bɔ̃riya ta sɔɔwa yi yi koo yabi tem mɛ kpuro sɔɔ. Ten bee tiaɔ, ba yoruawa ma ba koo gbɛnɔbu kpuro gira minin di. Bee tiaɔ maa ba koo be ba ra bɔ̃ri weesugii ko gira. 4Gusunɔ wɔllu ka tem Yinnin tiiwa u koo de bɔ̃ri yi, yi na kpa yi gbɛnɔbun yɛnusu di ka sere be ba ra ka Yinni Gusunɔn yĩsiru bɔ̃re kam. Miya yi koo sina yi yin wãa yeru ko kpa yi ben dirun kpɛɛkpɛɛku ka ten kpenu di. 5Gusunɔn gɔrado wi, u Sakari susi ma u nɛɛ, a nɔni seeyo a wa ye ya yarim wee. 6Ma u nùn wisa u nɛɛ, mba mi. Ma u nɛɛ, birera mi, ta yarim wee tè sɔɔ tem min tɔmbu kpuron toranu yiba. 7Sanam mɛ bire ten wukiritia ye ba kua ka pɛɛrum ya wukiara, yera u kurɔ goo wa u sɔ̃ ten sɔɔwɔ. 8Ma gɔrado wi, u nɛɛ, kurɔ wi, u sãawa toranu. Ma u wure u kurɔ wi taare bire ten sɔɔwɔ, ma u wukiri. 9Ye u maa nɔni seeya wɔllɔ, yera u kurɔbu yiru gabu wa kãsiru sɔɔ. Kurɔ be, ba kasi mɔ nge kpakpayɛ, ma woo ga yi suamɔ. Ma ba na ba bire te sua ba ka da wɔllɔ. 10Ma u gɔrado wi bikia u nɛɛ, mana ba ka tu dɔɔ. 11U nùn wisa u nɛɛ, ba ka tu dɔɔwa Babilonin temɔ. Miya ba koo tu diru bania. Bà n tu bana ba kpa, kpa bire te, ta n wãa mi.

will be added

X\