1 a gɔsirama, a gɔsirama, Sunɛmun bii, a gɔsirama su nun mɛɛri. Mban sɔ̃na i nɛ Sunɛmun bii mɛɛra nge wi u yaamɔ tɔn wuunu yirun baa sɔɔ. Durɔ u nɛɛ, 2 wɔndia bɛɛrɛgii, wunɛn naasu su wã salubata sɔɔ. Wunɛn pɔra ya wãwa nge saba. Wi u ye kua mɔmɔn tiiwa. 3 Wunɛn bwĩirun gira yera sãawa bwɛrɛrɛ nge nɔran nɔɔ ye ya ku ra tam kpe. Wunɛn bɔsɔ ga swɛ̃ri nge alikama ye ba ka biibii sikerenɛ. 4 Wunɛn bwãsu sãawa nge yaa kpikun binu yiru. 5 Wunɛn wĩiru ta buririwa nge suunu donnu. Wunɛn nɔni yi dɛɛrewa nge Hɛsibonin yɛru si su wãa wuu bɔkɔ gen kɔnnɔn bɔkuɔ. Wunɛn wɛ̃ru ta dɛndewa mam mam nge Libanin kɔ̃su yeru te ta Damasi mɛɛra. 6 Wunɛn wira suarewa nge guu te ba mɔ̀ Kaamɛli. Ma wunɛn tara ya ballimɔ nge beku gobigiru sere ya sina bokon bwɛ̃ra kpuro mwa. 7 Wunɛn buram banda, a man wɛ̃re too. Wunɛ sɔɔra nɛn kĩru kpuro wãa. 8 Wunɛn wasi yi dɛndewa nge kpakpa bãa. Wunɛn bwãsu su sãawa nge dãa marum swaaru. 9 Na nɛɛ, kon kpakpa yɔwa kpa n yen marum nɛnɛ. Wunɛn bwãsu su sãawa nge resɛm swaaru. Wunɛn wɛ̃siaru ta nuburu do nge dãa marum mɛ ba mɔ̀ pɔmu. 10 Nà n nun sɔ̃su, na ra n nuku dobu mɔ nge wi u tam durom nɔra. Kurɔ u nɛɛ, tam mɛ, mu kokuo nɛn kĩnasin sɔ̃ mu du win nɔɔ sɔɔ ù n dweeyamɔ. 11 Na sãawa nɛn kĩnasigii, ma win kĩru kpuro wãa nɛ sɔɔ. Kurɔ u nɛɛ, 12 nɛn kĩnasi, a yarima su da baru kpaanɔ kpa sa n wãa mi. 13 Bururu sa ko se su da dãa gbaarɔ, su wa resɛm tɔ̃ka ka dãa te ba mɔ̀ gerenadi yà n kpare ya wɛ̃su sãa. Miya kon nun kĩru sɔ̃ɔsi. 14 Dãa te ba mɔ̀ mandaragore ta ten turare yɛ̃kamɔ. Bɛsɛn yɛnu kɔnnɔwɔ, sa dãa marum kpuro mɔ mɛ mu dobu bo, ginakugim ka gisɔku gegim. Na mɛ kpuro yii wunɛn sɔ̃ nɛn kĩnasi.
