Sakari 2

1Sakari u nɔni seeya ma u maa kɔbi nnɛ wa. 2Ma u gɔrado wi u ka nùn gari mɔ̀ bikia u nɛɛ, kɔbi yirà mini. Ma u nùn wisa u nɛɛ, kɔbi yi yi Yudaba ka Isireliba ka Yerusalɛmugibu yarinasiawa mi. 3Yen biru, Yinni Gusunɔ u maa nùn sekobu nnɛ sɔ̃ɔsi. 4Ma u nùn bikia u nɛɛ, mba seko be, ba kobu na. Ma u nùn wisa u nɛɛ, ba nawa bu ka kɔbi yi tɔ̃ya ko, kpa bu yi bɔɔku yi, yi yi Yudan tem wɔri yi mɛn tɔmbu yarinasia sere ben goo kun kpĩa u ka tii yina. 5Ye Sakari u maa mɛɛra, yera u durɔ goo wa u wɛ̃ɛ yĩirutii nɛni. 6Ma u nùn bikia u nɛɛ, mana a dɔɔ. Ma u wisa u nɛɛ, na dɔɔwa n Yerusalɛmu yĩire n ka yen dɛ̃ɛbu ka yen yasum wa. 7Sanam mɛ Gusunɔn gɔrado wi u ka nùn gari mɔ̀, u susim wee, yera gɔrado goo u maa na u ka wiɔnɔ yinna. 8Ma u nùn sɔ̃ɔwa u nɛɛ, a duka doo a aluwaasi wi sɔ̃ a nɛɛ, Yerusalɛmu ya koo ko wuu gè ba ǹ maa gbãraru toosimɔ. Domi gen tɔmbu ka gen yaa sabenu koo dabia. 9Yinni Gusunɔ u maa nɛɛ, u ko n sãa nge gbãra dɔ̃ɔgiru Yerusalɛmu yen sɔ̃. Mɛya u ko n maa sãa yen bɛɛrɛ. 10Sakari u nɛɛ, Yinni Gusunɔ u gerua u nɛɛ, bɛɛ be u raa yarinasia handunian goonu nnɛ ye sɔɔ, i wurama. I seema i wurama saa sɔ̃ɔ yɛ̃san nɔm geu gian di. 11Bɛɛ Yerusalɛmugibu, bɛɛ be i yoru dimɔ Babiloniɔ, i kisirama. 12Domi wi, Gusunɔ wɔllu ka tem Yinni u nɛɛ, yeniban biru, Yerusalɛmun bɛɛrɛ ya koo wurama. Wee u man gɔriɔ bwese ni nu bɛɛn yãnu guran mi. U nɛɛ, nù n maa bɛɛ baba, ya sãawa nge win tiin nɔniya nu baba. 13Wee u koo nu nɔma doke kpa nu gɔsia bɛɛn yobu. Saa ye sɔɔra nu koo gia ma Gusunɔ, wɔllu ka tem Yinniwa u man gɔrima. 14Wiya u nɛɛ, bɛɛ Yerusalɛmugibu, i nuku dobun kuuki koowo. Domi u koo na u n ka bɛɛ wãa. 15Bwese dabina nu koo wura wi, Yinni Gusunɔn mi gia yen tɔ̃ɔ te, kpa nu ko win tɔmbu, kpa u n wãa ka be. Saa ye sɔɔra i ko i gia ma wi, Gusunɔ wɔllu ka tem Yinniwa u man gɔrima. 16U ko n maa Yuda mɔ tem dɛɛram mɛ sɔɔ. U koo maa Yerusalɛmu gɔsi. 17Baawure u koo nɔɔ mari Yinni Gusunɔn wuswaaɔ. Domi u koo seema win wãa yee dɛɛrarun di.

will be added

X\