1 Bɛɛ Libanigibu, i bɛɛn kɔnnɔsu kɛniɔ kpa dɔ̃ɔ u bɛɛn dãa ye ba mɔ̀ sɛduru di. 2 Bɛɛ dãa ye ba mɔ̀ sipɛrɛ, i weeweenu koowo. Domi sɛduruba ba wɔruka. Be ba tii sue mi, ba kpeera. Bɛɛ Basanin dãa bakanu, i weeweenu koowo. Domi dãa sɔ̃ɔ ge ba ǹ daa kpɛ̃ bu du ga wɔruka. 3 Kparobu ba wuri mɔ̀, domi ben bɛɛrɛ ya kpa. Gbee sinansu su kukirimɔ, domi Yuudɛnin dãa sɔ̃ɔn bɛɛrɛ ya kpa. 4 Amɛniwa Yinni Gusunɔ u Sakari sɔ̃ɔwa. U nɛɛ, a yãanu kparo ni ba koo go. 5 Be ba nu dwemɔ ba goomɔ ba ǹ bu sɛɛyasiamɔ. Be ba maa nu dɔramɔ ba mɔ̀, ba nɛ, Gusunɔ siara, domi ba gobi mɔ. Nin kparobu ba ku ra maa ka nu yinɛ. 6 Nɛ, Yinni Gusunɔ na ǹ maa tɔmbun wɔnwɔndu mɔ̀ tem mɛ sɔɔ. Kon baawure bɛriwa win winsim nɔmuɔ ka win sunɔn nɔmuɔ. Ba koo ben tem arumani gurawa. Na ǹ maa bu wɔramɔ ben yibɛrɛban nɔmun di. 7 Yera Sakari u yãanu kparabu wɔri ni ba koo go. Yãa niya nu kɔ̃suru bo. Ma u kpara dɛki yiru kasu. U tia soka durom, tia maa nɔɔ tia. Ma u da u yãa ni nɔɔri. 8 Suru tian baa sɔɔ u nin kparobu ita go. Ma u ka nu tii kpara u tɛmanabu kpana. Ma nin tii nu nùn tusa. 9 Ma u nɛɛ, na ǹ maa nu kparamɔ. Nin ni nu koo gbi, nu gbio. Ni nu koo maa tiara nu tennɔ. 10 Ma u win dɛka ye u soka durom bɔɔka u ka sɔ̃ɔsi ma u win arukawani kusia ye u raa ka bwesenu kpuro bɔkua. 11 Yen tɔ̃ɔ tera u arukawani ye kusia. Ma yãa kɔ̃su ni nu nùn mɛɛra mi, nu gia ma Yinni Gusunɔn gariya yi kooramɔ. 12 Ma u bu sɔ̃ɔwa u nɛɛ, yà n bu wɛ̃re, bu nùn kɔsiaru wɛ̃ɛyɔ, ya kun maa bu wɛ̃re, bu derio. Yera ba sii geesun gobi tɛna yĩira ba nùn kɔsia. 13 Ma Yinni Gusunɔ u nùn sɔ̃ɔwa u nɛɛ, a sii geesun gobi tɛna ye ba mɛɛra burɛ mi, mɔmɔ wɛ̃ɛyɔ. Ma u gobi yi sua u yari Gusunɔn sãa yerɔ yi ka ko mɔmɔgii. 14 Yen biru, u maa win kpara dɛka yiruse ye u soka nɔɔ tia mi, bɔɔka u ka sɔ̃ɔsi ma Yudaba ka Isireliban baa sɔɔ nɔɔ tia maa sari. 15 Yinni Gusunɔ u maa nùn sɔ̃ɔwa u nɛɛ, a kparo nge kparo gari bɔkɔ. 16 Domi kon kparo goo seeya tem mɛ sɔɔ, wi u kun yãanu nɔɔrimɔ ni nu gɔɔ dɔɔ. U ǹ nin binu kasum dɔɔ. U ǹ ni nu mɛɛra wa tim kuammɛ. Mɛya u ǹ maa ni nu bwãa do nɔɔrimɔ. Adama u koo ni nu gum mɔn yaa tem sere ka nin kɔ̃riɔ. 17 Bɔ̃rurowa kparo gari bɔkɔ wi u yãanu derimɔ. Takobi yu win gãseru ka win nɔm geun nɔnu kɔsukuo, kpa gãse te, tu gbera kpa nɔnu ge, gu gbi.
