Womu Duro 8

1À n daa sãa nɛn sesu mɛro turosi, kon ka nun yinna tɔɔwɔ, kpa n nun bɔkasi, goo kun maa man gɛmmɔ. 2Kon ka nun da nɛn mɛron yɛnuɔ kpa a man bwisi kɛ̃. Kon nun tam nubu durorugim wɛ̃ mɛ na kua ka dãa bii ni ba mɔ̀ gerenadi. 3Na kĩ na n nɛn wiru sɔndi win nɔm dwarɔ, kpa win nɔm geu gu man bɔkasi. 4Bɛɛ Yerusalɛmun wɔndiaba, na bɛɛ sɔ̃ɔmɔ, i ku nɛn kĩnasi yamia saa ye u ǹ kĩ u se. Wɔndiaba ba nɛɛ, 5wara u wee gbaburun di u win kĩnasi gballi. Kurɔ u nɛɛ, na nun yamia dãa saarɔ wunɛn yɛnun bɔkuɔ, mi wunɛn mɛro u wunɛn gura sua u nun mara. 6A de nɛ turon gari yi n wãa wunɛn gɔ̃ruɔ. A de a n nɛ turo bɔkasi. Domi kĩru ta dam mɔwa nge gɔɔ. Nisinu nu maa sãawa gãa gɔbunu nge gɔribun wãa yeru. Nin dam mu sãawa nge dɔ̃ɔ yari. Yinni Gusunɔn min diya yi wee. 7Nim wɔ̃kun nim ka mɛn kpãaru mu ǹ kpɛ̃ mu kĩrun dɔ̃ɔ go. Mɛya maa daanun nim yiburu ta ǹ kpɛ̃ tu kĩi te wukiri. Tɔnu wi u win dukia kpuro wɛ̃ bu ka nùn kĩan sɔ̃, u ǹ kĩi te wasi. Yen kɔkɔrɔ, ba koo nùn gɛmwa. Kurɔn sesubu ba nɛɛ, 8sa sesu piibu mɔ wi u kun gina bwãa kpia. Amɔna sa ko nùn kua sanam mɛ ba nùn kĩan na. 9Ù n sãa nge gbãraru, sa ko tu tãsisiawa ka sii geesu. Ù n maa sãa nge kɔnnɔ, sa ko ge kɔrewa ka dãa ye ba mɔ̀ sɛdurun gambo. Kurɔ u nɛɛ, 10na sãawa nge gbãraru, ma nɛn bwãa ya sãa nge wuu kɔ̃sobun wãa yeru. Nɛn kĩnasi u yɛ̃ ma na bɔri yɛndu mɔ win mi. Durɔ u nɛɛ, 11Salomɔɔ u resɛm tɔ̃kan gbaaru mɔ Baali Hamɔɔwɔ. Ma u gbaa te kɔ̃sobu nɔmu sɔndia. Ben baawure u ra ka sii geesun gobi nɔrɔbu (1.000) nɛwa bu sere gbaa ten marum sɔri. 12Salomɔɔ u win sii geesun gobi nɔrɔbu (1.000) suo u n mɔ, kpa u win gbaa kɔ̃sobu yen goobu (200) wɛ̃. Nɛna na nɛn tiin resɛm gbaaru mɔ, ma na tu kɔ̃su. 13A de n wunɛn nɔɔ nɔ nɛn kĩnasi, wunɛ wi a ra n wãa dãa gbaaru sɔɔ. Kpaasiba kĩ bu gu nɔ. Kurɔ u nɛɛ, 14a wasi suo nɛn kĩnasi, kpa a n sãa nge yaa kpiku ǹ kun mɛ nge gini kpɛma ye ya wãa guuru wɔllɔ mi yaka nubu durorugisu wãa.

will be added

X\