Sakari 13

1Yen tɔ̃ɔ te, bwia gaa ya koo yari yu ka Dafidin yɛnugibu ka Yerusalɛmugibun toranu wɔka. 2Yen tɔ̃ɔ te, nɛ, Gusunɔ wɔllu ka tem Yinni kon bũnun yĩsinu kpeerasia tem mɛ sɔɔ kpa bu ku raa maa nu yaaya. Kon maa nɛn sɔmɔ weesugii be ba bũu sãarun kĩru mɔ mi wuna. 3Goo ù n gari weesugii mɔ̀, win tundo ka win mɛro ba koo nùn sɔ̃wa bu nɛɛ, kaa gbi. Domi a weesu mɔ̀wa ka Yinni Gusunɔn yĩsiru. Kpa tundo wi, ka mɛro wi, bu nùn takobi sɔku bu go sanam mɛ u gari yi mɔ̀. 4Yen tɔ̃ɔ te, Gusunɔn sɔmɔbu ba koo sekuru wa ben kãsi weesuginun sɔ̃. Bà n gari mɔ̀, ba ǹ maa yabe sansuginu sebumɔ bu ka tɔmbu nɔni wɔ̃ke. 5Ben baawure u koo nɛɛwa, u ǹ sãa Gusunɔn sɔmɔ. Wi, gbaa wukowa. Domi ba nùn dwawa saa win piiburun di. 6Bà n nùn bikia ba nɛɛ, mana u sere mɛɛra yeni wa ye ya wãa win nɔmaɔ, kpa u wisi u nɛɛ, u ye wawa win bɔrɔ kĩnasibun yɛnuɔ. 7Gusunɔ, wɔllu ka tem Yinni u nɛɛ, takobi, a nɛn kparo wi na kua nɛn bɔ̃ɔ wɔrio. A nùn goowo kpa yãanu nu yarina, kpa n ni nu kun dam mɔ wɔri. 8U maa nɛɛ, bà n tem mɛn tɔmbu bɔnu kua suba ita, yen suba yiru ya koo gbi kpa sube tee teni tu tiara. 9Kon sube tee te dɔ̃ɔ doke kpa n tu sɔwa nge mɛ ba ra sii geesu sɔwe. Kon tu sɔwawa nge mɛ ba ra wura sɔwe. Ta koo nɛn yĩsiru soku kpa n tu wurari. Kon tu sɔ̃ n nɛɛ, ta sãawa nɛn tɔmbu. Kpa ten tii tu maa nɛɛ, na sãawa Gusunɔ ten Yinni.

will be added

X\