Sakari 3

1Sakari u Yosue yãku kowo tɔnwero wa u yɔ̃ Yinni Gusunɔn gɔradon wuswaaɔ. Ma Setam u yɔ̃ win nɔm geuɔ u ka nùn taarɛ wɛ̃. 2Ma Yinni Gusunɔn gɔrado u Setam sɔ̃ɔwa u nɛɛ, Gusunɔ u nun gerusi wi, wi u Yerusalɛmu gɔsa. A ǹ yɛ̃ ma Yosue u sãawa nge dãa nɔɔ ge ba wuna dɔ̃ɔn di? 3N deema yãa disinugina Yosue u sebua u ka yɔ̃ gɔrado win wuswaaɔ. 4Ma gɔrado wi, u be ba yɔ̃ win wuswaaɔ sɔ̃ɔwa u nɛɛ, bu Yosuen yãa disinugii ni wunɔ. Ma u Yosue sɔ̃ɔwa u nɛɛ, wee na nun wunɛn toranu wuna. Ma na nun tɔ̃ɔ baka yãnu sebusia. 5U maa wooda wɛ̃ u nɛɛ, bu nùn dawani ye ya dɛɛre bɔkusio. Ma ba nùn ye bɔkusia. Ma ba nùn yãnu sebusia. Saa ye sɔɔ, gɔrado wi, u yɔ̃ mi. 6U Yosue gari yini sɔ̃ɔwa u nɛɛ, 7amɛniwa wi, Gusunɔ wɔllu ka tem Yinni u gerua. U nɛɛ, à n sĩimɔ win swɛɛ sɔɔ, ma a win woodaba mɛm nɔɔwammɛ, wuna kaa win sãa yeru ka ten yaaran sɔmburu kpara. U koo nun kowa be ba win sɔmburu mɔ̀n turo. 8Yosue, wunɛ yãku kowo tɔnwero, wunɛ ka wunɛn tɔn be ba sɔ̃ wunɛn wuswaaɔ, i swaa dakio i nɔ. Tɔn be, ba ko n gina sãawa yĩreru wi u sisin sɔ̃. Domi Yinni Gusunɔ u koo win sɔm kowo gɔrima wi u sãa kpii pɔtura. 9Wunɛ Yosuen wuswaaɔ, u kperu garu yiimɔ. Wuswɛɛ nɔɔba yiruwa ta mɔ. Win tiiwa u koo yore te sɔɔ. Kpa u tem mɛn toranu wuna sɔ̃ɔ teeru. 10Wi, Gusunɔ wɔllu ka tem Yinni u nɛɛ, yen tɔ̃ɔ te, i ko i sokuna i nuku dobu ko bɔri yɛndun sɔ̃ bɛɛn dãa gbaanɔ.

will be added

X\