Sakari 10

1I Yinni Gusunɔ kanɔ u bɛɛ tom buruku gura kɛ̃. U koo de guru woo gu na kpa guru baka yu nɛ. Kpa yakasu su kpi baama. 2Domi bũu nìn bwãarokunu ba mɔ̀ Terafimu nu weesu mɔ̀. Sɔrobu ba kãsi weesuginu waamɔ. Ben dosusu su sãawa weesu. Sin nuku yɛmiasiabu sãawa kam dirum. Yen sɔ̃na ba sirenɛ nge yaa sabenu. Ba wɔnwɔndu soore, domi ba ǹ kparo mɔ. 3Yinni Gusunɔ u nɛɛ, na ka kparo tuko be ba nɛn tɔmbu kpare mɔru mɔ̀. Be, be ba sãa nge bonu mi, kon bu wɔrima. Domi nɛ, Gusunɔ wɔllu ka tem Yinni na nɛn tɔmbu Yudaba naawa. Kon bu dendiwa tabu sɔɔ nge dum girimagia. 4Ben min diya sinambu ba koo yari. Kpa ba n dam mɔ nge gani gɔmburun kperu, ǹ kun mɛ nge kuu bekurugirun gbere, ǹ kun mɛ nge tɛn te ba ra ka tabu de. 5Ba ko n sãawa nge tabu durɔ damgii be ba ben yibɛrɛba taakumɔ swɛɛ sɔɔ nge pɔtɔkɔ. Ba koo tabu ko yèn sɔ̃ nɛ, Yinni Gusunɔ ko na n ka bu wãa. Ben yibɛrɛ be ba dumi yɔɔwa ba koo sekuru wa. 6Kon Yudaba tãsisia, kpa n Isireliba wɔra. Kon ka bu wurama, domi na ben wɔnwɔndu mɔ. Ba ko n sãawa nge be na ǹ daa biru kisi. Domi nɛna na sãa Gusunɔ ben Yinni. Kon ben kanaru mwa. 7Efaraimuba ba ko n sãawa nge tabu durɔ damgibu. Ba ko n nuku dobu mɔ nge wi u tam nɔra. Ben bibu ba koo ye wa kpa bu nuku dobu ko. Ba koo nuku dobu ko nɛ, Yinni Gusunɔn sɔ̃. 8Kon wia ko bu ka mɛnnama. Domi nɛna na bu yakiamɔ. Ba koo dabia nge yellu. 9Kpa n de ba n pusa bwesenun suunu sɔɔ. Mi ba wãa n toma mi, ba ko n da man yaaye min di. Kpa ba n wãa mi ka ben bibu. Yen biru, ba koo wurama. 10Kon de bu wurama saa Egibitin di. Kon bu mɛnnama saa Asirin di. Kpa n de bu wurama Galadiɔ ka Libaniɔ. Batuma kun bu turi. 11Ba koo nim wɔ̃ku tɔbura mi ba nuku sankiraru wa. Gusunɔ u koo gen nim kurenu so, kpa Nilun daarun nim mu gbera. Asirigibun tii suabu koo kpe. Kpa Egibitigibun bandu tu nɔru ko. 12Kon nɛn tɔmbu tãsisia. Kpa ba n sĩimɔ ka nɛn yĩsiru. Nɛ, Yinni Gusunɔwa na yeni gerua.


Copyright
Learn More

will be added

X\