1 a sãawa kurɔ burɔ, nɛn kĩnasi. Wunɛn nɔni yi ballimɔ nge waa bakagii wunɛn sɔnditian wɛ̃rin di. Wunɛn seri yi sãa nge boo wuuru te ta saramamɔ Galadin guuru wɔllun di. 2 Wunɛn donnu nu buriri nge yãa nìn sansu ba bɔɔra nu nim nɔrum wee. Nu maa nɔɔ nɛwa swɛɛ swɛɛ, nin gara kun kande. 3 Wunɛn nɔɔ ga swɛ̃riwa nge tom, ma ga waabu wã. Wunɛn baanu nu ballimɔwa nge dire sɔnsɔm bia wunɛn sɔnditian wɛ̃rin di. 4 Wunɛn wĩira wãwa nge Dafidin dii bwereku gagu mi ba ra tabu yãnu bere. Wunɛn saban bataniba ba sãa nge tabu yãa ni ba bwɛ̃ mi. 5 Wunɛn bwãsu sãa nge yaa kpikun binu yiru ni nu yakasu dimɔ biibiin suunu sɔɔ. 6 Sere sɔ̃ɔ u ka du saaru tu kpɛ̃a, kon da guuru wɔllɔ mi turare ye ba mɔ̀ miru ka turare dɛkagia ya wãa. 7 A sãawa kurɔ burɔ, nɛn kĩnasi. A ǹ bau gagu mɔ. 8 A na su doona saa Libanin guunun di ka Seniri ka Hɛɛmɔɔn guurun di mi gbee sinansu ka musuku yambarɔsu ra n wãa. 9 Bɛsɛn nɔni yì n yinna, ǹ kun mɛ nà n wunɛn saban batani tia wa, wunɛn kĩra ra nɛn gɔ̃ru kpuro mwɛwa, nɛn sesu, nɛn kurɔ. 10 Wunɛn kĩru ta nuku dobu mɔ nɛn sesu, nɛn kurɔ. Wunɛn kĩru ta tam dobu kere. Mɛya maa wunɛn turaren nuburu ta do ta turare kpuro kere. 11 Wunɛn nɔɔ ga sɔ̃subu do nge tim bau. Tim ka bom mu wãa wunɛn nɔɔ sɔɔ. Wunɛn yãnu nu nuburu dowa nge dãa te ba mɔ̀ sɛduru Libaniɔ. 12 A sãawa nge dãa gbaaru te ba kara koosi, nɛn sesu, nɛn kurɔ. A sãawa nge dɔkɔ ye ba kɛnua, ǹ kun mɛ nge bwia ye ba mara. 13 Wunɛn nim mu dãa gbaarun dãnu yɛ̃kamɔ. Nin binu ni ba sokumɔ gerenadi nu do too. Mɛya lalle ka naadi ya maa kpia mi, 14 ka safarani, ka yaka si su nuburu do, ka kanɛli, ka dãa ni ba ra ka turare dɛkagia ko, ka miru, ka aloɛsi, ka sere yaka si su nuburu dobu bo kpuro. 15 Wunɛ a sãawa nge dãa gbaarun dɔkɔ ǹ kun mɛ nge bwia ye ya nim sumɔ mɛ mu wee saa Libanin guunun di. Kurɔ u nɛɛ, 16 sɔ̃ɔ yɛ̃si yɛ̃sikan wosu, i seewo i nɛn dãa gbaarun dãnu kɔ̃, kpa nin nubu duroru tu yari kpuro. I de nɛn kĩnasi u du win dãa gbaaru sɔɔ kpa u yen dãa bii geenu di.
