Sakari 4

1Gusunɔn gɔrado wi u ka Sakari gari mɔ̀ u na u nùn yamia nge mɛ ba ra tɔnu dom yamiɛ. 2Ma u nùn bikia u nɛɛ, mba a waamɔ mi. Ma u nùn wisa u nɛɛ, wuran dabuwa na waamɔ gèn wɔllɔ ba wekeru garu sɔndi. Weke te, ta kãanu nɔɔba yiru mɔ. Nin wɔllɔwa ba fitilanu sɔndi tia tia. Kãa nin min diya gum mu ra ka de fitila nin mi. 3Olifin dãnu yiru ya wãa weke ten bɔkuɔ. Teeru nɔm dwaru gia, teeru maa nɔm geu gia. 4Ma Sakari u wure u gɔrado wi bikia u nɛɛ, yinni, mba yeniba kpuron tubusianu. 5Ma Gusunɔn gɔrado u nɛɛ, a ǹ yen tubusianu yɛ̃? 6(6a) Ma Sakari u nɛɛ, aawo, yinni. Ma gɔrado u nɛɛ, (10) b fitila nɔɔba yiru ye, ya sãawa Yinni Gusunɔn nɔni yi yi tem bukianamɔ. (11) Ma Sakari u maa nɛɛ, mba olifin dãnu yiru ye ya wãa dabu gen nɔm geuɔ ka gen nɔm dwarɔ min tubusianu. (12) U maa bikia u nɛɛ, mba olifin kãanu yiru yen tubusianu ni nu wãa dabun kãanu yiru yen bɔkuɔ, mìn di gum kokumɔ nge wura. (13) Yera u wisa u nɛɛ, a ǹ nin tubusianu yɛ̃? Ma u nɛɛ, aawo, Yinni. (14) U nùn wisa u nɛɛ, nu sãawa tɔmbu yiru be na gɔsa ba nɛ, tem kpuron Yinni sãamɔ. (6b) Yera u maa nɛɛ, wee ye Yinni Gusunɔ u Sorobabɛli sɔ̃ɔmɔ. U nɛɛ, n ǹ mɔ ka wi, Sorobabɛlin dam ǹ kun mɛ ka win yiikowa u koo kpĩ u sɔmburu ko. Adama ka wi, Gusunɔn Hunden dama. Wi, wɔllu ka tem Yinniwa u yeni gerua. 7U maa nɛɛ, Sakari, mba n da n guu baka te ta wãa Sorobabɛlin wuswaaɔ. Sorobabɛli wi, u koo tu kɔra kpa u kpee geeru yara te ba koo sɔndi sãa yerun wii kpiirɔ. Saa ye sɔɔ, tɔmbu ba koo nuku dobun kuuki ko ba n mɔ̀ anna a kpee buraru wa. 8Yinni Gusunɔ u maa Sakari sɔ̃ɔwa u nɛɛ, 9Sorobabɛliwa u dii ten kpɛɛkpɛɛku swĩi. Wiya u koo maa ten bana wiru go. Saa ye sɔɔra nɛn tɔmbu ba koo gia ma nɛ, Gusunɔ wɔllu ka tem Yinniwa na nun gɔrima. 10a Yen sɔ̃, bu ku sɔmbu ten tore gɛm baa tà n sãan na piibu. Ba koo nuku dobu ko bà n wɛ̃ɛ wa yi ba ra ka ganan dɛndabu mɛɛri Sorobabɛlin nɔmaɔ.

will be added

X\