Sakari 14

1Bɛɛ Yerusalɛmugibu, Yinni Gusunɔn tɔ̃ra wee. Ba koo bɛɛn yãnu gura bu bɔnu ko bɛɛn nɔni biru. 2U koo bwesenu kpuro mɛnna nu ka Yerusalɛmu wɔri. Ba koo ye mwa kpa bu yen yɛnusu dɔ̃ɔ sɔku. Ba koo ka yen tɔn kurɔbu kpuna ka dam. Kpa bu yen tɔmbun bɔnu yoru mwɛɛri bu ka doona. Adama ba ǹ be ba tie goomɔ. 3Saa ye sɔɔra Yinni Gusunɔ u koo tii sɔ̃ɔsi kpa u ka bwese ni tabu ko nge mɛ u ra ko tabu sɔɔ. 4Yen tɔ̃ɔ te, u koo win naasu sɔndi Olifin guurɔ te ta wãa Yerusalɛmun dee deeru, sɔ̃ɔ yari yeru gia. Olifin guu te, ta koo bɛsira suunuɔ saa sɔ̃ɔ yari yerun di sere sɔ̃ɔ duu yerɔ. Wɔwi baka ya koo yari ten suunu sɔɔ. Guu ten bee tia ya koo da sɔ̃ɔ yɛ̃san nɔm geu gia kpa bee tia yu maa da sɔ̃ɔ yɛ̃san mɔm dwaru gia. 5Saa ye sɔɔ, i ko i duki dawa win guunun wɔwa sɔɔ. Domi wɔwa ye, ya ko n wãawa sere Atisɛliɔ. I ko i duki suwa nge mɛ i raa kua sanam mɛ tem yĩiribu bɛɛ deema Osiasi Yudaban sina bokon waati. Saa ye sɔɔra Gusunɔ nɛn Yinni u koo na ka win tɔn dɛɛrobu. 6Yen tɔ̃ɔ te, yam bururam mu ǹ ko n maa wãa. Pura ya ko n wãa ka sere maa nim mɛ mu gɔsira nge kperu. 7Tɔ̃ɔ te, ta ko n sãawa nɛnɛm te Yinni Gusunɔ u yɛ̃. Ba ǹ wɔ̃kuru ka sɔ̃ɔ sɔɔ wunanamɔ. Adama yoka, yam bururam mu koo sɔ̃ɔsira. 8Yen tɔ̃ɔ te, nim gem mu koo yari Yerusalɛmun di kpa mɛn sukum mu koku mu da nim wɔ̃kuɔ ge ga wãa sɔ̃ɔ yari yeru gia, kpa sukum mu da nim wɔ̃ku ge ga wãa sɔ̃ɔ duu yeru gia. Nge mɛya n ko n sãa sɔ̃ɔ sãreru ka guran saa. 9Yinni Gusunɔwa u ko n sãa tem kpuron sunɔ. Wi turowa u ko n sãa Yinni. Win turon yĩsira tɔmbu kpuro ba koo gia. 10Isireliban tem kpuro mu koo gɔsia wɔwa saa Geban di sɔ̃ɔ yɛ̃san nɔm geu gia n ka da Rimɔɔwɔ Yerusalɛmun sɔ̃ɔ yɛ̃san nɔm dwaru gia. Saa ye sɔɔ, Yerusalɛmu ya koo yĩsiru yari kpa ya n wãa yen ayerɔ. Ya ko n wãawa saa kɔnnɔ ge ba mɔ̀ Bɛnyamɛɛn di, n ka da kɔnnɔ gbiikuuɔ, sere ka kɔnnɔwɔ ge ba mɔ̀ gani gɔmbunu. Saa maa kɔ̃su yee te ba mɔ̀ Hananɛɛlin di, n ka girari sina bokon resɛm gama yerɔ. 11Tɔmba koo sina ye sɔɔ. Ba ǹ maa ye kam koosiamɔ. Ya ko n wãawa bɔri yɛndu sɔɔ. 12Wee nɔni swãa te Yinni Gusunɔ u koo tɔmbu kpɛ̃ɛ be ba Yerusalɛmu tabu wɔri. Ben wasi koo kɔ̃siwa ba n ka sĩimɔ. Ben nɔni yi koo kɔ̃si ben nɔni wɔrusu sɔɔ, kpa ben yari yi kɔ̃si ben nɔsɔ. 13Yen tɔ̃ɔ te, nɛ, Yinni Gusunɔ kon wahala baka doke ben suunu sɔɔ. Kpa bu wɔrina bu soona. 14Yudaba ba koo tabu ko Yerusalɛmuɔ, kpa bu bwese tuku ni nu ka bu sikerenɛn dukia gurama. Yera, wura ka sii geesu ka yãa dabinu. 15Nin dumi ka nin birakɔsu ka nin yooyoosu ka nin kɛtɛkunu ka sere maa yaa sabe ni nu wãa mi, kpuro nu koo dumgbɛku mwaara. Dumgbɛku tia yera ya koo nu deema. 16Bwese ni nu raa Yerusalɛmu ye wɔri, nin ni nu tie, nu ko n da nɛwa wɔ̃ɔ baagere nu yiira Gusunɔ sina bokon wuswaaɔ, wi u sãa wɔllu ka tem Yinni, kpa nu Kunun tɔ̃ɔ bakaru ko. 17Bweseru garu tà kun de tu Gusunɔ sina boko wi u sãa wɔllu ka tem Yinni yiira tu sã Yerusalɛmuɔ, gura kun nɛmɔ ten temɔ. 18Egibitigibu bà kun de Yerusalɛmuɔ bu ka Kunun tɔ̃ɔ bakaru ko, gura kun nɛmɔ ben temɔ. U koo bu wahala dokewa nge bwese ni nu yina nu da nu Kunun tɔ̃ɔ bakaru ko. 19Nge mɛya u koo Egibitigibu ka bwese ni nu yina nu Kunun tɔ̃ɔ bakaru da Yerusalɛmuɔ kua. 20Yen tɔ̃ɔ te, ba koo dumin yangirenu sɔɔ yore bu nɛɛ, Yinni Gusunɔgia. Sãa yerun wekenu kpuro nu ko n sãawa nge yãku yerun gbɛ̃a. 21Wekenu kpuro nu ko n sãawa Gusunɔ, wɔllu ka tem Yinniginu Yerusalɛmuɔ ka Yudaɔ. Be ba koo yãkuru na, bera ba ko n da nu sue bu ka ben yãku yaa yike. Yen tɔ̃ɔ te sɔɔ, ba ǹ maa tenkuba wasi sãa yeru mi, ba n yãnu dɔramɔ.

will be added

X\