Womu Duro 2

1Nɛna na sãa nge gunarun biibii ye ya kpia tem tɛɛraɔ. Na maa sãa nge yakasun biibii ye ya wãa wɔwaɔ. Durɔ u nɛɛ, 2à n nɛn kĩnasi wa win wɔndia kpaasibun wuurɔ, u ra n sãawa nge biibii ye ya wãa sãkin suunu sɔɔ. Kurɔ u nɛɛ, 3à n nɛn kĩnasi wa aluwaasiban suunu sɔɔ, u sãawa nge dãa te ba mɔ̀ pɔmiɛ dãnun suunu sɔɔ tèn marum mu dibu do. Na ra kã na n sɔ̃ win saarɔ. 4U ka man da mi ba ra tɔ̃ɔ baka dĩanu di. Ma u man nɛnua ka kĩru. 5Wee kĩra man barɔ kua. A man dam kɛ̃ ka kira duronu, ka pɔmiɛn marum. 6Na kĩ na n nɛn wiru sɔndi win nɔm dwarɔ, kpa win nɔm geu gu man bɔkasi. Durɔ u nɛɛ, 7bɛɛ Yerusalɛmun wɔndiaba, na bɛɛ sɔ̃ɔmɔ ka yɛɛ kpiki ka nɛnnun yĩsinu, i ku nɛn kĩnasi yamia saa ye u ǹ kĩ u se. Kurɔ u nɛɛ, 8na nɛn kĩnasin nɔɔ nɔɔmɔ. Wɔɔ u guunu sarikiramɔ u wee. 9U sãawa nge yaa kpiku ǹ kun mɛ nge gini kpɛma. Wi wee dirun biruɔ, u man mɛɛrima fɛnɛntin di. 10Ma u ka man gari kua u nɛɛ, a seewo nɛn kĩnasi, kurɔ burɔ, a na. 11Wee puran saa ya doona, ma gura ya yɔ̃ra. 12Biibii ya kpia yam kpuro. Sa gunɔ bwese bwesekan swĩi nɔɔmɔ. Kparukonun swĩi yi nɔɔra bɛsɛn tem sɔɔ. 13Dãa te ba mɔ̀ figie ta marum torumɔ, ma resɛm tɔ̃kan wɛ̃sun nubura pusa. A seewo, a na nɛn kĩnasi, kurɔ burɔ, 14wunɛ wi a sãa nge sãkusã ye ya wãa kpee baa sɔɔ ya kukua. A man wunɛn wuswaa sɔ̃ɔsio. A de n wunɛn nɔɔ nɔ. Domi wunɛn dɔkɔra nɔɔbu do. Mɛya maa wunɛn wuswaa ra man wɛ̃re. Kurɔn mɛro u nɛɛ, 15i sun dɛmaku binu mwɛɛrio ni nu bɛsɛn resɛm gbaaru sankumɔ saa ye ya wɛ̃su sãa. Kurɔ u nɛɛ, 16nɛn kĩnasi u sãawa nɛgii, na maa sãa wigii. U win sabenu kparamɔ yakasun biibiin suunu sɔɔ. 17A de a gɔsira, nɛn kĩnasi, a n wãa guunu wɔllɔ a n sãa nge yaa kpiku ǹ kun mɛ nge gini kpɛma, sere sɔ̃ɔ u ka du saaru tu kpɛ̃a.

will be added

X\